តើរដ្ឋាភិបាលចិនអាចសង្រ្គោះវិស័យអចលនទ្រព្យរបស់ខ្លួនបានដែរឫទេ?

យន្តការសង្រ្គោះវិស័យអចលនទ្រព្យ«បញ្ជី ស» ដែលរដ្ឋាភិបាលចិន បានដាក់ចេញនៅពេលនេះកំពុងតែយកចិត្តទុកដាក់អនុវត្តដោយធនាគារធំៗចំនួន៦នៅក្នុងប្រទេសមហាអំណាចនេះ។ សារព័ត៌មានបានរាយការណ៍ថា ធនាគារចិន គ្រប់គ្រងដោយរដ្ឋចំនួន៦ កំពុងផ្គូរផ្គងនឹងគម្រោងលំនៅដ្ឋានជាង៨ពាន់២រយគម្រោង ដើម្បីសម្រួលនិតិវិធីកម្ចីអភិវឌ្ឍន៍ក្រោមយន្តការបញ្ជី ស ដែលមានបំណងបញ្ចូលសាច់ប្រាក់ងាយស្រួលទៅក្នុងវិស័យដែលរងគ្រោះដោយវិបត្តិមួយនេះ។

លោក រ៉េមុន ឆេង ( Raymond Cheng )ប្រធានផ្នែកស្រាវជ្រាវទីផ្សារចិននៅក្រុមហ៊ុន CGS International បាននិយាយថា វឌ្ឍនភាពសម្រាប់គម្រោងបញ្ជីស គឺលឿនជាងការរំពឹងទុក ហើយវាហាក់ដូចជានិយ័តករបានដាក់សម្ពាធខ្ពស់លើធនាគារក្នុងការផ្តល់ប្រាក់កម្ចីដល់អ្នកអភិវឌ្ឍន៍នៅពេលនេះ។

លោកបានបន្តថា នៅក្រោមយន្តការ "បញ្ជីស" ដែលបានចាប់ផ្តើមអនុវត្តកាលពីថ្ងៃទី២៦ ខែមករា មកនោះ រដ្ឋាភិបាលតំបន់នៅតាមទីក្រុងនានានៅក្នុងប្រទេសចិន កំពុងផ្តល់អនុសាសន៍ដល់ធនាគារឲ្យគាំទ្រជាពិសេសដល់គម្រោងលំនៅដ្ឋានដែលមានតម្លៃសមរម្យសម្រាប់ការគាំទ្រផ្នែកហិរញ្ញវត្ថុ និងកំពុងសម្របសម្រួលជាមួយស្ថាប័នហិរញ្ញវត្ថុ ដើម្បីបំពេញតម្រូវការរបស់គម្រោង។ លោកបានបន្តថា យន្តការនេះគឺជាផែនការដ៏សំខាន់នៃកិច្ចខិតខំប្រឹងប្រែងរបស់ទីក្រុងប៉េកាំងក្នុងការធ្វើឱ្យមានស្ថិរភាពវិបត្តិបំណុលក្នុងវិស័យនេះ និងបង្កើនទំនុកចិត្តនៅក្នុងឧស្សាហកម្មដែលមានចំនួនមួយភាគបួននៃផលិតផលក្នុងស្រុកសរុបរបស់ប្រទេសចិនមួយនេះ៕

ដោយៈ សរ សុជាតិ