ការព្រួយបារម្ភជុំវិញក្រុមហ៊ុនអភិវឌ្ឍន៍របស់ចិនដូចជាក្រុមហ៊ុន China Evergrande Group ដែលកំពុងត្រដាបត្រដួសនិងបំណុលជុំទិស និងក្រុមហ៊ុនដ៏សំខាន់ Country Garden Holdings ជាដើម បានធ្វើឱ្យការលក់លំនៅឋានធ្លាក់ចុះ ហើយក្រុមហ៊ុនអចលនទ្រព្យមួយចំនួនអាចនឹងធ្លាក់ចូលទៅក្នុងការខាតបង់ទ្រព្យសម្បត្តិរបស់ពួកគេ ប្រសិនបើការធ្លាក់ចុះតម្លៃផ្ទះបានអូសទាញតម្លៃលំនៅឋានមិនទាន់សាងសង់រួចរបស់ពួកគេធ្លាក់ចុះខ្លាំងពេក។
ក្រុមហ៊ុន Country Garden ដែលជាក្រុមហ៊ុនអភិវឌ្ឍដ៏ធំមួយរបស់ចិនដែរនោះ បានព្រមានវិនិយោគិនកាលពីខែមុនពីលទ្ធភាពនៃ «ការខកខានសងបំណុល» របស់ខ្លួន ដោយសារតែការខកខានការទូទាត់ និងកាតព្វកិច្ចផ្សេងទៀត។ ក្រុមហ៊ុននេះ មានបំណុលចំនួន ១៨៦ ពាន់លានដុល្លារនៅចុងខែមិថុនា ដោយក្នុងនោះគេជឿថា ប្រហែល១០% នៃបំណុល អាចកាន់កាប់ដោយវិនិយោគិនបរទេសក្នុងទម្រង់ដូចជា ការលក់មូលបត្របំណុលជាប្រាក់ដុល្លារជាដើម។
អត្ថបទគួរអាន
បើតាមក្រុមហ៊ុន J.P. Morgan បានឱ្យដឹងថា ក្រុមហ៊ុន Country Garden ត្រូវទូទាត់សងអត្រាការប្រាក់ និងមូលបត្របំណុល យ៉ាងតិចជាង២ពាន់លានដុល្លារ នៅក្នុងឆ្នាំនេះ ទោះបីជាមកដល់ពេលនេះ ក្រុមហ៊ុនចិនមួយនេះ មានមូលនិធិគ្រប់គ្រាន់ ដើម្បីទូទាត់អត្រាការប្រាក់ និងមូលបត្របំណុលទាំងនេះក៏ដោយ។ ចំណែកក្រុមហ៊ុន China Evergrande Group ដែលបានដាក់ពាក្យសុំការការពារក្ស័យធននៅសហរដ្ឋអាមេរិក កាលពីខែមុនបានជួបបញ្ហាក្នុងការចរចារៀបចំរចនាសម្ព័ន្ធបំណុលរូបិយបណ្ណបរទេសរបស់ខ្លួនឡើងវិញផងដែរ។
ទោះចង់ ឬមិនចង់ ពេលនេះ ហានិភ័យហិរញ្ញវត្ថុបានកើតឡើងរួចហើយ។ កម្ចីមិនដំណើរការ ឬ Bad Loan ដែលមាននៅក្នុងឧស្សាហកម្មអចលនទ្រព្យ ក្នុងធនាគារធំៗចំនួន៣២របស់ចិន បានហក់ឡើង ៤៤% ក្នុងមួយឆ្នាំ គិតត្រឹមចុងខែមិថុនាកន្លងទៅ ដោយមានទំហំដល់ទៅ ជិត៤០ពាន់លានដុល្លារ។ នេះបើតាមទិន្នន័យទិន្នន័យដែលបានបង្ហាញដោយសារព័ត៌មានជប៉ុននីកេអេស៊ា។ ធនាគារក្នុងតំបន់កំពុងរងផលប៉ះពាល់យ៉ាងខ្លាំងនោះ មានដូចជា Bank of Gansu និង Bank of Jiujiang ដែលឃើញបំណុលអាក្រក់ទាក់ទងនឹងអចលនទ្រព្យ បានកើនឡើងទ្វេដង ក្នុងរយៈពេលត្រឹមតែ៦ខែប៉ុណ្ណោះ។
បើតាមក្រុមហ៊ុន Goldman Sachs បានឱ្យដឹងថា ធនាគារកាន់កាប់បំណុលហិរញ្ញវត្ថុរបស់អ្នកអភិវឌ្ឍន៍ចិនប្រហែល៧៥% ដោយបានប៉ាន់ប្រមាណថា ធនាគារទាំងនេះអាចប្រឈមមុខនឹងការខាតបង់ប្រហែលជាង ១៦៣ពាន់លាដុល្លារទៅលើបំណុលនេះ។ ការវិភាគរបស់ក្រុមហ៊ុន Goldman បាននិយាយថា ស្ថាប័នខ្នាតតូចនិងមធ្យម ដែលមានមូលធនមិនរឹងមាំអាចនៅទីបំផុតនឹងខ្វះសាច់ប្រាក់ដោយងាយស្រួល ឬទុនបង្វិលនៅក្នុងអាជីវកម្ម។
បើតាមសារព័ត៌មាន នីកេ នាពេលនេះ វិនិយោគិនអន្តរជាតិកំពុងតាមដានហានិភ័យទាំងនេះ និងចាប់ផ្តើមងាកចេញពីចិន។ ការលក់សុទ្ធនៅក្នុងភាគហ៊ុនចិន ដោយក្រុមឈ្មួញភាគហ៊ុនបរទេសតាមរយៈផ្សារហ៊ុនហុងកុងបានកើនដល់ជាង ១២ ពាន់លានដុល្លារកាលពីខែមុន។ ក្រុមហ៊ុន CPP Investments ដែលជាមូលនិធិសោធននិវត្តន៍ដ៏ធំបំផុតរបស់កាណាដា ថ្មីៗនេះ បានបញ្ឈប់ការវិនិយោគនៅក្នុងប្រទេសចិនដែរ។ នេះបើតាមការរាយការណ៍ដោយរ៉យទ័រ។
យ៉ាងណាក៏ដោយចុះ តាមការព្យាករដោយសារប័នអន្តរជាតិធំមួយចំនួន ប្រទេសចិននៅឆ្នាំនេះ នឹងរក្សាបានកំណើនសេដ្ឋកិច្ច ៤,៥% ដែលជាអត្រាមួយទាបជាងអ្វីដែលរដ្ឋាភិបាលប្រទេសនេះ ធ្លាប់ព្យាករទុកថា នឹងកើនដល់ ៥%។
