លោក វ៉ាង យី រដ្ឋមន្ត្រីការបរទេសចិន ក៏បានចោទប្រកាន់«កម្លាំងខាងក្រៅ» ថា «កំពុងព្យាយាមធ្វើឱ្យមានការមិនចុះសម្រុង» ក្នុងចំណោមប្លុកសមាជិកអាស៊ាន ដើម្បីរារាំងមិនឱ្យចេញដំណោះស្រាយរួមក្នុងជម្លោះសមុទ្រចិនខាងត្បូងជាមួយចិនបានផងដែរ។ នេះបើតាមការចុះផ្សាយដោយសារព័ត៌មាន South China Morning Post។
អត្ថបទគួរអាន
ការថ្លែងឡើងបែបនេះរបស់ប្រមុខអ្នកការទូតកំពូលចិន ធ្វើឡើងតាមរយៈវីដេអូទៅកាន់សន្និសីទមួយ ដែលរៀបចំដោយសហគមន៍គោលនយោបាយការបរទេសនៃប្រទេសឥណ្ឌូណេស៊ី ដែលមានមូលដ្ឋាននៅទីក្រុងហ្សាកាតា។ នៅក្នុងវីដេអូនោះ លោកវ៉ាងបានថ្លែងថា «គំនិតសង្គ្រាមត្រជាក់ និងល្បែងយកអ្នកឈ្នះអ្នកចាញ់ គួរតែត្រូវបានបញ្ឈប់ទៅនៅក្នុងតំបន់ ព្រោះបើមិនដូច្នេះទេ តាមរយៈការប្រកួតប្រជែងភូមិសាស្ត្រនយោបាយនេះ អាស៊ីនឹងក្លាយជាទីលានសម្រាប់ពួកមហាអំណាចដូចអតីតកាល»។
ក្នុងនោះ លោកបានគូសបញ្ជាក់ដោយលើកយកវិបត្តិអ៊ុយក្រែនធ្វើជាឧទាហរណ៍ជាក់ស្តែង។ លោកវ៉ាងយី ថា ជម្លោះប្រភេទនេះមិនត្រូវកើតឡើងម្តងទៀតនៅក្នុងតំបន់អាស៊ីឡើយ ហើយលោកក៏លើកឡើងនិងសរសើរអំពី«គុណតម្លៃអាស៊ី» និងបានអំពាវនាវដល់ស្មារតីនៃសន្និសីទឆ្នាំ១៩៥៥ នៅទីក្រុង Bandung ប្រទេសឥណ្ឌូណេស៊ី ជាកន្លែងដែលប្រទេសទើបទទួលឯករាជ្យថ្មី បានយល់ព្រមលើកកម្ពស់កិច្ចសហប្រតិបត្តិការសេដ្ឋកិច្ច និងវប្បធម៌ ហើយប្រឆាំងអាណានិគមនិយមនៅក្នុងតំបន់។
ទោះបីជានៅក្នុងការថ្លែងតាមវីដេអូនោះ លោកវ៉ាងមិនបានបញ្ជាក់ឈ្មោះ«កម្លាំងខាងក្រៅ»ថា ជាប្រទេសណា ក៏អ្នកអង្កេតមួយចំនួនយល់ឃើញថា ចង់សំដៅទៅកាន់សហរដ្ឋអាមេរិក និងសម្ព័ន្ធតែម្តង។ យោងតាមលោក Zhou Chenming អ្នកស្រាវជ្រាវនៅវិទ្យាស្ថានស្រាវជ្រាវវិទ្យាសាស្ត្រ និងបច្ចេកវិទ្យាយោធា Yuan Wang ដែលមានមូលដ្ឋាននៅទីក្រុងប៉េកាំង បានកត់សម្គាល់ឃើញថា សុន្ទរកថារបស់លោក Wang បានឆ្លុះបញ្ចាំងពីការព្រួយបារម្ភរបស់ទីក្រុងប៉េកាំងចំពោះផែនការយុទ្ធសាស្ត្ររបស់សហរដ្ឋអាមេរិកដែលមានសក្តានុពល ក្នុងការបង្កើតវិបត្តិមួយចំនួនស្រដៀងនឹងជម្លោះយោធាដែលកំពុងបន្តរវាងរុស្ស៊ី និងអ៊ុយក្រែននៅក្នុងតំបន់អាស៊ីនេះ។
អ្នកស្រាវជ្រាវរូបនេះបន្ថែមថា «ការដាក់ពង្រាយយោធានាពេលថ្មីៗនេះ របស់សហរដ្ឋអាមេរិកនៅក្នុងឧបទ្វីបកូរ៉េ និងតំបន់ភាគបូព៌ា ដើម្បីពង្រឹងសម្ព័ន្ធកូរ៉េខាងត្បូងនិងជប៉ុន រួមជាមួយនឹងកិច្ចព្រមព្រៀង Aukus ដើម្បីភ្ជាប់អូស្ត្រាលី និងអង់គ្លេស និងសកម្មភាពផ្សេងទៀត គឺសុទ្ធសឹងជាការបង្កហេតុ និងយុទ្ធសាស្ត្ររបស់ទីក្រុងវ៉ាស៊ីនតោន ដែលចង់បំបែកកម្លាំងយោធាចិន នៅក្នុងទិសដៅផ្សេងគ្នា បើសិនសង្គ្រាមពិតជាផ្ទុះឡើងនៅកោះតៃវ៉ាន់មែននោះ»។
