អំពើពុករលួយ និងជម្លោះដីធ្លីកំពុងក្លាយជាក្តីបារម្ភសម្រាប់ផលិតកម្មរ៉ែនីកែលនៅឥណ្ឌូនេស៊ី

ឥណ្ឌូណេស៊ី គឺជាប្រទេសផលិតថ្មនីកែលដ៏ធំបំផុតមួយនៅក្នុងពិភពលោក ខណៈរ៉ែនេះ គឺជាធាតុផ្សំដ៏សំខាន់នៅក្នុងការផលិតថ្មអាគុយសម្រាប់រថយន្តអគ្គិសនី និងរថយន្តកូនកាត់ដទៃទៀត។ ប្រទេសដែលមានកំណើនប្រជាជនវ័យក្មេងខ្ពស់នេះ បានចិញ្ចឹមចិត្តយ៉ាងសកម្មក្នុងការទាក់ទាញការវិនិយោគ​បរទេស និងប្រើឥទ្ធិពលលើធនធាននេះ ដើម្បីអភិវឌ្ឍសមត្ថភាពរបស់ខ្លួនក្នុងការផលិតសមាសធាតុបច្ចេកវិទ្យាទំនើបៗ។

ប៉ុន្តែមហិច្ឆតានេះក៏បានបង្កឱ្យមានអំពើពុករលួយ និងវិវាទដីធ្លីកាន់តែច្រើន ដែលជាកង្វល់ដ៏ធំមួយសម្រាប់ក្រុមហ៊ុនប្រកបអាជីវកម្មស្របច្បាប់ផងដែរ។ ជាក់ស្ដែង បច្ចុប្បន្នមន្ត្រីរដ្ឋាភិបាល ថ្នាក់កណ្តាល និងតាមតំបន់មួយចំនួនកំពុងស្ថិតក្រោមការកាត់ក្តី ឬស្ថិតក្រោមការស៊ើបអង្កេតពីករណីស៊ីសំណូកទាក់ទងនឹងការចេញលិខិតអនុញ្ញាតឱ្យជីករ៉ែនេះ នៅលើកោះស៊ូឡេវេស៊ី (Sulawesi) និងកោះម៉ាលូគូខាងជើង (North Maluku) ដែលសម្បូរទៅដោយរ៉ែនីកែល។

មិនត្រឹមតែមានការពាក់ព័ន្ធនឹងមន្ត្រីសាធារណៈប៉ុណ្ណោះទេ សូម្បីតែមន្ត្រីប្រតិបត្តិមួយចំនួននៅតាមក្រុមហ៊ុនឯកជន ក៏មានការពាក់ព័ន្ធនឹងអំពើពុករលួយនេះដែរ។ ជាក់ស្ដែងលោក ស្ទេវី ថូម៉ាស (Stevi Thomas) ជានាយកក្រុមហ៊ុនរ៉ែនីកែល ហារីតា (Harita Nickel) បានរងការចោទប្រកាន់ពីគណៈកម្មការលុបបំបាត់អំពើពុករលួយរបស់ឥណ្ឌូនេស៊ី (KPK) ពីបទស៊ីសំណូកប្រហែល ៦ ម៉ឺនដុល្លារផងដែរ។

អតីតប្រធានាធិបតីឥណ្ឌូនេស៊ីលោក ចូកូ វីដូដូ បានអំពាវនាវកាលពីខែធ្នូ ឱ្យប្រជាជន«គោរពដំណើរការច្បាប់របស់គណៈកម្មការ KPK»បន្ទាប់ពីប៉ូលិសបានចាប់ខ្លួនជនសង្ស័យមួយចំនួនពាក់ព័ន្ធនឹងករណីពុករលួយនៅប្រទេសនេះ៕

អត្ថបទ៖ សុខ ជា