បើតាមអះអាងរបស់ប្រធានសមាគមអ្នកចិញ្ចឹមសត្វកម្ពុជា អ្នកចិញ្ចឹមជ្រូក ឬគោអាចទទួលបានប្រាក់ចំណេញលុះត្រាតែ តម្លៃជ្រូក ឬគោរស់អាចហក់ឡើងដល់ជាង១ម៉ឺនរៀលក្នុងមួយគីឡូក្រាម។ តម្លៃសត្វរស់ធ្លាក់ថ្លៃបាននិងកំពុងក្លាយជាប្រធានបទក្តៅមួយ ដែលត្រូវបានលើកយកមកជជែក និងតាមដានយ៉ាងយកចិត្តក្នុងស្រទាប់មហាជន និងមន្ត្រីជំនាញនៃក្រសួង-ស្ថាប័នពាក់ព័ន្ធ។
បច្ចុប្បន្នតម្លៃជ្រូករស់បានរើបឡើងបន្តិចដល់៧,៥០០រៀលក្នុងមួយគីឡូក្រាម ខណៈកាលពីប៉ុន្មានខែមុនតម្លៃជ្រូករស់នៅកម្ពុជាបានធ្លាក់ថ្លៃរហូតដល់ជាង៥ពាន់រៀលទៅ៦ពាន់រៀលក្នុងមួយគីឡូក្រាម ដែលបង្ខំឱ្យអ្នកចិញ្ចឹមជ្រូកខាតតូចមួយចំនួនត្រូវផ្អាកឬបោះបង់ការចិញ្ចឹម ខណៈកសិដ្ឋានខ្នាតធំបន្ថយបរិមាណចិញ្ចឹមដោយសារមិនអាចទប់នឹងការខាតបាន។ បើតាមការអះអាងរបស់ថ្នាក់ដឹកនាំសមាគមអ្នកចិញ្ចឹមសត្វនិងអ្នកចិញ្ចឹមជ្រូក តម្លៃនេះមិនទាន់អាចផ្តល់ប្រាក់ចំណេញដល់អ្នកចិញ្ចឹមបាបនៅឡើយទេ ពោលគឺគ្រាន់តែជួយកាត់បន្ថយការខាតបានបន្តិចតែប៉ុណ្ណោះ។
លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជាបានអះអាងថា ដើម្បីឱ្យអ្នកចិញ្ចឹមជ្រូក ឬគោអាចទទួលបានប្រាក់ចំណេញបាន លុះត្រាតែជ្រូករស់អាចលក់បានតម្លៃចន្លោះពី១ម៉ឺនរៀលទៅ១ម៉ឺន១ពាន់រៀលក្នុងមួយគីឡូក្រាម ខណៈគោរស់អាចលក់បានតម្លៃចាប់ពី១ម៉ឺន២ពាន់រៀលក្នុងមួយគីឡូក្រាមឡើងទៅ ព្រោះការចិញ្ចឹមជ្រូកកសិករត្រូវចំណាយថ្លៃដើមចន្លោះពី៨ពាន់ទៅជាង៩ពាន់រៀលក្នុងមួយគីឡូក្រាម និងចិញ្ចឹមគោត្រូវចំណាយចន្លោះពី១ម៉ឺនទៅ១ម៉ឺន១ពាន់រៀលក្នុងមួយគីឡូក្រាម។
អត្ថបទគួរអាន
ដូច្នេះប្រសិនបើជ្រូក ឬគោរស់លក់បានតម្លៃក្រោមថ្លៃដើមនេះ នោះអ្នកចិញ្ចឹមសត្វនៅតែប្រឈមនឹងការខាតដដែល។ បើតាមការវាយតម្លៃរបស់ប្រធានសមាគមរូបនេះ នៅក្នុងអំឡុងពេលជ្រូករស់ធ្លាក់ថ្លៃខ្លាំង កសិករត្រូវប្រឈមនឹងការខាតចន្លោះពី៥០ដុល្លារទៅ៦០ដុល្លារក្នុងមួយក្បាល។
ស្រដៀងគ្នានេះ លោកស្រី ប៉ន វុទ្ធី ម្ចាស់កសិដ្ឋានចិញ្ចឹមជ្រូកមួយកន្លែងនៅក្រុងតាខ្មៅ បានអះអាងថា តម្លៃជ្រូករស់បច្ចុប្បន្ន៧,៥០០រៀល ក្នុងមួយគីឡូក្រាម មិនទាន់អាចផ្តល់ប្រាក់ចំណេញដល់លោកស្រីនៅឡើយទេ ពោលគឺនៅតែប្រឈមនឹងការខាតដដែល គ្រាន់តែខាតតិចជាងមុន។ សម្រាប់ម្ចាស់កសិដ្ឋានរូបនេះ ការចិញ្ចឹមជ្រូករបស់លោកស្រីអាចទទួលប្រាក់ចំណេញបាន លុះត្រាតែតម្លៃជ្រូករស់អាចឡើងដល់៩ពាន់រៀលទៅ៩ពាន់៥រយរៀលក្នុងមួយគីឡូក្រាម។ លោកស្រី អះអាងថា នៅអំឡុងពេលជ្រូកធ្លាក់ខ្លាំងដល់ជាង៥ពាន់ទៅ៦ពាន់រៀលក្នុងមួយគីឡូក្រាម ការលក់ជ្រូករបស់លោកស្រី បានខាតបង់ចន្លោះពី២០ម៉ឺនទៅ២៤ម៉ឺនរៀលក្នុងជ្រូកមួយក្បាល។
យើងសង្កេតឃើញថា នៅមួយរយៈចុងក្រោយនេះតម្លៃជ្រូករស់ និងគោរស់នៅកម្ពុជាបានធ្លាក់ថ្លៃយ៉ាងគំហុក ក្នុងនោះជ្រូករស់បានធ្លាក់ថ្លៃដល់ជាង៥ពាន់រៀលទៅ៦ពាន់រៀលក្នុងមួយគីឡូក្រាម ខណៈគោរស់បានធ្លាក់ថ្លៃមកនៅចម្លោះពី៧ពាន់រៀលទៅ៨ពាន់រៀលក្នុងមួយគីឡូក្រាម។ ការធ្លាក់ថ្លៃសត្វរស់នេះបានធ្វើឱ្យកសិករចិញ្ចឹមជ្រូកខាតតូច ដែលជាសមាជិករបស់សមាគមអ្នកចិញ្ចឹមសត្វកម្ពុជាប្រមាណ៩០%បានបោះបង់ការចិញ្ចឹម ខណៈកសិដ្ឋានចិញ្ចឹមខ្នាតធំបានកាត់បន្ថយបរិមាណចិញ្ចឹម។
ទោះបីតម្លៃសត្វរស់មានការធ្លាក់ថ្លៃ តែតម្លៃសាច់ជ្រូកនិងសាច់គោ ដែលដាក់លក់នៅលើទីផ្សារមិនមានការធ្លាក់ចុះគួរឱ្យកត់សម្គាល់នោះទេ ពោលគឺតម្លៃនៅតែស្ថិតក្នុងកម្រិតមួយខ្ពស់ដដែល។ យ៉ាងណាក៏ដោយ ដើម្បីជួយកាត់បន្ថយផលប៉ះពាល់ដល់ប្រជាពលរដ្ឋ និងលើកកម្ពស់ទីផ្សារសត្វរស់នៅកម្ពុជា ដែលកំពុងមានការធ្លាក់ចុះឱ្យមានភាពល្អប្រសើរឡើងវិញ រាជរដ្ឋាភិបាលកម្ពុជា សម្រចផ្អាកមិនឱ្យមានការនាំចូលសាច់បង្កកប្រភេទគ្រឿងក្នុងបណ្ដោះអាសន្នរយៈពេល៦ខែ ពោលគឺចាប់ពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤។ ប៉ុន្ដែ វិធានការនេះមិនអនុវត្តចំពោះគម្រោងវិនិយោគមានលក្ខណៈសម្បត្តិគ្រប់គ្រាន់សម្រាប់ជាធាតុចូលផលិតកម្មសម្រាប់ការនាំចេញឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
