ត្រូវបានរៀបចំឡើងដោយក្រសួងការពារជាតិវៀតណាម ពិព័រណ៍អន្តរជាតិវិស័យការពារជាតិវៀតណាមឆ្នាំ២០២២ បានចាប់ផ្តើមធ្វើឡើងនៅព្រឹកថ្ងៃព្រហស្បតិ៍ទី៨ខែធ្នូ នៅអាកាសយានដ្ឋាន ង៉ៃ ឡាម(Gia Lam) ដែលជាអាកាសយានដ្ឋានយោធា មានទីតាំងនៅទីក្រុងហាណូយ ដោយមានក្រុមហ៊ុនអ្នកចូលរួមតាំងបង្ហាញនៅក្នុងពិព័រណ៍ប្រមាណ១៧០ មកពី៣០ប្រទេស។
ពិព័រណ៍លើកដំបូងរបស់វៀតណាមនេះ ធ្វើឡើងរយៈពេល៣ថ្ងៃពីថ្ងៃព្រហស្បតិ៍ដល់ថ្ងៃសៅរ៍ចុងសប្តាហ៍។ ព្រឹត្តិការណ៍ដំធំនេះផងដែរ ដំបូងឡើយគ្រោងធ្វើឡើងនៅឆ្នាំ២០២០ ប៉ុន្តែត្រូវបានពន្យារពេលដោយសារជំងឺរាតត្បាតកូវីដ១៩។ បន្ទាប់ពីនេះ រដ្ឋាភិបាលក្រុងហាណូយគ្រោងរៀបចំព្រឹត្តិការណ៍នេះរៀងរាល់ពីរឆ្នាំម្តងផងដែរ។
ព្រឹត្តិការណ៍នៅក្នុងឆ្នាំនេះ គេសង្កេតឃើញមានក្រុមហ៊ុនផលិតអាវុធធំៗមកចូលរួមដាក់បង្ហាញផលិតផលរបស់ខ្លួនក្នុងនោះមានដូចជា ក្រុម JSC Rosoboronexport របស់រុស្ស៊ី, ក្រុមហ៊ុន Lockheed Martin របស់អាមេរិក ក្រុម Airbus របស់អឺរ៉ុប ក្រុមហ៊ុន BrahMos Aerospace របស់ឥណ្ឌា និងក្រុមហ៊ុន Mitsubishi របស់ជប៉ុន។ ប៉ុន្តែគេមិនឃើញមានក្រុមហ៊ុនមកពីប្រទេសចិនឡើយ។
ឧត្តមសេនីយ៍ឯក ង្វៀន វៀតហុង(Nguyen Viet Hung) ស្នងការរងនយោបាយទទួលបន្ទុកឧស្សាហកម្មការពារជាតិវៀតណាមប្រាប់អ្នកយកព័ត៌មានថា គោលបំណងនៃពិព័រណ៍នេះ គឺដើម្បីពង្រឹង និងពង្រីកកិច្ចសហប្រតិបត្តិការអន្តរជាតិ និងការទូតលើវិស័យការពារជាតិ កសាងទំនុកចិត្តរវាងវៀតណាម និងប្រទេសនានា។ លោកក៏បានបង្ហើបពីចេតនារបស់វៀតណាមក្នុងការកាត់បន្ថយការពឹងផ្អែកទិញអាវុធពីរុស្ស៊ីផងដែរ។
អត្ថបទគួរអាន
គួរជម្រាបថា វៀតណាមបានពឹងផ្អែកលើសព្វាវុធរបស់រុស្ស៊ីជាង៧០% នៃសព្វាវុធដែលបាននាំចូលសរុបរបស់ខ្លួន ហើយសម្ភារៈធន់ធ្ងន់ភាគច្រើនដែលវៀតណាមមាន គឺសុទ្ធសឹងជាផលិតផលរបស់ប្រទេសរុស្ស៊ី។ ប្រទេសទាំងពីរបានរក្សាទំនាក់ទំនងការពារជាតិយ៉ាងជិតស្និទ្ធចាប់តាំងពីសម័យសហភាពសូវៀត និងជំនាន់សង្រ្គាមត្រជាក់ នៅពេលដែលទីក្រុងម៉ូស្គូបានផ្តល់ការគាំទ្រដល់វៀតណាមខាងជើង ក្នុងសង្គ្រាមវៀតណាម។
ទិន្នន័យពីវិទ្យាស្ថានស្រាវជ្រាវសន្តិភាពអន្តរជាតិ ស្តុកហម(Stockholm) បង្ហាញថា ការពឹងផ្អែកវិស័យសព្វាវុធរបស់ទីក្រុងហាណូយលើប្រទេសរុស្ស៊ីបានចាប់ផ្តើមផ្លាស់ប្តូរក្នុងប៉ុន្មានឆ្នាំថ្មីៗនេះ។ ជាក់ស្តែងនៅ៥ឆ្នាំចុងក្រោយ ការពឹងផ្អែករបស់ហាណូយលើម៉ូស្គូ ធ្លាក់ចុះមកនៅក្រោម ៦០% គិតត្រឹមឆ្នាំ២០២១ ខណៈសហរដ្ឋអាមេរិក និងកូរ៉េខាងត្បូងបានលេចមុខជាអ្នកផ្គត់ផ្គង់របស់វៀតណាមជាលើកដំបូងចាប់ពីឆ្នាំ២០១៧ ពោលគឺនៅមួយឆ្នាំបន្ទាប់ពីទីក្រុងវ៉ាស៊ីនតោនបានលុបចោលការហាមឃាត់ការលក់អាវុធទៅទីក្រុងហាណូយ។ ទោះជាយ៉ាងណាក៏ដោយ សម្ភារៈយោធាដែលវៀតណាមកំពុងដាក់ពង្រាយប្រើប្រាស់ នៅតែមិនទាន់អាចជំនួសផលិតផលរបស់រុស្ស៊ីបាន។
កាលពីខែមីនាឆ្នាំនេះ វៀតណាមបានបោះឆ្នោតអនុប្បវាទក្នុងមហាសន្និបាតអង្គការសហប្រជាជាតិលើការថ្កោលទោសរុស្ស៊ីជុំវិញការឈ្លានពានអ៊ុយក្រែន។ ក្រោយមកនៅខែមេសា វៀតណាមបានបោះឆ្នោតប្រឆាំង ចំពោះសំណើព្យួររុស្ស៊ីពីក្រុមប្រឹក្សាសិទ្ធិមនុស្សអង្គការសហប្រជាជាតិ។ ទោះយ៉ាងណា ខណៈការរិះគន់ពីអន្តរជាតិប្រឆាំងនឹងរុស្ស៊ីកើនឡើង ការទិញអាវុធរបស់វៀតណាមអាចនឹងមិនមានស្ថិរភាពដូចពីមុនឡើយ។
គួរកត់សម្គាល់ដែរថា វៀតណាមបានបង្កើនកិច្ចសហការឧស្សាហកម្មយោធាជាមួយកូរ៉េខាងត្បូងផងដែរ កាលពីពេលថ្មីនេះ នៅស្របពេលដែលកូរ៉េខាងត្បូងបានវ៉ាដាច់ប្រទេសចិន ក្លាយជាអ្នកនាំចេញសព្វាវុធទៅក្រៅប្រទេសច្រើនជាងគេលំដាប់ទី៤ពិភពលោក៕
