នេះបើតាមការចុះផ្សាយដោយទីភ្នាក់ងារយ៉ុនហាប់។ លោក ឆូ យុន ដុង (Cho Hyun-dong) ឯកអគ្គរដ្ឋទូតកូរ៉េខាងត្បូង នៅសហរដ្ឋអាមេរិក បានប្រាប់អ្នកសារព័ត៌មានថា នៅពេលដែលការគំរាមកំហែងរបស់កូរ៉េខាងជើងកំពុងលេចចេញជារូបរាងនោះ ការពិភាក្សាសម្រាប់កិច្ចប្រជុំដំបូងរបស់ក្រុមពិគ្រោះយោបល់នុយក្លេអ៊ែរ (NCG) ដែលព្រមព្រៀងគ្នារវាងដោយកូរ៉េខាងត្បូង និងសហរដ្ឋអាមេរិក កំពុងដំណើរការ។ លោកបានបន្ថែមទៀតថា ជាពិសេសប្រទេសសម្ព័ន្ធមិត្តទាំងពីរកំពុងចែករំលែកព័ត៌មាន និងពិភាក្សាអំពីវិធានការរារាំងនៅគ្រប់កម្រិត ចាប់តាំងពីពេលដែលប្រទេសកូរ៉េខាងជើងបានប្រកាសអំពីការបាញ់បង្ហោះយានអវកាសជាលើកទីពីរក្រោយពីបរាជ័យក្នុងការបង្ហោះផ្កាយរណបឈ្លបយកការណ៍កាលពីខែឧសភា។
អត្ថបទគួរអាន
គួររំលឹកឡើងវិញថា សេចក្តីថ្លែងការណ៍វ៉ាស៊ីនតោនត្រូវបានចុះហត្ថលេខាដោយប្រធានាធិបតី យូន ស៊ុក យើល និងប្រធានាធិបតីសហរដ្ឋអាមេរិក លោក ចូ បៃដិន ក្នុងអំឡុងពេលកិច្ចប្រជុំកំពូលទ្វេភាគីនៅខែមេសាកន្លងទៅ។ ក្រោមសេចក្តីប្រកាសនេះ សហរដ្ឋអាមេរិកបានបញ្ជាក់អំពីការប្តេជ្ញាចិត្តរបស់ខ្លួនជាថ្មី ក្នុងការផ្តល់នូវមធ្យោបាយទប់ស្កាត់កាំជ្រួចកូរ៉េខាងជើងបន្ថែមទៀត ឱ្យកូរ៉េខាងត្បូង រួមទាំងការប្រើប្រាស់នុយក្លេអ៊ែរផង ដើម្បីជួយការពារសម្ព័ន្ធមិត្តកូរ៉េខាងត្បូង។
មន្ត្រីក្រុងសេអ៊ូលបាននិយាយកាលពីមុនថា កិច្ចប្រជុំដំបូងរបស់ក្រុមការងារពិគោះយោបល់នុយក្លេអ៊ែរ (NCG) នេះ អាចត្រូវបានធ្វើឡើងតាំងពីដើមខែមិថុនានេះម្ល៉េះ ប៉ុន្តែរហូតមកដល់ចុងខែហើយ កិច្ចប្រជុំដំបូងរបស់ក្រុមការងារនេះមិនទាន់បានកើតឡើងនៅឡើយទេ។
មន្ត្រីសហរដ្ឋអាមេរិកបានគូសបញ្ជាក់ថា ក្រុមការងារពិគ្រោះយោបល់នុយក្លេអ៊ែរ នឹងអនុញ្ញាតឱ្យទីក្រុងសេអ៊ូលផ្តល់នូវធាតុចូលមួយចំនួនអំពីរបៀបដែលសហរដ្ឋអាមេរិកគួរតែរៀបចំផែនការ គ្រប់គ្រង ឬសូម្បីតែអនុវត្តវិធានការទប់ស្កាត់នុយក្លេអ៊ែរ នៅពេលត្រូវប្រឈមុខជាមួយនឹងការគំរាមកំហែងនុយក្លេអ៊ែរដែលបង្កឡើងដោយកូរ៉េខាងជើង៕
