លើសពីនេះទៀត សមាជិកសភាម៉ាឡេស៊ីដែលមានវ័យ ៩៦ឆ្នាំរូបនេះ ក៏បាននិយាយលើកឡើងចំៗដែរថា វប្បធម៌ពុករលួយក៏កំពុងកើតមានឡើងវិញដែរ នៅក្នុងជួរអ្នកនយោបាយម៉ាឡេស៊ី។ លោក មហាធៀ បន្ថែមទៀតថា មុខតំណែងមិនសំខាន់នៅក្នុងជួរដ្ឋាភិបាលត្រូវបានគេបង្កើតឡើង ដើម្បីផ្ដល់ឋានៈ និងលាភសក្ការៈ ហើយបញ្ហាទាំងនេះ នឹងកើតឡើងកាន់តែច្រើនថែមទៀតនៅពេលខាងមុខ ដែលនឹងបង្កឲ្យមានសម្ពាធទៅលើការចំណាយរបស់រាជរដ្ឋាភិបាល និងបំណុលជាតិផងដែរ។ លោក មហាធៀ បានអះអាងឡើងយ៉ាងដូច្នេះ នៅអំឡុងថ្ងៃទី២ នៃកិច្ចប្រជុំពិភាក្សាដេញដោលអំពីកញ្ចប់ថវិកាឆ្នាំ២០២២ នៅក្នុងសភាកាលពីថ្ងៃអង្គារសប្ដាហ៍នេះ។
គួររំឭកថា ថ្មីៗនេះ រដ្ឋមន្ត្រីក្រសួងហិរញ្ញវត្ថុម៉ាឡេស៊ី លោក តេងគូ បានបង្ហាញនូវកញ្ចប់ថវិកាចំណាយឆ្នាំ២០២២ ដែលមានទំហំទឹកប្រាក់ដល់ទៅជាង៨០ពាន់លានដុល្លារអាមេរិក ដែលវាគឺជាកញ្ចប់ថវិកាចំណាយដ៏ធំបំផុតមិនធ្លាប់មានរបស់ប្រទេសម៉ាឡេស៊ី ខណៈកាលពីឆ្នាំ២០២១ កញ្ចប់ថវិការនេះមានត្រឹមតែជាង ៧០ពាន់លានដុល្លារអាមេរិកប៉ុណ្ណោះ។ ទន្ទឹមនឹងនោះ រដ្ឋាភិបាលម៉ាឡេស៊ីក៏បានព្យាករទុកថា ប្រាក់ចំណូលរដ្ឋាភិបាលនឹងមានជាង ៥៦ពាន់លានដុល្លារអាមេរិកផងដែរនៅឆ្នាំ២០២២។
ទោះយ៉ាងណា លោក មហាធៀបានព្រមានថា ការចំណាយមានជាច្រើនជាងចំណូលដែលបានព្យាករទុកនេះ គឺជាសញ្ញាមួយដែលបង្ហាញថា រដ្ឋាភិបាលម៉ាឡេស៊ី នឹងមានបំណងបង្កើនបំណុលជាតិបន្ថែមទៀត ខណៈដែលបច្ចុប្បន្ន រដ្ឋាភិបាលមានបំណុលសរុបជាង ២៤០ពាន់លានដុល្លារអាមេរិករួចទៅហើយ។ យ៉ាងណាមិញ កាលពីខែមុននេះ សភាជាន់ទាបរបស់ម៉ាឡេស៊ី ទើបតែបានអនុម័តបង្កើនពិដានបំណុលដោយកំណត់ឲ្យមាននៅត្រឹមអត្រា ៦៥%នៃទំហំ GDP របស់ប្រទេស ខណៈកាលពីឆ្នាំ២០២០មានត្រឹមតែ ៦០%ប៉ុណ្ណោះ។ ការបង្កើនការខ្ចីបំណុលនេះ គឺជាផ្នែកមួយដើម្បីយកថវិកាទាំងនោះ មកទប់ទល់នឹងការដួលរលំនៃសេដ្ឋកិច្ច ដែលបណ្ដាលមកពីវិបត្តិកូវីដ១៩។អត្ថបទគួរអាន
សូមបញ្ជាក់ថា កាលពីឆ្នាំមុន លោក ណាជីប រ៉ាហ្សាក់ អតីតនាយករដ្ឋមន្ត្រីម៉ាឡេស៊ី ក៏ធ្លាប់ត្រូវបានគេរកឃើញថា មានជាប់ពាក់ព័ន្ធនឹងអំពើពុករលួយ និងការលាងលុយកង្វក់នៅក្នុងក្រុមហ៊ុន 1MDB ដែលជាក្រុមហ៊ុនគ្រប់គ្រងមូលនិធិរដ្ឋផងដែរ ហើយករណីនេះ ត្រូវបានលោក មហាធៀ លើកយកមកធ្វើជាឧទាហរណ៍ជាក់ស្ដែង សម្រាប់រដ្ឋាភិបាលម៉ាឡេស៊ីបច្ចុប្បន្ន ត្រូវស្វែងយល់កុំឲ្យដើរខុសទៀត។
ជាចុងក្រោយ នយោបាយចាស់វស្សារបស់ម៉ាឡេស៊ីរូបនេះ ក៏បានអំពាវនាវដល់រដ្ឋាភិបាលឲ្យពិនិត្យឡើងវិញចំពោះកញ្ចប់ថវិកាជាតិឆ្នាំ២០២២នេះ និងពិចារណាឡើងវិញទៅលើការចំណាយដែលមានច្រើនលើសលុបនេះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
