បញ្ហាភាពតានតឹងដ៏អូសបន្លាយផ្នែកភូមិសាស្ត្រនយោបាយ នៅតំបន់មជ្ឈិមបូព៌ា និងសង្គ្រាមរុស្ស៊ី-អ៊ុយក្រែន គួបផ្សំនឹងគ្រោះរញ្ជួយដីដ៏កំណាចថ្មីៗនេះ នៅកោះតៃវ៉ាន់ បានជំរុញឱ្យតម្រូវការមាសហក់ឡើងខ្ពស់បំផុតមិនធ្លាប់មាន ជាពិសេសនៅទីផ្សារអាស៊ី។
ទន្ទឹមនេះ តម្រូវការមាសក៏បានកើនឡើងដោយការធ្លាក់ថ្លៃខ្លាំងនៃប្រាក់ដុល្លារផងដែរ ស្របពេលដែលក្រុមមន្ត្រីនៃធនាគារកណ្តាលអាម៉េរិក (Federal Reserve) បានគូសបញ្ជាក់ជាថ្មីថា ធនាគារកណ្តាលអាម៉េរិកទំនងជានឹងចាត់វិធានការបញ្ចុះអត្រាការប្រាក់នៅក្នុងឆ្នាំ២០២៤ នេះ ទោះបីជាពួកគេបានផ្តល់សញ្ញាតិចតួចអំពីពេលវេលាលាក់ជាក់នៃការបញ្ចុះអត្រាការប្រាក់នេះយ៉ាងណាក្ដី។
ហាងឆេងមាសដុំបានហក់ឡើងខ្ពស់បំផុតមិនធ្លាប់មានរហូតដល់២,៣០២ដុល្លារ ក្នុងមួយអោន (Ounce) ឬ៣,០៧០ដុល្លារក្នុងមួយតម្លឹងនៅក្នុងការជួញដូរនៅក្នុងតំបន់អាស៊ី នាថ្ងៃព្រហស្បតិ៍ ទី៤ ខែមេសា នេះ។ ហាងឆេងមាសបានហក់ឡើងថ្លៃស្របពេលដែលប្រាក់ដុល្លារធ្លាក់ថ្លៃ ខណៈដែលវិធានការបញ្ចុះអត្រាការប្រាក់របស់ធនគារកណ្ដាលអាម៉េរិក នៅតែស្ថិតក្នុងភាពមិនច្បាស់លាស់។ ដូចនេះ ស្ថានភាពហាងឆេងមាសនៅលើទីផ្សារអន្តរជាតិនឹងប្រែប្រួលបែបណាទៀត នឹងអាស្រ័យលើតម្រុយបន្ថែមទៀត ជុំវិញការបញ្ចុះអត្រាការប្រាក់របស់ធនាគារកណ្ដាលអាម៉េរិក៕
ដោយ: តែម សុខុម
