តម្លៃដុំមាសនៅទីផ្សារប្រទេសវៀតណាម ហក់ឡើងដល់ជិតដល់៣ពាន់២រយដុល្លារអាម៉េរិកក្នុងមួយតម្លឹង

តម្លៃដុំមាសរបស់ក្រុមហ៊ុនគ្រឿងអលង្ការសៃហ្គន (Saigon Jewelry Company) ដែលជាក្រុមហ៊ុនលក់មាស និងគ្រឿងអលង្ការដ៏ធំមួយនៅប្រទេសវៀតណាម បានហក់ឡើងតិចតួចក្នុងអត្រា០,០៦%កាលពីព្រឹកថ្ងៃអង្គារ ទី២០ ខែកុម្ភៈ ឈានដល់៣ពាន់១៧៧ដុល្លារអាម៉េរិក ក្នុងមួយតម្លឹង។ ទោះជាយ៉ាងណា តម្លៃមាសជាគ្រឿងអលង្ការ រួមមាន ចិញ្ចៀនមាសជាដើម បានធ្លាក់ថ្លៃបន្តិចក្នុងអត្រា០,៣១%​ មកនៅត្រឹម២ពាន់៦៣០ដុល្លារអាម៉េរិក ក្នុងមួយតម្លឹង។

យោងតាមវេបសាយទិន្នន័យហិរញ្ញវត្ថុ អេហ្វអ៊ិចស្ទ្រីត (FXStreet) បង្ហាញថា តម្លៃមាសជាសកលបានធ្លាក់ថ្លៃបន្តិចកាលពីថ្ងៃអង្គារ មកនៅត្រឹម២ពាន់១៨ដុល្លារ ក្នុងមួយអោន (Ounce) ឬ២ពាន់៧០០ដុល្លារ ក្នុងមួយតម្លឹងអំឡុងម៉ោងជួញដូរនៅអាស៊ី។

ជាទូទៅតម្លៃមាសប្រឈមនឹងសម្ពាធនៅពេលដែលប្រាក់ដុល្លារអាម៉េរិក ហក់ឡើងថ្លៃ ដែលភាគច្រើនដោយសារកំណើនទិន្នផលសញ្ញាប័ណ្ណ ឬមូលបត្របំណុលរបស់សហរដ្ឋអាម៉េរិក។ ការកើនឡើងនៃទិន្នផលសញ្ញាប័ណ្ណ ឬមូលបត្របំណុលនេះបានដាក់សម្ពាធលើទ្រព្យសកម្មនានាដូចជាមាសជាដើម៕

ដោយ: តែម សុខុម