សារព័ត៌មាន ស៊ីអិនប៊ីស៊ី របស់អាមេរិក បានចុះផ្សាយដោយដកស្រង់សម្ភាសន៍ជាមួយប្រធានក្រុមហ៊ុនជួលយន្តហោះឯកជនមួយ ឈ្មោះ JetSetGo ថា ក្នុងរយៈពេលប៉ុន្មានសប្ដាហ៍ចុងក្រោយនេះ ការកក់ជួលយន្តហោះឯកជន បានកើនឡើង ៩០០% ដោយក្នុងនោះ អតិថិជន ពី ៧០% ទៅ ៨០% គឺជាគ្រួសារដែលមានជីវភាពលើមធ្យម ជាជាងអតិថិជនដែលមានទ្រព្យស្ដុកស្ដម្ភខ្លាំង ។
ដំបូងៗ គេឃើញមានតែមហាសេដ្ឋី អ្នកមានស្ដុកស្ដម្ភ និងតារាភាពយន្តបូល្លីវូដប៉ុណ្ណោះ ដែលនាំគ្នាចាកចេញពីប្រទេសឥណ្ឌាទៅកាន់ប្រទេសក្រៅក្បែរខាង ខណៈដែលឥណ្ឌាកំពុងជួបវិបត្តិធ្ងន់ធ្ងរនៃការឆ្លងរាលដាលជំងឺកូវីដ-១៩ ។
ប៉ុន្តែ ថ្មីៗចុងក្រោយនេះ ក្រុមគ្រួសារឥណ្ឌាដែលមានជីវភាពលើមធ្យម ក៏ត្រូវបានគេឃើញនាំគ្នាប្រមែប្រមូលទ្រព្យដែលខ្លួនមាន ចំណាយទៅលើការរៀបចំការធ្វើដំណើរចាកចេញទៅក្រៅប្រទេសផងដែរ ។
អត្ថបទទាក់ទង
ប្រទេសអាស៊ីខាងត្បូងដែលមានប្រជាជនជិត ១,៤ពាន់លាននាក់នេះ កំពុងប្រយុទ្ធប្រឆាំងនឹងជំងឺកូវីដ-១៩យ៉ាងលំបាកលំបិន ដោយក្នុងមួយថ្ងៃៗ មានអ្នកឆ្លងប្រមាណ ៤សែននាក់ ហើយចំនួនឆ្លងសរុបទូទាំងប្រទេស កើនឡើងដល់ទៅជាង ២៨លាននាក់ហើយ ។
ភាគច្រើននៃអ្នកដែលចាកចេញពីប្រទេសដើម្បីគេចពីកូវីដ-១៩ នាំគ្នាធ្វើដំណើរទៅកាន់កោះ ម៉ាល់ឌីវ (Maldives) ដែលផ្ដល់ការធ្វើចត្តាឡីស័កនៅតាមរមណីយដ្ឋានដាច់ដោយឡែក ឬទៅទីក្រុងឌូបៃ ដែលអនុញ្ញាតឲ្យចូលសម្រាប់តែគោលបំណងធុរកិច្ច ។
បើតាមក្រុមហ៊ុនជួលយន្តហោះឯកជន JetSetGo តម្លៃសំបុត្រមិនបានដំឡើងទេ ទោះបីក្នុងពេលកើនអតិថិជនយ៉ាងគំហុកក្ដី ប៉ុន្តែ សេវានេះក៏មិនមែនថោកដែរ ។
សម្រាប់យន្តហោះមួយដែលអាចជិះបាន ៨នាក់ ថ្លៃធ្វើដំណើរ គឺចន្លោះពី ១៨០០០ដុល្លារអាមេរិក ទៅ ២០០០០ដុល្លារអាមេរិក សម្រាប់ពីឥណ្ឌាទៅកោះម៉ាល់ឌីវ ឬ ៣១០០០ដុល្លារអាមេរិក សម្រាប់យន្តហោះដែលជិះបាន ៦នាក់ ពីឥណ្ឌាទៅទីក្រុងឌូបៃ ។
នៅប្រទេសឥណ្ឌា ចំណូលមធ្យមរបស់ប្រជាជនថ្នាក់មធ្យម ត្រូវគេប៉ាន់ស្មានជារួមថា មានប្រហែល ១៥០០០ដុល្លារអាមេរិក ក្នុងមួយឆ្នាំ ៕
