លោក Widodo បាននិយាយនៅក្នុងបទសម្ភាសន៍មួយថា លោកចង់ឱ្យមានប្រព័ន្ធអេកូឡូស៊ីដ៏ធំសម្រាប់ខ្សែចង្វាក់ផលិតកម្មរថយន្តអគ្គិសនីនៅក្នុងប្រទេសឥណ្ឌូនេស៊ី ជាជាងគ្រាន់តែទាញយកធនធានធម្មជាតិរបស់ខ្លួន ដើម្បីមកផលិតអាគុយរថយន្ដតែមួយមុខ។ យ៉ាងណាមិញ ប្រធានាធិបតី និង មន្ត្រីរដ្ឋាភិបាលជាន់ខ្ពស់របស់ឥណ្ឌូនេស៊ី បានជួបប្រជុំគ្នាកាលពីដើមឆ្នាំនេះ ជាមួយស្ថាបនិកក្រុមហ៊ុន Tesla លោក Elon Musk ម្តងរួចទៅហើយ ដោយបានស្នើឱ្យស្ថាបនិករូបនេះចាត់ទុកប្រទេសអាស៊ីអាគ្នេយ៍មួយនេះ ជាមជ្ឈមណ្ឌលសម្រាប់ការផលិតរថយន្តអគ្គិសនីរបស់ខ្លួន។ ទោះយ៉ាងណា តំណាងក្រុមហ៊ុន Tesla និង ក្រសួងវិនិយោគរបស់ប្រទេសឥណ្ឌូណេស៊ីមិនបានឆ្លើយតបនឹងសំណួរទាក់ទងនឹងវឌ្ឍនភាពនៃការឈានទៅដល់កិច្ចព្រមព្រៀងដ៏មានសក្ដានុពលជាមួយក្រុមហ៊ុន Tesla នោះទេ។
ទោះយ៉ាងណា មន្ត្រីជាន់ខ្ពស់ឥណ្ឌូនេស៊ី ដែលសម្របសម្រួលកិច្ចពិភាក្សាជាមួយក្រុមហ៊ុន Tesla កាលពីដើមខែនេះបានប្រាប់ប្រព័ន្ធផ្សព្វផ្សាយថា ក្រុមហ៊ុនយក្សរបស់អាមេរិកមួយនេះ បានឈានដល់កិច្ចព្រមព្រៀងគិតជាទឹកប្រាក់ប្រហែល ៥ ពាន់លានដុល្លារ ដើម្បីទិញផលិតផលថ្មនីកែលពីក្រុមហ៊ុនរបស់ឥណ្ឌូនេស៊ី ដើម្បីប្រើនៅក្នុងការផលិតអាគុយរថយន្តអគ្គិសនីរបស់ក្រុមហ៊ុន Tesla ។
អត្ថបទគួរអាន
រដ្ឋមន្ត្រីជាន់ខ្ពស់ឥណ្ឌូនេស៊ីរូបនេះបានបន្ថែមថា ក្រសួងនឹងនៅតែបន្តចរចាជាមួយក្រុមហ៊ុន Tesla លើកិច្ចសហប្រតិបត្តិការផ្សេងទៀត ប៉ុន្តែបច្ចុប្បន្ន លោក Elon Musk កំពុងមមាញឹកដោះស្រាយជាមួយបញ្ហាក្នុងស្រុកទាក់ទងនឹងការទិញយកបណ្តាញសង្គម Twitter ដ៏ចម្រូងចម្រាស់។
គួររំឭកថា ក្នុងអំឡុងជំនួបរវាងប្រធានាធិបតីឥណ្ឌូនេស៊ី និង ស្ថាបនិកក្រុមហ៊ុន Tesla កាលពី ខែឧសភាកន្លងទៅ លោក Jokowi ក៏បានអញ្ជើញលោក Elon Musk ឱ្យទៅបំពេញទស្សនកិច្ចនៅប្រទេសឥណ្ឌូនេស៊ីក្នុងខែវិច្ឆិកាឆ្នាំនេះផងដែរ នៅអំឡុងពេលដែលប្រទេសនេះ នឹងធ្វើជាម្ចាស់ផ្ទះក្នុងកិច្ចប្រជុំកំពូលនៃក្រុមប្រទេសរីកចម្រើនទាំង២០ ឬហៅថា G20 ។
គួរជម្រាបថា ក្រុមហ៊ុនដែលបានវិនិយោគ និង បានប្រកាសគម្រោងវិនិយោគរបស់ខ្លួនក្នុងការផលិតរថយន្តអគ្គិសនីក្នុងប្រទេសឥណ្ឌូនេស៊ី បច្ចុប្បន្នរួមមានក្រុមហ៊ុនជប៉ុន Toyota Motor Corp និង Mitsubishi Motors Corp និង Hyundai Motor Group របស់កូរ៉េខាងត្បូងជាដើម៕
