និស្សិតអន្តរជាតិ ចំណាយប្រាក់ជាង៤០ពាន់លានដុល្លារ នៅសហរដ្ឋអាម៉េរិកក្នុង១ឆ្នាំ ខណៈចិនបញ្ចូននិស្សិតទៅរៀននៅអាម៉េរិកច្រើនជាងគេ

កំណើនប្រចាំឆ្នាំនៃការចាយវាយរបស់និស្សិតអន្តរជាតិនេះ គឺជាឆ្នាំលើកទី២ហើយ ហើយការចំណាយទាំងអស់នេះបានរួមបញ្ចូលមិនត្រឹមតែសម្រាប់ថ្លៃសិក្សានៅតាមគ្រឹះស្ថានឧត្តមសិក្សាប៉ុណ្ណោះទេ ប៉ុន្តែវារួមបញ្ចូលទាំងថ្លៃស្នាក់នៅ ថ្លៃដឹកជញ្ជូន ថ្លៃអាហារ និងថ្លៃទំនិញប្រើប្រាស់ក្នុងអំឡុងពេលពួកគេស្នាក់នៅសហរដ្ឋអាម៉េ​រិក ផងដែរ។ សមាគម NAFSA បាននិយាយនៅក្នុងសេចក្តីប្រកាសព័ត៌មានមួយថា នេះគឺជាការរួមចំណែកដ៏មានសារសំខាន់របស់និស្សិតអន្តរជាតិចំពោះសេដ្ឋកិច្ចរបស់សហរដ្ឋអាម៉េរិក ហើយវាគួរឱ្យសរសើរខ្លាំងណាស់ ដែលបានឃើញកំណើនប្រចាំឆ្នាំស​ម្រាប់ឆ្នាំទីពីរជាប់ៗគ្នាបែបនេះ។

និស្សិតអន្តរជាតិជាងមួយលាននាក់ បានចុះឈ្មោះចូលរៀននៅតាមគ្រឹះស្ថានឧត្ដមសិក្សានៅទូទាំងសហរដ្ឋអាម៉េរិក សម្រាប់ឆ្នាំសិក្សា២០២២-២០២៣ កើនឡើង១២% បើធៀបនឹងឆ្នាំសិក្សាមុននោះ។ នេះបើតាមរបាយការណ៍របស់វិទ្យាស្ថានអប់រំអន្តរជាតិ។ ប្រទេសចិន និងឥណ្ឌា បានជាប់ជាប្រទេសដែលបានបញ្ជូននិស្សិតទៅរៀននៅអាម៉េរិកច្រើនជាងគេ ដោយរួមបញ្ចូលគ្នាមានចំនួនសរុបជិត៥៣%។​និស្សិតចិន បានចំណាយប្រាក់ជាង១២ពាន់លានដុល្លារ ដើម្បីចូលរួមចំណែកដល់សេដ្ឋកិច្ចអាម៉េ​រិក ខណៈដែលនិស្សិតឥណ្ឌា បានរួមចំណែកជាង៧ពាន់លានដុល្លារដល់សេដ្ឋកិច្ចអាម៉េរិក។​​ប្រទេសវៀតណាម បានជាប់ចំណាត់ថ្នាក់​​​ទី៥ ជាមួយនឹងចំនួននិស្សិតជាង២ម៉ឺននាក់ និងបានរួមចំណែកប្រមាណ៨១៦លានដុល្លារ ដល់សេដ្ឋកិច្ចអាម៉េរិក នៅឆ្នាំ២០២៣ គឺបានកើនឡើងជាង១១% បើធៀបនឹងឆ្នាំ២០២២៕

អត្ថបទ៖ សុខ ជា