ច្បាប់ដែលទើបតែបានអនុម័តដោយសភាអឺរ៉ុបនៅក្នុងខែកុម្ភៈកន្លងទៅនេះ គឺបានតម្រូវថា នៅត្រឹមឆ្នាំ២០៣៥ ក្រុមហ៊ុនផលិតរថយន្ដ ត្រូវតែកាត់បន្ថយឲ្យបាន ១០០% នៃការបំភាយឧស្ម័នកាបូនឌីអុកស៊ីតចេញពីរថយន្ដថ្មីដែលខ្លួនលក់ ពោលគឺ ក្រុមហ៊ុននឹងមិនអាចលក់រថយន្ដថ្មីដែលប្រើប្រាស់ប្រេងឥន្ធនៈ នៅក្នុងប្រទេសទាំង២៧ នៃសមាជិកសហភាពអឺរ៉ុបបានឡើយនៅត្រឹមឆ្នាំ២០៣៥។
ជុំវិញវិធានការច្បាប់នេះដែរ រដ្ឋមន្ត្រីក្រសួងថាមពលរបស់អ៊ីតាលី គឺលោក Gilberto Pichetto Frantin បាននិយាយនៅក្នុងសេចក្ដីថ្លែងការណ៍ថា នៅក្នុងកិច្ចប្រជុំឯអគ្គរដ្ឋទូតនៃប្រទេសសហភាពអឺរ៉ុប នៅទីក្រុងព្រុចស៊ែល ដែលធ្វើឡើងនៅក្នុងមីនានេះ ប្រទេសអ៊ីតាលី នឹងបញ្ជាក់ពីគោលជំហររបស់ខ្លួនប្រឆាំងនឹងបទប្បញ្ញត្តិរបស់អឺរ៉ុប ដែលបានស្នើឡើង ក្នុងការហាមឃាត់ការផលិត និងលក់រថយន្ដប្រភេទគ្រួសារ និងរថយន្ដដឹកទំនិញ ដែលប្រើប្រាស់ប្រេងឥន្ធនៈនៅក្នុងឆ្នាំ២០៣៥ខាងមុខនោះ។
អត្ថបទគួរអាន
រដ្ឋមន្ត្រីថាមពលរបស់អ៊ីតាលីរូបនេះ បានគូសបញ្ជាក់ទៀតថា សម្រាប់ប្រទេសអ៊ីតាលី គឺជឿថា ជម្រើសប្រើប្រាស់រថយន្ដអគ្គិសនី នឹងមិនអាចជាមធ្យោបាយតែមួយគត់ នៅក្នុងការសម្រេចបាននូវការគ្មានការបំភាយឧស្ម័នកាបូនឌីអុកស៊ីតនោះទេ។
មែនទែនទៅ ប្រទេសហភាពអឺរ៉ុប បានយល់ព្រមនៅលើកិច្ចព្រមព្រៀង ហាមឃាត់លើការផលិត និងប្រើប្រាស់រថយន្ដប្រើប្រេងឥន្ធនៈតាំងពីខែតុលាឆ្នាំមុនមកម្ល៉េះ ប៉ុន្ដែ វានៅត្រូវការការសម្រេចបោះត្រាចុងក្រោយ មុននឹងត្រូវចូលជាធរមាន ហើយការសម្រេចអនុម័តចុងក្រោយលើកិច្ចព្រមព្រៀងនេះ ត្រូវបានរំពឹងថានឹងធ្វើឡើងក្នុងខែមីនានេះ។
រដ្ឋាភិបាលអ៊ីតាលី ធ្លាប់និយាយកាលពីសប្ដាហ៍មុនថា ខ្លួនចង់សហការជាមួយនឹងប្រទេសបារាំង និងអាល្លឺម៉ង់ ដើម្បីប្រើប្រាស់ឥទ្ធិពល និងពន្យឺតល្បឿនៃច្បាប់របស់សហភាពអឺរ៉ុបចំពោះការកាត់បន្ថយការបំភាយឧស្ម័នកាបូនឌីអុកស៊ីតចេញពីរថយន្ដតូចៗ និងរថយន្ដដឹកទំនិញនេះផងដែរ៕
