លោក អ៊ីស្មែល សាព្រី នាយករដ្ឋមន្ត្រីម៉ាឡេស៊ីបានថ្លែងតាមទូរទស្សន៍ជាតិកាលពីរសៀលថ្ងៃចន្ទទី១០ តុលាថា លោកសូមលើកទឹកចិត្តឱ្យរដ្ឋាភិបាលតាមរដ្ឋទាំងអស់លើកលែងតែរដ្ឋាភិបាលនៅរដ្ឋសាបះ (Sabah) រដ្ឋសារ៉ាវ៉ាក (Sarawak) រដ្ឋចូហូ (Johor) និងរដ្ឋមេឡាកា (Melaka) ចេញ គឺត្រូវរំលាយសភាតាមរដ្ឋរបស់ខ្លួននៅកាលបរិច្ឆេទដូចគ្នានឹងការបោះឆ្នោតសកលនៅកម្រិតសហព័ន្ធ បើទោះជារដ្ឋមួយចំនួនបានសម្រេចចិត្តមិនរំលាយសភារបស់ពួកគេក៏ដោយ។
លោក អ៊ីស្មែល សាព្រី បានបន្ថែមថា វាកាន់តែប្រសើរថែមទៀតដែលត្រូវធ្វើការបោះឆ្នោតថ្នាក់រដ្ឋ និងថ្នាក់ជាតិនៅក្នុងពេលតែមួយ ដើម្បីកុំឱ្យប្រជាជនមានបន្ទុកច្រើន និងដើម្បីធានាបានថាដំណើរការលទ្ធិប្រជាធិបតេយ្យមានដំណើរការដោយរលូន និងកាត់បន្ថយការចំណាយ។
ការបោះឆ្នោតត្រូវតែធ្វើឡើងក្នុងរយៈពេល ៦០ ថ្ងៃបន្ទាប់ពីការរំលាយសភា ដែលមានន័យថាការបោះឆ្នោតនាពេលខាងមុខនេះគួរតែធ្វើឡើងនៅថ្ងៃទី០៩ ខែធ្នូ។
អត្ថបទគួរអាន
លោកនាយករដ្ឋមន្ត្រីរូបនេះបាននិយាយថា កាលបរិច្ឆេទសម្រាប់ថ្ងៃតែងតាំង ថ្ងៃបោះឆ្នោត និងបញ្ហាពាក់ព័ន្ធផ្សេងទៀតនឹងត្រូវកំណត់ដោយគណៈកម្មាធិការរៀបចំការបោះឆ្នោត ហើយថា ជាមួយការប្រកាសរំលាយសភានេះ អាណត្តិត្រូវប្រគល់ជូនប្រជាពលរដ្ឋវិញ ដើម្បីជ្រើសរើសអ្នកដឹកនាំដែលគេពេញចិត្ត។ ការផ្ដល់សិទ្ធិឲ្យប្រជាជនបោះឆ្នោត គឺជាថ្នាំបន្សាបដ៏មានឥទ្ធិពលសម្រាប់ប្រទេសនេះ ដើម្បីសម្រេចបាននូវស្ថិរភាពនយោបាយ និងបង្កើតបានរដ្ឋាភិបាលមួយដ៏រឹងមាំ ស្ថិរភាព និងមានការគោរពបន្ទាប់ពីមានការបោះឆ្នោតសកលលើកទី១៥ (GE15)។
នៅក្នុងសេចក្តីថ្លែងការណ៍មួយដែលបានចេញភ្លាមៗបន្ទាប់ពីការប្រកាសរបស់លោក អ៊ីស្មែល សាព្រី កាលពីថ្ងៃទី១០ខែតុលា ព្រះបរមរាជវាំងម៉ាឡេស៊ីបាននិយាយថា ព្រះមហាក្សត្រមិនមានជម្រើសអ្វីក្រៅតែពីទ្រង់យល់ព្រមតាមសំណើរបស់នាយករដ្ឋមន្ត្រីក្នុងការរំលាយសភានោះទេ។
លោក អះម៉ាត់ ហ្វាឌីល សាមស៊ូឌីន (Ahmad Fadil Shamsuddin) អ្នកគ្រប់គ្រងរាជវាំងម៉ាឡេស៊ី អ៊ីស្តាណា ណេហ្ការ៉ា (Istana Negara) បាននិយាយថា ព្រះមហាក្សត្របានសម្តែងការខកចិត្តចំពោះការវិវត្តនយោបាយបច្ចុប្បន្នរបស់ប្រទេសនេះ ហើយព្រះអង្គគ្មានជម្រើសអ្វីក្រៅពីយល់ព្រមតាមសំណើរបស់នាយករដ្ឋមន្ត្រីក្នុងការប្រគល់អាណត្តិរដ្ឋាភិបាលជូនប្រជាពលរដ្ឋជាអ្នកសម្រេចតាមការបោះឆ្នោតវិញ ដើម្បីឱ្យរដ្ឋាភិបាលមានស្ថិរភាព៕
អត្ថបទ៖ សុខ ជា
