ក្រោយកើនឡើងប្រមាណ៥%កាលពីត្រីមាសទី១ឆ្នាំ២០២២ សេដ្ឋកិច្ចម៉ាឡេស៊ីបន្តកើនឡើងដល់ ៨,៩% គិតត្រឹមត្រីមាសទី២ឆ្នាំនេះ ។ ប្រទេសរីកចម្រើនជាងគេមួយក្នុងតំបន់អាស៊ាននេះ ត្រូវបានគេចាត់ទុកជាប្រទេសមួយក្នុងចំណោមប្រទេសសេដ្ឋកិច្ចធំៗផ្សេងទៀតក្នុងតំបន់ ដែលមានកំណើនសេដ្ឋកិច្ចលឿនបំផុតបន្ទាប់ពីងើបដើរចេញពីជំងឺរាតត្បាត។ ក្នុងនោះកំណើនអំឡុងខែមេសាដល់ខែមិថុនាជាកំណើនល្អបំផុតប្រចាំឆ្នាំ។ យោងតាមធនាគារកណ្តាលម៉ាឡេស៊ី បើគេគិតតែក្នុងខែមិថុនាតែមួយប៉ុណ្ណោះ សេដ្ឋកិច្ចបានកើនឡើងរហូតដល់ប្រមាណ ១៧,៥%។
អ្វីដែលគួរឱ្យចាប់អារម្មណ៍បំផុត កំណើនសេដ្ឋកិច្ចម៉ាឡេស៊ីនៅត្រីមាសទី២នេះ បានកើនដល់កំរិតមួយខ្ពស់ជាងការប៉ាន់ស្មានជាមធ្យមរបស់ក្រុមអ្នកសេដ្ឋកិច្ចទៅទៀត ខណៈពួកគេកន្លងមកទស្សនទាយថា នៅត្រីមាសទី២សេដ្ឋកិច្ចម៉ាឡេអាចកើនជាមធ្យម ៦,៧%។ សូម្បីតែការស្ទង់មតិស្រដៀងគ្នាដោយ Bloomberg ក៏ប៉ាន់ស្មានជាត្រឹមកម្រិតមធ្យម ៥%ដែរ។
ក្រោយមើលឃើញពីកំណើនដ៏ភ្ញាក់ផ្អើលនេះ អ្នកសេដ្ឋកិច្ចរំពឹងថា GDP ម៉ាឡេនឹងបន្ដមានកំណើនខ្ពស់ថែមទៀត ដោយសារតែការស្ទុះងើបឡើងវិញយ៉ាងខ្លាំងនៃការចំណាយប្រើប្រាស់ និងការនាំចេញក៏កើនឡើងដែរ។
អត្ថបទគួរអាន
គួរជម្រាបថា សេដ្ឋកិច្ចម៉ាឡេស៊ីកាលពីឆ្នាំ២០២១មានកំណើន ៣,១% ក្រោយការធ្លាក់ចុះអស់ ៥,៦% ក្នុងឆ្នាំ២០២០ ជាពេលដែកូវីដ១៩វាយលុកខ្លាំង។
ទេសាភិបាលធនាគារកណ្តាលម៉ាឡេស៊ីលោកស្រី ណ សាមសៀយ៉ុននូស(Nor Shamsiah Yunus) បាននិយាយក្នុងសន្និសីទសារព័ត៌មាននៅថ្ងៃសុក្រថា វិស័យសេវាកម្ម និងផលិតកម្មគឺជាវិស័យចម្បងដែលដំណើរការបានល្អជាងគេ នៅក្នុងត្រីមាសទីពីរ។ ធនាគារកណ្តាលម៉ាឡេស៊ីបានកំណត់គោលដៅកំណើនសរុបនៅឆ្នាំ២០២២នេះ ក្នុងអត្រា ៥,៣% ទៅ ៦,៣%។ ការកំណត់គោលដៅកំណើននេះ ដោយសារតែមានសុទិដ្ឋិនិយមចំពោះការបន្តពង្រីកតម្រូវការសកល និងការចំណាយខ្ពស់ក្នុងវិស័យឯកជន។
គួររំឭកថា ថ្មីៗនេះមូលនិធិរូបិយវត្ថុអន្តរជាតិ IMF ទើបបានកាត់បន្ថយការព្យាករណ៍កំណើនសេដ្ឋកិច្ចរបស់ម៉ាឡេស៊ីពី ៥,៦% មកត្រឹម ៥,១%ក្នុងឆ្នាំ២០២២។ នេះក៏ដោយសារតែ IMF មើលឃើញពីទស្សនវិស័យសេដ្ឋកិច្ចពិភពលោកដ៏អាប់អួរ និងការកើនឡើងនូវភាពតានតឹងភូមិសាស្ត្រនយោបាយ។ ដូចគ្នានេះ រដ្ឋាភិបាលក្រុងកូឡាឡាំពួរ ក៏បានបង្ហាញក្តីបារម្ភចំពោះកំណើនសេដ្ឋកិច្ចរបស់ខ្លួនដែរ ដោយគេមិនរំពឹងខ្លាំងថា កំណើនអាចមានខ្ពស់រហូតឡើយ ក្រោយមើលឃើញភាពមិនច្បាស់លាស់នៃស្ថានភាពសេដ្ឋកិច្ច និងនយោបាយក្នុងពិភពលោក៕
