ជិត៥ខែដើមឆ្នាំនេះ មានរថយន្តអគ្គិសនីចុះបញ្ជីកើនឡើងជាង ៨០០%

ការប្រើប្រាស់រថយន្តអគ្គិសនីមិនត្រឹមតែជួយកាត់បន្ថយការបញ្ចេញសារធាតុពុលទៅក្នុងបរិយាកាសនោះទេ ថែមទាំងជួយកាត់បន្ថយការចំណាយទ្វេដង បើធៀបនឹង រថយន្តដែលប្រើប្រាស់ប្រេងឥន្ធនៈ ខណៈដែល គោលនយោបាយរបស់រាជរដ្ឋាភិបាល គឺធ្វើយ៉ាងណាជំរុញការប្រើប្រាស់រថយន្តអគ្គិសនីឲ្យបាន៤០% នៅត្រឹមឆ្នាំ២០៣០។

នាកម្មវិធីផ្សាយផ្ទាល់របស់ក្រសួងសាធារណការ និងដឹកជញ្ជូនក្រោមប្រធានបទ «ការប្រើប្រាស់យានយន្តអគ្គិសនី(EV)នៅកម្ពុជា»នៅថ្ងៃទី២៧ ខែឧសភា ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ពីនិន្នាការកើនឡើងនៃការប្រើប្រាស់រថយន្តអគ្គិសនីនៅកម្ពុជានៅប៉ុន្មានខែចុងក្រោយនេះ។ ឯកឧត្តមទេសរដ្ឋមន្ត្រី ស៊ុន ចាន់ថុល អះអាងថា នៅជិត៥ខែ ឆ្នាំ២០២២ មានរថយន្តអគ្គិសនីចំនួន៨៤គ្រឿងបានមកចុះបញ្ជីនៅក្រសួង មានការកើនឡើងជាង៨០០% បើធៀបនឹង៥ខែកាលពីឆ្នាំ២០២១ ដែលមានត្រឹមតែ៩គ្រឿង ហើយបច្ចុប្បន្នមានរថយន្តអគ្គិសនីចំនួន១៨៤គ្រឿងកំពុងចរាចរនៅកម្ពុជា។

ដើម្បីជួយជំរុញកំណើនប្រើប្រាស់យានយន្តអគ្គិសនីនេះ ឯកឧត្តម ស៊ុន ចាន់ថុល បានលើកឡើងថា ក្រសួងកំពុងរៀបចំគោលនយោបាយ និងការគាំទ្រសម្រាប់ការប្រើប្រាស់យានយន្តអគ្គិសនី ដែលផ្តោតលើការបង្កើតឲ្យមានហេដ្ឋារចនាសម្ព័ន្ធបម្រើឲ្យវិស័យនេះ ដូចជាស្ថានីយសាកថ្ម កន្លែងផ្តល់សេវាកម្ម គ្រឿងបន្លាស់ កន្លែងបណ្តុះបណ្តាលបុគ្គលិក និងកន្លែងសម្រាប់ដាក់អាគុយខូចៗជាដើម។ ជាក់ស្តែងមកបច្ចុប្បន្នកម្ពុជាមានស្ថានីយសាកថ្មអគ្គិសនីចំនួន៣ និងគ្រោងដំឡើងនៅរាជធានីភ្នំពេញ និងខេត្តផ្សេងៗជាច្រើនទៀត។

ជាមួយគ្នានេះឯកឧត្តម ស៊ុន ចាន់ថុល ក៏បានគូសបញ្ជាក់ពីអត្ថប្រយោជន៍នៃការប្រើប្រាស់រថយន្តអគ្គិសនី ដោយធៀបនឹងរថយន្តប្រើប្រាស់ប្រេងឥន្ធនៈផងដែរ។ សម្រាប់ ឯកឧត្តម ការប្រើប្រាស់រថយន្តអគ្គិសនីមិនត្រឹមតែជួយកាត់ការបំពុលបរិយាកាសនោះទេ ថែមទៀតអាចជួយកាត់បន្ថយការចំណាយបានយ៉ាងច្រើនទៀតផង។

បន្ថែមលើយន្តការ និងគោលនយោបាយខាងលើ រាជរដ្ឋាភិបាល ក៏នឹងកាត់បន្ថយពន្ធនាំចូលសម្រាប់រថយន្តអគ្គិសនីក្នុងរង្វង់៦០% បើធៀបនឹងការនាំចូលរថយន្តដើរដោយប្រេងឥន្ធនៈ ដើម្បីជំរុញកំណើនការប្រើប្រាស់រថយន្តអគ្គិសនីនៅកម្ពុជា។ លើសពីនេះ ក្រសួងសាធារណការនិងដឹកជញ្ជូន កំពុងពិចារណាក្នុងការបញ្ចុះតម្លៃការចុះបញ្ជីយានយន្ត និងគ្រោងពិភាក្សាជាមួយអគ្គនាយកដ្ឋានពន្ធដារក្នុងការបញ្ចុះតម្លៃថ្លៃពន្ធផ្លូវផងដែរ៕