ក្រុមយោធាដកប្រធានធនាគារកណ្តាលភូមាពីតំណែងខណៈជប៉ុនបារម្ភពីស្ថិរភាពហិរញ្ញវត្ថុ

ធនាគារកណ្តាលនៃបណ្តាប្រទេសដែលមានវិនិយោគច្រើនក្នុងប្រទេសមីយ៉ាន់ម៉ា រួមទាំងក្រុមអ្នកវិនិយោគបរទេស កំពុងកើតក្ដីព្រួយបារម្ភយ៉ាងខ្លាំង ចំពោះស្ថានការណ៍វិវត្តចុងក្រោយនៅក្នុងប្រទេសមីយ៉ាន់ម៉ា ក្រោយពីមានការធ្វើរដ្ឋប្រហារកាលពីថ្ងៃទី ០១ ខែកុម្ភៈ។ បារម្ភនៅត្រង់ថា ថ្មីៗនេះ ក្រុមយោធាទើបបានដកតំណែងប្រធានធនាគារកណ្តាលម្នាក់ទៀតរបស់រដ្ឋាភិបាលលោកស្រី អោងសាន ស៊ូជី ដោយដាក់ជំនួសវិញ នូវអតីតប្រធានធនាគារកណ្តាលរបស់ក្រុមយោធា ដែលធ្លាប់កាន់តំណែងកាលពី៦ឆ្នាំមុន។

ក្រុមយោធាដកប្រធានធនាគារកណ្តាលភូមាពីតំណែង ខណៈជប៉ុនបារម្ភពីស្ថិរភាពហិរញ្ញវត្ថុ (រូបភាព៖ Reuters)

បើតាមការចុះផ្សាយរបស់ Asia Nikkei បានឲ្យដឹងទៀតថា ជប៉ុនដែលមានទំនាក់ទំនងរកស៊ីជិតស្និតជាមួយមីយ៉ាន់ម៉ាបានបង្ហាញក្តីបាម្ភពីរបៀបដឹកនាំរបស់យោធា ដែលអាចជះឥទ្ធិពលដល់កិច្ចសហប្រតិបត្តិការទ្វេភាគី និងតំបន់ លើគោលនយោបាយរូបិយវត្ថុ និងស្ថិរភាពហិរញ្ញវត្ថុ។ ជាមួយគ្នានេះ ធនាគារកណ្តាលជប៉ុនព្រួយថា រដ្ឋប្រហារយោធានៅមីយ៉ាន់ម៉ាអាចធ្វើឱ្យអន្តរាយដល់កិច្ចសហប្រតិបត្តិការរូបិយវត្ថុអន្តរជាតិ។

មីយ៉ាន់ម៉ាក្នុងប៉ុន្មានឆ្នាំចុងក្រោយ ទាក់ទាញបានអ្នកវិនិយោគជាច្រើនពីជប៉ុន ខណៈក្រុមហ៊ុនជប៉ុនវិញរំពឹងថាទីផ្សារក្នុងស្រុកនឹងរីកចម្រើនយ៉ាងឆាប់រហ័សនៅពេលមីយ៉ាន់ម៉ាដើរឆ្ពោះទៅរកលទ្ធិប្រជាធិបតេយ្យពេញលេញ។

សូមជម្រាបជូនថា គិតត្រឹមពាក់កណ្តាលខែកុម្ភៈនេះ ស្ថានការណ៍អាក្រក់នៅមីយ៉ាន់ម៉ានៅតែបន្តអូសបន្លាយដោយពួកយោធា ផ្តើមដាក់ចេញវិធានការណ៍បង្រ្កាបបាតុករដែលប្រឆាំងនឹងខ្លួនកាន់តែខ្លាំងឡើងៗ ដោយបានបញ្ចេញក្រុមទាហាន អមជាមួយនឹងរថពាសដែកជាច្រើន។ ការប៉ះទង្គិចគ្នារវាងប៉ូលីសនិងបាតុករ ក៏បានកើតឡើងជារឿយៗដែរ ដោយបានបណ្តាលឲ្យភាគីទាំងសងខាងរងរបួស។

សូមបញ្ជាក់ដែរថា សហរដ្ឋអាមេរិកដែលតែងតែប្រឆាំងនឹងរដ្ឋប្រហារនៅមីយ៉ាន់ម៉ាតាំងពីដំបូងមកនោះ បានសម្រេចដាក់ទណ្ឌកម្មលើពួកយោធាមីយ៉ាន់ម៉ាហើយ ជុំវិញការធ្វើរដ្ឋប្រហារនេះ ខណៈដែលប្រទេសចិនដែលជាដៃគូសេដ្ឋកិច្ចដ៏សំខាន់របស់មីយ៉ាន់ម៉ា នៅបន្តភាពស្ងាត់ស្ងៀមដដែល៕