សម្ព័ន្ធភាពគណបក្សឈ្នះឆ្នោតថៃដួលរលំ ខណៈកូនស្រី លោក ថាក់ស៊ីន ស៊ីណាវ៉ាត្រា អាចនឹងកាន់ដំណែង រដ្ឋមន្រ្តីការបរទេសថៃ

ការវិវត្តន៍ទៅមុខនៃសភាពការណ៍នយោបាយថៃ ត្រូវបានរាយការណ៍ដោយសារព័ត៌មានបរទេសនានាថា គណបក្សភឿថៃបានប្រកាសជំហររបស់ខ្លួនច្បាស់ហើយកាលពីថ្ងៃពុធម្សិលមិញថា ខ្លួនកំពុងត្រៀមខ្លួន​ក្នុងការបង្កើតរដ្ឋាភិបាលដោយមិនមានគណបក្សឆ្ពោះទៅមុខនោះឡើយ។

លោក ជុនឡាណាន់ ស្រ៊ីកែវ ( Chonlanan Srikaew ) មេដឹកនាំគណបក្សភឿថៃបានប្រាប់​សារព័ត៌មានថា គណបក្សរបស់លោកបានខិតខំគាំទ្រគណបក្សឆ្ពោះទៅមុខអស់​ពីសមត្ថភាពហើយដើម្បីជំរុញបេក្ខភាពនាយករដ្ឋមន្ត្រីរបស់ លោក ភីថា លីមចារឿនរ៉ាត់ ប៉ុន្តែបានបរាជ័យជាបន្តបន្ទាប់ ដោយសារតែគណបក្សឆ្ពោះទៅមុខ នៅតែបន្តរក្សាជំហររឹងត្អឹងទាក់ទងនឹងការទាមទារធ្វើវិសោធនកម្មមាត្រា ១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រ។

លោកបានបញ្ជាក់ថា នេះជាមូលហេតុចម្បងដែលសមាជិកព្រឹទ្ធសភា និងគណបក្សដទៃទៀតមិនព្រមបោះឆ្នោតគាំទ្រ បេក្ខភាព លោក ភីថា ហេតុដូច្នេះហើយ គណបក្សភឿថៃចង់ដកខ្លួនចេញពីក្រុមចម្រុះ ហើយស្វែងរកសម្ព័ន្ធភាពថ្មីដើម្បីបង្កើតរដ្ឋាភិបាលមួយ។

ដើម្បីទទួលបានការគាំទ្រពីគណបក្សដ៏ទៃទៀត ភឿថៃ បានប្រកាសថា ខ្លួននឹងមិនធ្វើវិសោធនកម្ម មាត្រា ១១២ តាមរបៀបណាមួយឡើយ ហើយនឹងដាក់ លោកស៊្រីថា ជាបេក្ខភាពនាយករដ្ឋមន្ត្រីតែម្នាក់គត់របស់ខ្លួននៅក្នុងការបោះឆ្នោតជុំបន្ទាប់នៅថ្ងៃសុក្រ។

លោក ជុនឡាណាន់ បាននិយាយថា លោកមានទំនុកចិត្តថា លោក ស៊្រីថា នឹងឈ្នះតំណែងនាយករដ្ឋមន្ត្រីនៅថ្ងៃនោះ ។

ក្រោយពេលដែល ភឿថៃប្រកាសពីការដកខ្លួនពីសម្ព័ន្ធភាព ភ្លាម លោក ឆៃថាវ៉ាត ធូឡាថុន (Chaithawat Tulathon) អគ្គលេខាធិការគណបក្សឆ្ពោះទៅមុខ បានប្រកាសសូមទោសអ្នកគាំទ្រ ដែលគណបក្សមិនអាចបង្កើតរដ្ឋាភិបាលបាន ។

លោកបានបញ្ជាក់នៅក្នុងសន្និសីទកាសែតថា គណបក្សឆ្ពោះទៅមុខនឹងនៅតែធ្វើការអស់ពីចិត្ត ដើម្បីជំរុញនិងគោរពតាមនយោបាយរបស់ខ្លួន មិនថាស្ថិតក្នុងស្ថានភាពបែបណាក៏ដោយ។

នៅពេលដែលអាប៉ោងនៅមិនទាន់បើកគ្រប មានព័ត៌មានបែកធ្លាយមួយត្រូវបានចុះផ្សាយដោយ សារព័ត៌មាន The Nation បានឲ្យដឹងថា ក្រោមការដឹកនាំរបស់លោក ស្រ៊ីថា សមាសភាពគណរដ្ឋមន្រ្តីសំខាន់ៗរបស់ភឿថៃ រួមមាន លោក ជុនឡាណាន់ ជាមេដឹកនាំបក្ស នឹងអាចកាន់ដំណែងជារដ្ឋមន្រ្តីក្រសួងមហាផ្ទៃ ហើយលោកស្រី ផៃថងថាន ស៊ីណាវ៉ាត្រា កូនស្រី អតីតនាយករដ្ឋមន្រ្តី ថាក់ស៊ីន ស៊ីណាវ៉ាត្រា នឹងអាចកាន់ដំណែងជារដ្ឋមន្រ្តីការបរទេស៕

ដោយៈ សរ សុជាតិ