ទ្រព្យសកម្មហិរញ្ញវត្ថុឌីជីថល (DFAs) នឹងត្រូវបានប្រើប្រាស់ដើម្បីទូទាត់ពាណិជ្ជកម្មឆ្លងដែន ហើយរូបិយប័ណ្ណនានា ដូចជាប្រាក់ដុល្លារអាម៉េរិក ជាដើមនឹងមិនត្រូវបានរាប់បញ្ចូលនោះទេ។ ខណៈដែលសហរដ្ឋអាម៉េរិក កំពុងព្យាយាមគាបរុស្ស៊ី តាមរយៈការដាក់ទណ្ឌកម្មនានា ដើម្បីឱ្យសេដ្ឋកិច្ចរុស្ស៊ី ជាប់គាំង ឬដាំក្បាលចុះខ្លាំង តែរុស្សី នៅតែអាចរក្សាបានកំណើនសេដ្ឋកិច្ចគួរឱ្យភ្ញាក់ផ្អើល ហើយថែមទាំងធ្វើឱ្យប្រាក់ដុល្លារអាម៉េរិកធ្លាក់ចុះឥទ្ធិពលទៀតផង។
ប្លុកប្រទេស BRICS កំពុងប្រើគ្រប់មធ្យោបាយ ដើម្បីកាត់ផ្តាច់ទំនាក់ទំនងជាមួយប្រាក់ដុល្លារអាម៉េរិក និងការពាររូបិយប័ណ្ណក្នុងស្រុកព្រមទាំងសេដ្ឋកិច្ចរបស់ពួកគេ។ ការអនុម័តច្បាប់ឱ្យប្រើប្រាស់ទ្រព្យសកម្មហិរញ្ញវត្ថុឌីជីថល (DFAs) នេះ គឺជាស្ថានការណ៍វិវត្តន៍ចុងក្រោយបំផុតដែលប្លុកប្រទេស BRICS ប្រឹងប្រែងប្រជែងនឹងអនុត្តរភាព ឬអានុភាពគ្មានគូប្រៀបនៃប្រាក់ដុល្លារអាម៉េរិក។
សហរដ្ឋអាម៉េរិក តាមរយៈការដាក់ទណ្ឌកម្មបានដាក់សម្ពាធលើធនាគារនានាទូទាំងពិភពលោក ដោយមិនអនុញ្ញាតឱ្យធនាគារទាំងនោះបញ្ចេញការទូទាត់ទៅកាន់ប្រទេសរុស្ស៊ី នោះឡើយ។ ចំណាត់ការនេះបានបន្ថែមសម្ពាធយ៉ាងខ្លាំងទៅលើសេដ្ឋកិច្ចរបស់រុស្ស៊ី ទោះជាយ៉ាងណា ពេលនេះប្រទេសរុស្ស៊ី បានរកឃើញវិធីថ្មី ដើម្បីរក្សាឱ្យសេដ្ឋកិច្ចរស់រាន នោះ គឺការទូទាត់ពាណិជ្ជកម្មតាមរយៈទ្រព្យសម្បត្តិឌីជីថល (DFAs)។
ដោយ: តែម សុខុម
អត្តបទគួរអាន
ជាលទ្ធផលក្រុមសមាជិកសភារុស្ស៊ី បានអនុម័តសេចក្តីព្រាងច្បាប់នេះ ដែលអនុញ្ញាតឱ្យប្រើប្រាស់ទ្រព្យសម្បត្តិហិរញ្ញវត្ថុឌីជីថល (DFAs) ដើម្បីការទូទាត់ពាណិជ្ជកម្មអន្តរជាតិ ដោយជឿជាក់ថា សហរដ្ឋអាម៉េរិក នឹងមិនអាចបញ្ឈប់រំហូរនៃទ្រព្យសកម្មឌីជីថល (DFAs) ដូចដែលខ្លួនបានធ្វើកន្លងមកនោះឡើយ។
ចំណាត់ការនេះ ក៏ផ្តល់ឱ្យប្រទេសរុស្ស៊ី និងប្លុកប្រទេស BRICS នូវស្វ័យភាពដែលធ្វើឱ្យប្រទេសទាំងនេះជៀសផុតពីការដាក់ទណ្ឌកម្មរបស់សហរដ្ឋអាម៉េរិក ដើម្បីគាំទ្រដល់សេដ្ឋកិច្ចក្នុងស្រុករបស់ខ្លួនផងដែរ។
លោក អាណាតូលី អាកសាកូវ (Anatoly Aksakov) ប្រធានគណៈកម្មាធិការហិរញ្ញវត្ថុនៃសភាជាន់ទាបរបស់រុស្ស៊ី បានគូសបញ្ជាក់ថា ចាប់ពីពេលនេះតទៅ ការទូទាត់ទាំងអស់រវាងប្រទេសរុស្ស៊ី និងប្លុកប្រទេស BRICS ត្រូវធ្វើឡើងតាមប្រព័ន្ធធនាគារ ដើម្បីឱ្យការទូទាត់ទាំងនេះអាចមើលឃើញ រួមទាំងបច្ចាមិត្តរបស់ប្លុកប្រទេស BRICS ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
