តើអ្វីជាភាពខ្លាំងនៅពីក្រោយការឈរជើងដ៏រឹងមាំរបស់ធនាគារ ជីប ម៉ុង នៅរយៈពេលជាង៤ឆ្នាំមកនេះ?

ចាប់ផ្ដើមបើកដំណើរការដំបូងកាលពីឆ្នាំ២០១៩ គិតមកទល់បច្ចុប្បន្ន ធនាគារ ជីប ម៉ុង បានពង្រឹង និងពង្រីកខ្លួនឥតឈប់ឈរ។ ជាក់ស្ដែង ប្រាក់ចំណេញសុទ្ធរបស់ធនាគារ ជីបម៉ុង គិតក្នុងឆ្នាំ២០២២ សម្រេចបានប្រមាណ ២០លានដុល្លារអាមេរិក កើនឡើង១២២% ធៀបនឹងឆ្នាំ២០២១។ ប្រាក់បញ្ញើអតិថិជនវិញ បានកើនឡើងដល់ ៩៥៥លានដុល្លារអាមេរិក និងឥណទានមានដល់ទៅ ៧៦៥លានដុល្លារអាមេរិក។ រីឯ ទ្រព្យសកម្មរបស់ធនាគារ ជីប ម៉ុង បានកើនដល់ ១.២ប៊ីលានដុល្លារអាមេរិក ខណៈចំនួនសាខាវិញមាន ១៤សាខា, ជាមួយបុគ្គលិកសរុបចំនួន ៥០០នាក់ និងដៃគូអាជីវកម្មច្រើនជាង ៤៣១៧ទីតាំង ។

អ្នកឧកញ៉ា លាង ម៉េង ប្រធានក្រុមប្រឹក្សាភិបាល​នៃធនាគារ ជីប ម៉ុង មានប្រសាសន៍ថា សម្រាប់ឆ្នាំ២០២៣នេះ និងឆ្នាំបន្តបន្ទាប់ ធនាគារ ជីប ម៉ុង នឹងនៅតែបន្តពង្រីកខ្លួនកាន់តែធំនៅក្នុងទីផ្សារធនាគារ ដើម្បីចូលរួមជាមួយធនាគារដៃគូផ្សេងទៀត ជាមួយធនាគារជាតិនៃកម្ពុជា និងជាមួយរាជរដ្ឋាភិបាលកម្ពុជាកសាងវិស័យធនាគារ និងខឿនសេដ្ឋកិច្ចជាតិកម្ពុជាអោយកាន់តែរឹងមាំ។

ក្នុងនោះ ធនាគារ ជីប ម៉ុង នឹងផ្ដោតលើយុទ្ធសាស្ត្រសំខាន់បីចំណុច គឺការអភិវឌ្ឍធនធានមនុស្ស ហេដ្ឋរចនាសម្ព័ន្ធ និងប្រព័ន្ធបច្ចេកវិទ្យា។

ធនាគារ ជីប ម៉ុង បាន​ពង្រឹងនូវសមត្ថភាពផ្ដល់សេវាកម្មដ៏ល្អបំផុត​សម្រាប់អតិថិជន ជាមួយនឹងទំនុកចិត្ត និងសុវត្ថិភាពខ្ពស់។ បន្ថែមពីនេះ ធនាគារពាណិជ្ជខ្មែរដ៏ធំមួយនេះ ក៏បានវិនិយោគជាច្រើនលើប្រព័ន្ធបច្ចេកវិទ្យា​ទំនើបៗ ដើម្បីផ្ដល់ជូននូវប្រព័ន្ធធនាគារឌីជីថលលំដាប់ពិភពលោករួមជាមួយនឹងផលិតផលហិរញ្ញវត្ថុថ្មីៗ ស្របតាមតម្រូវការប្រចាំថ្ងៃរបស់អតិថិជនផងដែរ។

អ្នកឧកញ៉ា លាង ម៉េង បានអះអាងថា ជីប ម៉ុង គ្រុប​ ជាក្រុមហ៊ុនមេរបស់ធនាគារ ជីប ម៉ុង ដែលបច្ចុប្បន្ន​មានក្រុមហ៊ុនបុត្រសម្ព័ន្ធជាង១០ កំពុងវិនិយោគលើពហុវិស័យនៅកម្ពុជា ហើយថ្នាក់ដឹកនាំ រួមទាំង​ម្ចាស់ភាគហ៊ុនទាំងអស់មានចក្ខុវិស័យវែងឆ្ងាយ និងប្ដេជ្ញាចិត្តខ្ពស់ ក្នុងការកសាង​ម៉ាកយីហោក្រុមហ៊ុន​​ឲ្យបានល្បីឈ្មោះសុសសាយលើស១០០ឆ្នាំ៕