ពាណិជ្ជកម្មអេឡិចត្រូនិកររបស់ថៃរំពឹងកើនឡើងដល់ទឹកប្រាក់៣៤ពាន់លានដុល្លារ នៅឆ្នាំ២០២៥

ប្រធានកិត្តិយសនៃសមាគម E-Commerce ប្រទេសថៃ បានឱ្យថាកាលពីឆ្នាំ២០២២ តម្លៃទីផ្សារពាណិជ្ជកម្មអេឡិចត្រូនិកនៅក្នុងប្រទេសថៃមានទំហំជាង២៣ពាន់លានដុល្លា កើនឡើង៨% ធៀបរយៈពេលដូចគ្នាកាលពីឆ្នាំ២០២១។ សម្រាប់ឆ្នាំ២០២៣នេះ គេព្យាករណ៍ថាតម្លៃទីផ្សារពាណិជ្ជកម្មអេឡិចត្រូនិក អាចនឹងឈានដល់ជាង ២៦ពាន់លានដុល្លា ហើយនឹងកើនឡើងដល់ជាង ៣៤ពាន់លានដុល្លានៅឆ្នាំ២០២៥ ។

ទោះយ៉ាងណា អត្រាកំណើនវិស័យ E-commerce របស់ថៃឆ្នាំ២០២២ និង ២០២៣ ត្រូវបានគេរំពឹងថានឹងកើនយឺតជាង បើធៀបនឹងកំណើនឆ្នាំ ២០២០ និង ២០២១ ដែលកាលនោះ ឆ្នាំ២០២០ មានកំណើនដល់១៤០% និង ២០២១មានដល់ ៧៥%។ លោកសន្មតថា ទំនោរថមថយនេះគឺដោយសារតែ កំរិតអតិផរណាកើនឡើងបានរារាំងដល់ការចំណាយរបស់ប្រជាជន ខណៈពេលបច្ចប្បុន្ននេះប្រជាជនភាគច្រើនចូលចិត្តចាយនៅខាងក្រៅស្រុកច្រើន។

ដោយឡែក តម្លៃទីផ្សារពាណិជ្ជកម្មអេឡិចត្រូនិកនៅអាស៊ាន មានតម្លៃស្មើនឹង ៥១% នៃតម្លៃទីផ្សារពាណិជ្ជកម្មអេឡិចត្រូនិកសរុបរបស់ពិភពលោកក្នុងឆ្នាំ២០២២ ដែលអត្រានេះបានកើនឡើងពី ៣២% កាលពីឆ្នាំ២០២១។ ខណៈទីផ្សាររបស់ថៃនិយាយដោយឡែក ធៀបនឹង E-commerce សកលកាលពីឆ្នាំ២០២២ បានធ្លាក់ចុះ២,៥% ធៀបនឹងឆ្នាំ២០២១ ដែលនេះជាការធ្លាក់ចុះលើកដំបូងបំផុតមិនធ្លាប់មានពីមុនមក។

ទីផ្សារអេឡិចត្រូនិកគឺ ជាកន្លែងដែលមិនអាចខ្វះបានសម្រាប់ការរស់នៅប្រចាំថ្ងៃ ទាំងអ្នកលក់ និងទាំងអ្នកទិញ។ ទោះបីជាវេទិកាមួយចំនួនបានដំឡើងកម្រៃជើងសារ និងកាត់បន្ថយការបញ្ចុះតម្លៃក៏ដោយ ក៏បរិមាណលក់នៅលើវេទិកាទាំងនេះនៅតែមានចំនួនច្រើនដដែល។

គួរជម្រាបផងដែរថា កាលពីខែធ្នូឆ្នាំ២០២២ គម្រោងតំបន់ពាណិជ្ជកម្មសេរីនៅក្នុងច្រកសេដ្ឋកិច្ចភាគខាងកើត ដែលគ្រប់គ្រងដោយក្រុមហ៊ុនពាណិជ្ជកម្មអេឡិចត្រូនិកយក្សរបស់ចិន Alibaba Group Holdings បានចាប់ផ្តើមប្រតិបត្តិការសាកល្បងហើយ។ គម្រោងនេះនឹងជម្រុញ ការចែកចាយផលិតផលចិនទៅកាន់ប្រទេសថៃ កម្ពុជា ឡាវ មីយ៉ាន់ម៉ា និងវៀតណាម ដោយកាត់បន្ថយពេលវេលាដឹកជញ្ជូនពី ១០ ថ្ងៃមកត្រឹមតែ ៣ ប៉ុណ្ណោះ៕

អត្ថបទដោយ: សារៀម លក្ខិណា