ត្រូវបានស្រង់សម្ដីដោយសារព័ត៌មានថៃបាងកកប៉ុស្ដិ៍ លោក ប្រាយុទ ចាន់អូចា បានជំរុញឱ្យប្រទេសអាស៊ានទាំងអស់គួរដើរតាមគន្លងរបស់ប្រទេសថៃ ហើយចាប់ផ្តើមបើកដំណើរការឡើងវិញ ព្រោះថាប្រទេសថៃជាប្រទេសដំបូងគេក្នុងតំបន់អាស៊ាន ដែលបានបើកតំបន់ទេសចរណ៍សាកល្បងក្រោមគម្រោងបើកសាកល្បង កោះភូកេត ដើម្បីស្វាគមន៍ភ្ញៀវទេសចរបរទេស ក្នុងអំឡុងពេលមានជំងឺរាតត្បាត ហើយនឹងបន្តបើកជាបណ្តើរៗនូវតំបន់មួយចំនួនបន្ថែមទៀត។ បន្ថែមពីនេះ ប្រទេសថៃ នៅថ្ងៃទី០១ ខែវិច្ឆិកាតទៅ ក៏បើកទទួលអ្នកដំណើរពីប្រទេសជាង៤០ ឲ្យចូលទៅក្នុងប្រទេសថៃដោយមិនចាំបាច់ធ្វើចត្តាឡីស័កផងដែរ។
លោក ប្រាយុទ្ធ ចាន់អូចា មានប្រសាសន៍ទៀតថា ក្របខណ្ឌការរៀបចំច្រករបៀងទេសចរណ៍អាស៊ានគួរតែត្រូវបានអនុវត្ត ដោយមានការទទួលស្គាល់ពីគ្នាទៅវិញទៅមកនូវវ៉ាក់សាំង និងបណ្ណវ៉ាក់សាំង ដើម្បីសម្រួលដល់ការធ្វើដំណើរ ការធ្វើអាជីវកម្ម និងទេសចរណ៍នៅពេលក្រោយ។ លោកបានបន្ថែមថា អាស៊ានត្រូវតែជៀសវាងវិធានការដែលមិនចាំបាច់ ដែលអាចរារាំងដល់សកម្មភាពពាណិជ្ជកម្ម ដើម្បីធានាការតភ្ជាប់ខ្សែចង្វាក់ផ្គត់ផ្គង់ក្នុងអំឡុងពេលជំងឺរាតត្បាត និងធ្វើឱ្យមានការប្រើប្រាស់កាន់តែច្រើននៃទីផ្សារក្នុងតំបន់អាស៊ាន។
អត្ថបទគួរអាន
យ៉ាងណាមិញ លោកបានបន្តថា តំបន់អាស៊ានត្រូវតែធ្វើការដើម្បីដោះស្រាយផលប៉ះពាល់នៃជំងឺរាតត្បាតនេះ ព្រមទាំងត្រូវរៀនសូត្រពីជំងឺនេះផងដែរ ដើម្បីរៀបចំសម្រាប់ទប់ទល់នឹងជំងឺរាតត្បាតនាពេលអនាគតផងដែរ។
លើសពីនេះទៅទៀត លោកសង្ឃឹមថា ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) អាចចូលជាធរមានតាមការគ្រោងទុក ខណៈដែលការចរចាកិច្ចព្រមព្រៀងពាណិជ្ជកម្មសេរី (FTA) អាស៊ាន-កាណាដា អាចត្រូវបានប្រកាសក្នុងពេលឆាប់ៗនេះ។ ទន្ទឹមនេះ ប្រទេសថៃគ្រោងនឹងផ្តល់សច្ចាប័នសម្រាប់ RCEP ទៅកាន់អគ្គលេខាធិការអាស៊ាននៅដើមខែវិច្ឆិកា ដើម្បីរួមចំណែកដល់ការចូលជាធរមានដំបូងរបស់ខ្លួនផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
