រដ្ឋមន្ត្រីក្រសួងការងារថៃ លោកស៊ូឆាត ឆុមក្លីន (Suchart Chomklin) បាននិយាយថា គណៈរដ្ឋមន្ត្រីនៃប្រទេសថៃបានអនុម័តយល់ព្រមកាលពីថ្ងៃទី៥ ខែកក្កដា ក្នុងការពន្យារបណ្ណការងារសម្រាប់ពលករចំណាកស្រុកចំនួនជិត ១ លាន ៧ សែននាក់ អាចបន្ដនៅធ្វើការនៅក្នុងប្រទេសថៃបានរហូតដល់ថ្ងៃទី១៣ ខែកុម្ភៈ ឆ្នាំ២០២៥។
រដ្ឋាភិបាលនៃប្រទេសថៃបានបញ្ជាក់ថាវិធានការនេះនឹងជួយពន្លឿនការស្តារ និងជំរុញកំណើនសេដ្ឋកិច្ចថៃឡើងវិញ ដោយសារកម្មករចំណាកស្រុកជិត២លាននាក់នេះ បានដើរតួនាទីយ៉ាងសំខាន់ក្នុងវិស័យឧស្សាហកម្ម និងកសិកម្ម ក៏ដូចជាការផលិតអាហារកែច្នៃ រួមទាំងអាហារក្លាសេត្រជាក់ផងដែរ។
រដ្ឋមន្ត្រីក្រសួងការងារថៃ លោកស៊ូឆាត ឆុមក្លីន បានបន្លែមទៀតថា កម្លាំងពលកម្មទាំងនេះក៏ជាគន្លឹះក្នុងការទ្រទ្រង់វិស័យឧស្សាហកម្មសំណង់ និងទេសចរណ៍ផងដែរ។
យ៉ាងណាមិញ លោកផៃរុច ឆុតធីកាសាធីន (Pairoj Chotikasathien) អគ្គនាយកនៃនាយកដ្ឋានការងារថៃបាននិយាយយ៉ាងដូច្នេះថា៖ «ពលករចំណាកស្រុកបរទេស ដែលត្រូវបានអនុញ្ញាតឱ្យធ្វើការរហូតដល់ថ្ងៃទី១៣ ខែកុម្ភៈ ឆ្នាំ ២០២៣ នឹងបែងចែកជាពីរក្រុម»។
លោកបញ្ជាក់ថា មួយក្រុមគឺអ្នកដែលមានទិដ្ឋាការដែលនឹងផុតកំណត់នៅត្រឹមថ្ងៃទី១ ខែសីហាឆ្នាំនេះ ហើយពួកគេនឹងត្រូវបានអនុញ្ញាតឱ្យដាក់ពាក្យបន្តធ្វើការរហូតដល់ខែកុម្ភៈ ឆ្នាំក្រោយ។
អត្ថបទគួរអាន
ហើយក្រុមផ្សេងទៀតគឺអ្នកដែលមានទិដ្ឋាការផុតកំណត់ក្រោយថ្ងៃទី១ ខែសីហា ដែលពួកគេត្រូវធ្វើទិដ្ឋាការថ្មីមុនពេលផុតកំណត់។
លោកផៃរុច ឆុតធីកាសាធីន បានបញ្ជាក់ថា តាមបទប្បញ្ញត្តិរបស់ក្រសួង ប្រសិនបើកម្មករនិយោជិតបរទេសចង់បន្តធ្វើការនៅប្រទេសថៃតទៅទៀត គឺត្រូវតែសុំការអនុញ្ញាតពីមន្ត្រីចុះបញ្ជីនៅក្រសួងការងារថៃ។
បន្លែមពីនេះទៅទៀត លោកភូច អារាមវឌ្ឍណានុន (Poj Aramwattananont) អនុប្រធានសភាពាណិជ្ជកម្មថៃបានបង្ហើបថា តម្រូវការពលករបរទេសបានកើនឡើង ចាប់តាំងពីរដ្ឋាភិបាលថៃបានលុបចោលវិធានការរឹតបន្តឹងកូវីត១៩ មក ។
លោកភូច បានននិយាយថា៖ «កម្លាំងពលកម្មបានដើរតួយ៉ាងសំខាន់ក្នុងសេដ្ឋកិច្ចថៃ និងត្រូវបានចាត់ទុកជាក្បាលម៉ាស៊ីនដែលខ្វះមិនបានផងដែរ រាប់ចាប់តាំងពីឧស្សាហកម្មនាំចេញ ការផលិត ការកែច្នៃ និងសំណង់ រហូតដល់វិស័យទេសចរណ៍ និងវិស័យសេវាកម្មជាដើម»។
យោងតាមសភាពាណិជ្ជកម្មថៃបានឱ្យដឹងថ្មីៗនេះថា ប្រទេសថៃត្រូវការពលករបរទេសបន្ថែមជាង ៥សែននាក់ទៀត ដើម្បីគាំទ្រដល់វិស័យ សំណង់ ទេសចរណ៍ និង សេវាកម្មកែច្នៃផលិតផលកសិកម្ម និង ឧស្សាហកម្មម្ហូបអាហារសម្រាប់ការនាំចេញ ខណៈបច្ចុប្បន្ន សកម្មភាពសេដ្ឋកិច្ចសេដ្ឋកិច្ច និងសង្គមរបស់ប្រទេសនេះ ត្រូវបានបើកដំណើរពេញលេញឡើងវិញ រួមទាំងវិស័យទេសចរ ក៏មានការដកចេញនូវការរឹតបន្ដឹងស្ទើរតែទាំងអស់ហើយ សម្រាប់ភ្ញៀវទេសចរចូលមកកម្សាន្ដផងដែរ៕
