ថៃ រំពឹងកើបលុយប្រមាណ៧០០លានដុល្លារអាម៉េរិក ពីបុណ្យសង្ក្រាន្តឆ្នាំថ្មី២០២៤ នេះ

រដ្ឋាភិបាលថៃ គ្រោងនឹងរៀបចំបុណ្យមហាសង្ក្រាន្តឆ្នាំថ្មី២០២៤ ជាមួយនឹងពិធីជះទឹក និងបាញ់ទឹកកម្សាន្តក្នុងគោលបំណងទាក់ទាញភ្ញៀវទេសចរបរទេសឱ្យទៅលេងប្រទេសថៃ កាន់តែច្រើន។ លោកស្រី ថាផានី គាតផៃប៊ូល (Thapanee Kiatphaibool) ប្រធានអាជ្ញាធរទេសចរណ៍ថៃ (TAT) បានថ្លែងថា ប្រាក់ចំណូលបានពីបុណ្យសង្ក្រាន្តឆ្នាំថ្មីចាប់ពីថ្ងៃទី១២-១៦ ខែមេសានេះត្រូវបានប៉ាន់ស្មានថា នឹងកើនឡើង៤៩%។

ប្រទេសថៃ រំពឹងកើបលុយប្រមាណ៤៣៧លានដុល្លារអាម៉េរិក ពីភ្ញៀវទេសចរក្នុងស្រុកប្រមាណជាង៤លាននាក់ និង២៤៥លានដុល្លារអាម៉េរិក ពីភ្ញៀវទេសចរបរទេសប្រមាណ៥១ម៉ឺននាក់ អំឡុងពិធីបុណ្យមហាសង្ក្រាន្តឆ្នាំថ្មី២០២៤ រយៈពេល៥ថ្ងៃដ៏ខ្លីខាងមុខនេះ។

ដោយឡែកទីក្រុងបាងកក រំពឹងទទួលបានចំណូលប្រមាណ១០៣លានដុល្លារអាម៉េរិក ពីភ្ញៀវទេសចរក្នុងស្រុកប្រមាណជិត៦៤ម៉ឺននាក់។

លោកស្រី ថាផានី គាតផៃប៊ូល (Thapanee Kiatphaibool) និយាយថា ខណៈដែលភ្ញៀវទេសចរក្នុងស្រុកភាគច្រើនទៅលេងស្រុកកំណើតនៅតាមបណ្ដាខេត្តផ្សេងៗ ទេសចរណ៍នៅទីក្រុងបាងកក នឹងត្រូវបានជំរុញដោយជនបរទេស។

លោកស្រីបានបន្ថែមទៀតថា បណ្ដាខេត្តផ្សេងទៀតក៏នឹងទទួលបានផលប្រយោជន៍ដែរពីការប្រារព្ធពិធីបុណ្យមហាសង្ក្រាន្តឆ្នាំថ្មីនៅទូទាំងប្រទេស ដែលនឹងត្រូវបន្តក្នុងរយៈពេល២១ថ្ងៃក្នុងខែមេសា។

សូមបញ្ជាក់ថា គិតត្រឹមថ្ងៃទី១០ ខែមីនា ដើមឆ្នាំ២០២៤ នេះ ប្រទេសថៃ ទទួលបានភ្ញៀវទេសចរបរទេសសរុបចំនួន៧,៤លាននាក់ ដោយទទួលបានប្រាក់ចំណូលជាង១០ពាន់លានដុល្លារអាម៉េរិក ហើយក្នុងនោះប្រទេសចិន នៅតែជាទីផ្សារនធំបំផុតរបស់ថៃ ជាមួយនឹងភ្ញៀវទេសចរចិនជាង១,៣លាននាក់ ម៉ាឡេស៊ីប្រមាណ៩៩ម៉ឺននាក់ និងរុស្ស៊ីប្រមាណជិត៥០ម៉ឺននាក់៕

ដោយៈ សរ សុជាតិ