Urban Village គឺជាគម្រោងដំបូងគេបង្អស់ និងតែមួយគត់ពីប្រទេសកម្ពុជា ដែលឈ្នះពានរង្វាន់ដ៏មានកិត្យានុភាពនេះ ដោយយកឈ្នះអ្នកចូលរួមខ្លាំងៗមកពីប្រទេសផ្សេងទៀត រួមមាន សិង្ហបុរី វៀតណាម ថៃ អូស្ត្រាលី និងទីក្រុងហុងកុង ជាដើម ។
ខុនដូ Urban Village រួមមាន ការិយាល័យធ្វើការ ជាន់សម្រាប់ជាកន្លែងលក់ទំនិញ និងយូនីតលំនៅដ្ឋានប្រណីតដែលមានតម្លៃសមរម្យ ។ គម្រោងនេះ អភិវឌ្ឍនិងគ្រប់គ្រងដោយក្រុមហ៊ុនហុងកុងល្បីឈ្មោះ Urban Hub។
បុរសវ័យក្មេងដែលបញ្ចប់ការសិក្សាពីសាកលវិទ្យាល័យផ្នែកច្បាប់នៅប្រទេសអង់គ្លេសរូបនេះ (ក្នុងរូបភាពខាងលើ) គឺជាស្ថាបនិក និងជាអគ្គនាយកគម្រោង Urban Village។ លោកឈ្មោះ Ben Li (បិន លី) អាយុ ៣៧ឆ្នាំ កើតនៅទីក្រុងហុងកុង ក្នុងគ្រួសារសហគ្រិនមួយ ដែលមានទំនាក់ទំនងរយៈពេលជិត ៣ទសវត្សរ៍ជាមួយប្រទេសកម្ពុជា ។ តាមពិតទៅ គ្រួសាររបស់លោកបានមកវិនិយោគ និងរកស៊ីនៅក្នុងវិស័យកាត់ដេរនៅកម្ពុជា តាំងពីដើមទសវត្សរ៍ឆ្នាំ៩០មកម្ល៉េះ គឺជិត ៣០ឆ្នាំហើយ។
អត្ថបទទាក់ទង
បន្ទាប់ពីបញ្ចប់ការសិក្សា លោកបានធ្វើការរយៈពេល ៥ឆ្នាំ នៅក្នុងក្រុមហ៊ុនគណនេយ្យនិងសវនកម្មដ៏ធំលំដាប់ពិភពលោកមួយ ឈ្មោះថា PricewaterhouseCoopers(PwC) ។ បន្ទាប់ពីធ្វើការ៥ឆ្នាំឲ្យក្រុមហ៊ុនលំដាប់ពិភពលោកនេះ នៅទីបំផុត រូបលោកក៏បានសម្រេចចិត្តធ្វើការឲ្យក្រុមហ៊ុនគ្រួសាររបស់លោក នៅប្រទេសកម្ពុជាវិញដែលវិនិយោគ ទៅលើរោងចក្រផលិតសម្លៀកបំពាក់ម៉ាកល្បីៗ ដូចជា Zara, Superdry, C&A, Marks & Spencer និង Uniqlo សម្រាប់ការនាំចេញ ។
លោក បិន លី និយាយយ៉ាងដូច្នេះថា «២៨ឆ្នាំមុន គ្រួសារខ្ញុំបានចូលមកវិនិយោគនៅកម្ពុជា ដែលកាលនោះ កម្ពុជាមិនសម្បូរម៉ូតូអីដូចសព្វថ្ងៃនេះទេ... យើងមកវិនិយោគលើវិស័យរោងចក្រកាត់ដេរ ផលិតសម្លៀកបំពាក់នាំចេញទៅទីផ្សារសហរដ្ឋអាមេរិក។ កាលណោះ មិត្តភក្ដិខ្លះនិយាយថា អ្នកឆ្កួតទេឬ ដែលទៅវិនិយោគនៅប្រទេសនោះ[កម្ពុជា] ដោយគេយល់ថា កាលណោះ កម្ពុជាមិនមែនជាប្រទេសមានស្ថិរភាពទេ គេបារម្ភខ្លាចមានសង្គ្រាមស៊ីវិល គេបារម្ភអ៊ីចេះ បារម្ភអ៊ីចុះ..»។
“គឺកម្ពុជានេះហើយដែលបានធ្វើឲ្យសុបិនយើងក្លាយជាការពិត ។ ដូច្នេះហើយទើបយើងត្រូវចូលរួមចំណែកក្នុងការកសាងកម្ពុជាវិញ”
លោក លី បន្តថា ទោះបីមានការព្រួយបារម្ភដែលលើកឡើងដោយមិត្តភក្ដិក្ដី គ្រួសាររបស់លោកបានសម្រេចចិត្តចូលមកវិនិយោគយ៉ាងច្រើនសន្ធឹកសន្ធាប់នៅកម្ពុជា ដើម្បីបង្កើតរោងចក្រផលិតសម្លៀកបំពាក់ សម្រាប់ការនាំចេញទៅទីផ្សារពិភពលោក ។
លោកបន្ថែមដូច្នេះថា «យើងបានចាប់យកឱកាសនោះ យើងចូលមកកម្ពុជាមុនគេ ហើយក៏បានក្លាយខ្លួនជាក្រុមហ៊ុនធំមួយក្នុងចំណោមក្រុមហ៊ុនផលិតសម្លៀកបំពាក់ធំជាងគេបំផុតទាំង ៥»។
ដោយសារតែការធ្វើការនៅក្នុងរោងចក្ររបស់គ្រួសារលោកនៅកម្ពុជានេះហើយ ដែលនាំឲ្យវិនិយោគិនហុងកុងវ័យក្មេងរូបនេះ សម្លឹងឃើញឱកាសវិនិយោគលើវិស័យខុនដូ ។
លោក លី អះអាងថា លោកមានមហិច្ឆតាអភិវឌ្ឍគម្រោងខុនដូ ដែលផ្ដល់នូវលំនៅដ្ឋានបែបប្រណីត ប៉ុន្តែ ក្នុងតម្លៃមួយធូរថ្លៃបំផុត ដើម្បីផ្ដល់លទ្ធភាពឲ្យយុវជនកម្ពុជា ជំនាន់ទីពីរ ជំនាន់ទីបី អាចមានផ្ទះផ្ទាល់ខ្លួន ខណៈដែលគេចេញពីសាលា និងចាប់ផ្ដើមការងារអាជីពដំបូងៗរបស់ខ្លួន។
លោក បិន លី និយាយទាំងញញឹម ថា «គឺកម្ពុជានេះហើយដែលបានធ្វើឲ្យសុបិនយើងក្លាយជាការពិត ។ ដូច្នេះហើយទើបយើងត្រូវចូលរួមចំណែកក្នុងការកសាងកម្ពុជាវិញ»។
និយាយអំពីគម្រោងអភិវឌ្ឍន៍ខុនដូរបស់ក្រុមហ៊ុន Urban Hub វិញ តើលោក បិន លី មានគំនិតអ្វីដែលថា ថ្មី ប្លែក និងពិសេស ដើម្បីចូលមកក្នុងទីផ្សារអចលនទ្រព្យនៅកម្ពុជា ?
លោក លី បញ្ជាក់ប្រាប់ ខេមបូណូមីស យ៉ាងដូច្នេះ «យើងមិនដូចអ្នកអភិវឌ្ឍមួយចំនួន ដែលផ្ដោតតែទៅលើការរកប្រាក់ចំណេញ រួចហើយចាកចេញនោះទេ ។ យើងគិតថា សម្រាប់ខ្មែរជំនាន់ក្រោយៗ ជំហានបន្ទាប់ គឺ ខុនដូហ្នឹងហើយ ពីព្រោះ ប្រជាជនក្នុងទីក្រុងកើនឡើងយ៉ាងឆាប់រហ័ស។ ប្រសិនបើអ្នកចង់រស់នៅក្នុងទីក្រុង អ្នកត្រូវតែរស់នៅក្នុងខុនដូ ដូចនៅ ហុងកុង ដូចនៅសិង្ហបុរីដែរ »។
លោក លី បន្តទៀត «អ្វីដែលខុនដូ Urban Village ដែលអភិវឌ្ឍដោយ Urban Hub ខុសប្លែកពីគេ គឺ គោលគំនិតសហគមន៍ (community concept) ។ យើងមានអ្វីៗសព្វបែបយ៉ាង តាំងពីកន្លែងធ្វើការងាររួម (co-working space), សាលាសម្រាប់ក្មេងតូចៗ អាងហែលទឹក កន្លែងហាត់ប្រាណ សាលសិល្បៈ និងអ្វីៗជាច្រើនទៀត។»
