តាមពិតទៅ ស្ថានភាពឆ្លងជំងឺកូវីដ១៩ នៅសហរដ្ឋអាមេរិក កាលពី ២ ខែមុន មានការថយចុះជាបណ្ដើរៗហើយ ក៏ប៉ុន្ដែចូលដល់រដូវរងានេះករណីឆ្លងចាប់ផ្ដើមកក្រើកឡើងវិញ ដ្បិតថា ខែរងាហាក់អំណោយផលដល់មេរោគក្នុងការចម្លង ជាពិសេសសមត្ថភាពមេរោគ ឌែលតា ដែលងាយឆ្លង និងមានហានិភ័យខ្ពស់ គួបផ្សំនឹងវត្តមាននៃមេរោគបំប្លែងថ្មីអូមីក្រុងក៏ចាប់ផ្ដើមអុកឡុកកាន់តែខ្លាំងនៅអាមេរិកផងដែរ។ ជារួមករណីឆ្លងនៅអាមេរិកមានការកើនឡើងខ្ពស់ខ្លាំងមែនទែននៅរយៈពេល ២ សប្ដាហ៍ចុងក្រោយនេះ។ ក្នុងនោះដែរ អ្នកជំងឺកូវីដ ១៩ នៅអាមេរិក ស្ទើរតែ ៩៩% ហើយជាអ្នកជំងឺដែលឆ្លងមេរោគបំប្លែងថ្មី ប្រភេទ ឌែលតា។
ចំនួនអ្នកជំងឺកូវីដ១៩ ដែលសម្រាកព្យាបាលនៅមន្ទីរពេទ្យក៏កំពុងកើនឡើងផងដែរ ពោលគឺកើនឡើង ២០% បើគិតចាប់តាំងពីថ្ងៃបុណ្យ Thanksgiving នៅចុងខែវិច្ឆិកាមកម្ល៉េះ។ ខណៈនៅក្នុងរយៈពេលមួយខែកន្លងមកនេះ ការស្លាប់បានកើនឡើង ៤,៦% ដោយចំនួនអ្នកស្លាប់នៅសហរដ្ឋអាមេរិកបានកើនឡើងលើសពី ៨០ម៉ឺននាក់ហើយ។
ជុំវិញការកើនឡើងនូវករណីឆ្លងនៅអាមេរិកនេះ រដ្ឋបាលចំណីអាហារ និង ឱសថអាមេរិក អនុញ្ញាតឱ្យចាក់វ៉ាក់សាំង Pfizer ដូសទី ៣ ដល់យុវវ័យ អាយុ ១៦ និង ១៧ ឆ្នាំ ក្រោយពីចាក់ដូសទី ២ បាន៦ខែ។ យ៉ាងណាមិញ ការចាក់វ៉ាក់សាំង Pfizer ជាដូសទី ៣ នេះដែរ បើតាមការធ្វើតេស្តរបស់ ក្រុមហ៊ុន Pfizer បានបង្ហាញថា វាអាចជួយការពារសារពាង្គកាយទប់ទល់ពីការឆ្លងមេរោគបំប្លែងថ្មី អូមីក្រុងបាន។
សូមជម្រាបថា រហូតមកដល់ពេលនេះ ពលរដ្ឋអាមេរិក ប្រមាណជិត ៦១% ហើយ បានចាក់វ៉ាក់សាំងគ្រប់ចំនួន ២ ដូស ខណៈមានប្រហែល ១៤% នៃប្រជាជននៅក្នុងសហរដ្ឋអាមេរិក បានទទួលការចាក់វ៉ាក់សាំងដូសជំរុញ៕
