រដ្ឋមន្ត្រីក្រសួងហិរញ្ញវត្ថុអាមេរិក លោកស្រី ចាណិត យេឡិន បានឱ្យដឹងតាមរយៈលិខិតផ្ញើទៅសហសភាថា ក្រសួងនេះទំនងជាមិនអាចបំពេញកាតព្វកិច្ចបង់ប្រាក់របស់រដ្ឋាភិបាលសហរដ្ឋអាមេរិកទាំងអស់«ដែលនឹងមកដល់នៅថ្ងៃទី ១ ខែមិថុនា»ឡើយ ប្រសិនបើគ្មានវិធានការពីសហសភា។ ការព្យាករនេះបានបង្កើនហានិភ័យដែលថា សហរដ្ឋអាមេរិកកំពុងបោះពួយទៅរកស្ថានភាពអលទ្ធភាពសងបំណុលដែលមិនធ្លាប់មានពីមុនមក។ ស្ថានភាពនេះនឹងអង្រួនសេដ្ឋកិច្ចពិភពលោកឱ្យរង្គោះរង្គើ ហើយទាមទារឱ្យមានជាបន្ទាន់នូវការពិចារណាផ្នែកនយោបាយនៅសហរដ្ឋអាមេរិក ទីដែលគណបក្សប្រជាធិបតេយ្យ និងគណបក្សសាធារណរដ្ឋ កំពុងប្រឈមមុខដាក់គ្នាអស់រយៈពេលជាច្រើនខែ។
អត្ថបទគួរអាន
កាលពីសប្តាហ៍មុន សមាជិកសភាជាន់ទាបមកពីគណបក្សសាធារណរដ្ឋបានអនុម័តច្បាប់មួយរួចហើយ ដើម្បីអនុញ្ញាតឱ្យមានការបង្កើនកម្រិតបំណុលអតិបរមា ដោយភ្ជាប់លក្ខខណ្ឌតម្រូវឱ្យកាត់បន្ថយការចំណាយយ៉ាងច្រើន ចាប់ពីការចំណាយលើសេវាថែទាំសុខភាពសម្រាប់អ្នកក្រីក្រ រហូតដល់ការចំណាយលើអ្នកត្រួតពិនិត្យចរាចរណ៍ផ្លូវអាកាស។ ប៉ុន្តែ ព្រឹទ្ធសភាដែលគ្រប់គ្រងដោយគណបក្សប្រជាធិបតេយ្យ និងលោក បៃឌិន ធ្លាប់បាននិយាយថាពួកគេនឹងមិនយល់ព្រមឱ្យកាត់ការចំណាយទាំងនោះទេ។ លោក បៃឌិន ធ្លាប់បានប្រកាសក្ដែងៗថា លោកនឹងមិនចរចារឿងដំឡើងពិដានបំណុលនោះទេ ប៉ុន្តែថាលោកនឹងពិភាក្សាអំពីរឿងកាត់បន្ថយថវិកា បន្ទាប់ពីកម្រិតបំណុលអតិបរមាថ្មីត្រូវបានអនុម័តដោយសភាជាន់ទាបដែលគ្រប់គ្រងដោយគណបក្សសាធារណរដ្ឋ។ ជារឿយៗ សហសភាសហរដ្ឋអាមេរិកតែងភ្ជាប់ការដំឡើងកម្រិតបំណុលអតិបរមាជាមួយថវិកាជាតិនិងវិធានការចំណាយផ្សេងៗទៀតរបស់ប្រទេសនេះ៕
