អាម៉េរិកថា កិច្ចព្រមព្រៀងសន្តិសុខវៀតណាម-ចិន មិនផលប៉ះពាល់ដល់ទំនាក់ទំនងរបស់ខ្លួនជាមួយវៀតណាមឡើយ

ក្នុងអំឡុងពេលដំណើរទស្សនកិច្ចរបស់ប្រធានាធិបតីចិន លោក Xi Jinping ទៅកាន់ទីក្រុងហាណូយកាលពីសប្តាហ៍មុន មេដឹកនាំវៀតណាម បានធ្វើឱ្យប្រសើរឡើងនូវទំនាក់ទំនងជាមួយទីក្រុងប៉េកាំង បីខែបន្ទាប់ពីទីក្រុងហាណូយបានបង្កើនទំនាក់ទំនងជាមួយទីក្រុងវ៉ាស៊ីនតោន គ្រាដែលលោក Joe Biden បានធ្វើដំណើរទៅកាន់ប្រទេសនេះ ដើម្បីរឹតចំណង និងប្រើប្រាស់វៀតណាមជាកូនអុកក្នុងការខ្ទប់ការកើនឡើងឥទ្ធិពលរបស់ចិនក្នុងតំបន់ ក៏ដូចជានៅសមុទ្រចិនខាងត្បូង។ នៅក្នុងដំណើរកាលពីសប្តាហ៍មុននោះ មេដឹកនាំចិន និងវៀតណាម បានព្រមព្រៀង និងចុះហត្ថលេខាលើឯកសារចំនួន៣៦ផ្សេង​ៗគ្នាពាក់ព័ន្ធនឹងសន្តិសុខ យោធា សេដ្ឋកិច្ច ពាណិជ្ជកម្ម រដ្ឋបាល និងវិស័យផ្សេងទៀត។

ទោះបីជាមានខ្លឹមសារនៅក្នុងសេចក្តីថ្លែងការណ៍រួមរវាងចិន-វៀតណាមនោះត្រូវបានគេមើលឃើញថាជាសារប្រឆាំងនឹងសហរដ្ឋអាម៉េរិក និងអាចរារាំងដល់ផែនការរបស់ទីក្រុងវ៉ាស៊ីនតោន ក្នុងការធ្វើឱ្យទំនាក់ទំនងកាន់តែស៊ីជម្រៅជាមួយទីក្រុងហាណូយក្តី តែមន្ត្រីអាមេរិកនៅវៀតណាម មិនគិតដូច្នោះទេ។ យោងតាមលោក Cameron Thomas-Shah អ្នកនាំពាក្យពាក្យស្ថានទូតអាម៉េរិកប្រចាំនៅទីក្រុងហាណូយ បាននិយាយថា ទំនាក់ទំនងមិត្តភាពរវាងអាម៉េរិក និងវៀតណាម មិនបានអន់ថយដោយសារប្រទេសទីបីនោះទេ។ លោកបានបញ្ជាក់ប្រាប់រ៉យទ័រថា កិច្ចសហប្រតិបត្តិការជិតស្និទ្ធរវាងប្រទេសទាំងពីរលើវិស័យផ្សេងៗ រួមទាំងវិស័យសុខាភិបាល អប់រំ បច្ចេកវិទ្យា និងពាណិជ្ជកម្ម នឹងបន្តទៅមុខក្នុងពេលអនាគតដ៏ខ្លីខាងមុខ។

យ៉ាងណាក៏ដោយ ក្រសួងការបរទេសវៀតណាមមិនបានឆ្លើយតបទៅនឹងសំណើសុំការអត្ថាធិប្បាយបន្ថែមជុំវិញការថ្លែងនេះទេ។

គួរសម្រាបថា នៅក្នុងសេចក្តីថ្លែងការណ៍រួមដែលបានចេញផ្សាយបន្ទាប់ពីដំណើរទស្សនកិច្ចរបស់លោក ស៊ី ជិនពីង វៀតណាម និងចិនបានប្តេជ្ញាចំពោះកិច្ចសហប្រតិបត្តិការសន្តិសុខកាន់តែខ្លាំងមួយកម្រិតទៀត រួមទាំងលើឧស្សាហកម្មការពារជាតិ និងផ្នែកដឹកជញ្ជូន។ ខណៈអាម៉េរិក ក៏កំពុងធ្វើការជំរុញកិច្ចសហប្រតិបត្តិការលើវិស័យការពារជាតិជាមួយវៀតណាមផងដែរ។

បើតាមលោក Carl Thayer អ្នកជំនាញជាន់ខ្ពស់ផ្នែកសន្តិសុខវៀតណាមនៅបណ្ឌិតសភាកងកម្លាំងការពារអូស្ត្រាលីនៅទីក្រុងកង់បេរ៉ាបាននិយាយថា គោលដៅព្រមព្រៀងទាំងនោះជាមួយប្រទេសចិនទំនងជាមិនប៉ះពាល់ដល់កិច្ចសហប្រតិបត្តិការការពារជាតិជាមួយទីក្រុងវ៉ាស៊ីនតោននោះទេ។

ដោយឡែក លោក Raymond Powell អតីតមន្ត្រីអាកាសចរណ៍ប្រចាំស្ថានទូតអាម៉េរិក នៅប្រទេសវៀត​ណាម ដែលបច្ចុប្បន្នជាអ្នកដឹកនាំគម្រោង Myoushu នៅសមុទ្រចិនខាងត្បូងរបស់សាកលវិទ្យាល័យ Stanford បានឱ្យដឹងថា វាតែងតែមានភាពខុសគ្នានៃភាសាការទូត ដែលវៀតណាមប្រើជាមួយប៉េកាំង និងបញ្ហាសន្តិសុខជាក់ស្តែងរបស់ខ្លួន។ លោក រ៉ាយមុន បានបន្ថែមថា ទីក្រុងហាណូយនឹងបន្តស្វែងរកទីតាំងសុវត្ថិភាព ដោយធ្វើឱ្យមានការទុកចិត្តខាងនយោបាយពីសំណាក់ទីក្រុងប៉េកាំង និងការគំរាមកំហែងដែលចិនបង្កឡើង ជាពិសេសចំពោះបញ្ហាសមុទ្រចិនខាងត្បូងតែម្តង៕