ក្នុងនោះ មានការចំណាយថវិកាសម្រាប់គម្រោងនេះដល់ទៅ ៤៣០ពាន់លានដុល្លារអាមេរិក ហើយការអនុម័តគម្រោងដ៏សម្បើមនេះ វាក៏បានបង្ហាញពីជ័យជម្នះដ៏ធំធេងមួយសម្រាប់លោក បៃដិន នៅមុនពេលបោះឆ្នោតពាក់កណ្ដាលអាណត្តិនាពេលខាងមុខផងដែរ។
ដោយធ្វើការបោះឆ្នោតរួមគ្នា និងការជួយបោះឆ្នោតបន្ថែមសំឡេងគាំទ្រពីអនុប្រធានាធិបតីអាមេរិកលោកស្រីKamala Harrisនោះ គណបក្សប្រជាធិបតេយ្យបានឈ្នះការអនុម័តលើផែនការចំណាយ ៤៣០ពាន់លានដុល្លារ ដែលនឹងត្រូវបញ្ជូនទៅសភាតំណាងរាស្ត្រនៅសប្តាហ៍ក្រោយនេះនៅមុនពេលបញ្ជូនទៅឱ្យលោកប្រធានាធិបតីចូ បៃដិន ចុះហត្ថលេខាឱ្យចូលជាធរមាន។
ផែនការដែលត្រូវបានបង្កើតឡើងនៅក្នុងការពិភាក្សាដ៏រសើបជាមួយសមាជិកស្ដាំនិយមនៃគណបក្សប្រជាធិបតេយ្យរបស់លោក បៃដិន នេះ នឹងរួមបញ្ចូលនូវការវិនិយោគដ៏ធំបំផុតរបស់អាមេរិកមិនធ្លាប់មានពីមុនមកពាក់ព័ន្ធនឹងការប្រែប្រួលអាកាសធាតុ ដោយក្នុងនោះមានថវិកាចំនួន ៣៧០ពាន់លានដុល្លារ ត្រូវបានគ្រោងទុកប្រើប្រាស់ក្នុងបំណងបន្ថយការបំភាយឧស្ម័នផ្ទះកញ្ចក់ឱ្យបាន ៤០%នៅត្រឹមឆ្នាំ២០៣០។
អត្ថបទគួរអាន
ការអនុម័តលើផែនការនេះ នឹងផ្តល់ឱ្យលោក Biden នូវជ័យជម្នះយ៉ាងច្បាស់លាស់មួយលើរបៀបវារៈកំពូលមួយរបស់លោក និងឆ្ពោះទៅរកការស្តារឡើងវិញនូវភាពជាអ្នកដឹកនាំរបស់សហរដ្ឋអាមេរិកក្នុងការដោះស្រាយបញ្ហាអាកាសធាតុពិភពលោក។
លោក Biden បានសាទរចំពោះការអនុម័តច្បាប់នេះ ដោយគូសបញ្ជាក់ពីការងារដ៏សំខាន់មួយនេះ និងបានទទួលស្គាល់ថា មិនមែនគ្រប់គ្នាសុទ្ធតែសប្បាយចិត្តនឹងលទ្ធផលចុងក្រោយនេះទេ។
ច្បាប់នេះនឹងផ្តល់ឱ្យពលរដ្ឋអាមេរិកាំងទូទៅនូវឥណទានពន្ធ (Tax Credit) រហូតដល់ ៧ពាន់៥រយដុល្លារនៅពេលដែលពួកគេបានទិញរថយន្តអគ្គិសនីបូករួមទាំងការបញ្ចុះតម្លៃ ៣០% នៅពេលពួកគេបានដាក់ដំឡើងបន្ទះស្រូបពន្លឺព្រះអាទិត្យនៅលើដំបូលផ្ទះរបស់ពួកគេ។
ច្បាប់នេះក៏នឹងផ្តល់ប្រាក់រាប់លានដុល្លារផងដែរ ដើម្បីជួយការពារ និងអភិរក្សព្រៃឈើដែលត្រូវបានបំផ្លិចបំផ្លាញកាន់តែខ្លាំងឡើងក្នុងពេលប៉ុន្មានឆ្នាំថ្មីៗនេះដោយភ្លើងព្រៃក្នុងអំឡុងពេលរលកកម្ដៅខ្លាំងដែលអ្នកវិទ្យាសាស្ត្រនិយាយថា វាមានទំនាក់ទំនងនឹងការឡើងកម្ដៅភពផែនដី។
ឥណទានពន្ធរាប់ពាន់លានដុល្លារក៏នឹងចាក់បញ្ចូលដើម្បីដោះស្រាយបញ្ហានៅក្នុងឧស្សាហកម្មបំពុលបរិយាកាសដ៏អាក្រក់បំផុតមួយចំនួនរបស់អាមេរិកផងដែរ ដើម្បីជួយឲ្យឧស្សាហកម្មអាចផ្លាស់ប្ដូរឆ្ពោះទៅកាន់វិធីសាស្រ្តកាត់បន្ថយការប៉ះពាល់បរិស្ថានថែមទៀត។
បន្ថែមពីនេះ តាមផែនការក៏នឹងមានការចំណាយ៦៤ពាន់លានដុល្លារ សម្រាប់គំនិតផ្ដួចផ្ដើមថែទាំសុខភាព និងការធានានូវការបញ្ចុះតម្លៃឱសថមួយចំនួន ដែលតម្លៃឱសថនេះ បច្ចុប្បន្នអាចមានខ្ពស់ជាងប្រទេសប្រទេសអ្នកមានផ្សេងៗទៀតដល់ទៅ ១០ដងឯណោះ៕
