វិស័យជលផលវៀតណាមកំពុងជួបការលំបាកកាន់តែខ្លាំងឡើង ក្នុងការនាំចេញទៅកាន់ទីផ្សារប្រទេសចិន បន្ទាប់ពីអាជ្ញាធរចិនបានដាក់ការរឹតបន្តឹងលក្ខខណ្ឌនាំចូលកាន់តែខ្លាំងជាងមុន ដោយសារការភ័យខ្លាចនៃការរីករាលដាលនៃជំងឺកូវីដ១៩ ។ នេះបើយោងតាមការចុះផ្សាយដោយសារភ្នាក់ដារសារព័ត៌មានវៀតណាម។
ប្រទេសចិនបានរឹតបន្តឹងលក្ខខណ្ឌនាំចូលផលិតផលជលផលវៀតណាម ដោយសារការភ័យខ្លាចនៃការរីករាលដាលនៃជំងឺកូវីដ១៩។ យោងតាមរបាយការណ៍ពីសមាគមអ្នកនាំចេញនិងផលិតគ្រឿងសមុទ្រវៀតណាម បានឱ្យដឹងថា ក្នុងរយៈពេល ៧ ខែដំបូងការនាំចេញទៅកាន់ចិនដីគោក និងទីក្រុងហុងកុងបានធ្លាក់ចុះ ៥%មកនៅចំនួនទឹកប្រាក់ ២៣៨លានដុល្លារ បើធៀបនឹងរយៈដូចគ្នាកាលពីឆ្នាំមុន។
ចន្លោះពីថ្ងៃទី ២០ខែមិថុនា ដល់ថ្ងៃទី១៥ ខែកក្កដា ខេត្តហ្ស៊ានជាំង ដែលជាមជ្ឍមណ្ឌលដឹកជញ្ជូនទំនិញធំបំផុតរបស់ចិន បានបញ្ឈប់ការនាំចូលផលិតផលគ្រឿងសមុទ្រកក ពីប្រទេសចំនួន១១ រួមទាំងឥណ្ឌា វៀតណាម និងថៃផងដែរ ដែលប្រទេសទាំង៣នេះ គឺជាប្រទេសធំៗក្នុងការនាំចេញគ្រឿងសមុទ្រទៅចិន។ ការផ្អាកនាំចូលនេះ គឺក្រោមហេតុផលបារម្ភពីការឆ្លងរីករាលដាលកូវីដ-១៩។
អត្ថបទគួរអាន
សូមជម្រាបថា នៅត្រីមាសទី ២ ការនាំចេញត្រីប្រា ទៅប្រទេសចិនបានធ្លាក់ចុះ ១១,៤%។ ក្នុងនោះរបាយការសមាគមអ្នកនាំចេញ និងផលិតគ្រឿងសមុទ្រវៀតណាមបាននិយាយថា ការនាំចេញត្រីប្រាទៅកាន់ទីផ្សារចិនត្រូវបានគេរំពឹងថា នឹងបន្ដធ្លាក់ចុះនៅត្រីមាសទី ៣បន្តទៀត ប៉ុន្តែការធ្លាក់ចុះអាចនៅក្រោម ១០% ប្រសិនបើអាជីវកម្មជលផលអាចដំណើរការឡើងវិញបន្ទាប់ពីមានវិធានការគម្លាតសង្គម ខណៈបច្ចុប្បន្ន វៀតណាមមានក្រុមហ៊ុនប្រមាណ១០០ក្រុមហ៊ុន នាំចេញត្រីទៅកាន់ទីផ្សារចិន។
គួរជម្រាបថា ក្រៅតែពីការរឹតបន្តឹងការនាំចូលផលិផលជលផល ថ្មីៗនេះប្រទេសចិនក៏បានបញ្ឈប់ការនាំចូលកសិផលនៅតាមព្រំដនផងដែរ ជាពិសេសផ្លែស្រកានាគវៀតណាម ដោយសារការភ័យខ្លាចការរីករាលដានជំងឺកូវីដ១៩។
ទោះយ៉ាងណា ចិននៅតែជាទីផ្សារនាំចេញធំបំផុតទី ២ របស់វៀតណាម ខណៈក្នុងរយៈពេល ៧ ខែដំបូងការនាំចេញវៀតណាមទៅចិនមានតម្លៃ ជិត៣០ពាន់លានដុល្លារកើនឡើង ២៤ ភាគរយ បើធៀបនឹងរយៈពេលដូចគ្នាកាលឆ្នាំមុន។ នេះបើយោងតាមការិយាល័យស្ថិតិទូទៅវៀតណាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
