វៀតណាមកំពុងចរចាលើកលែងទិដ្ឋាការទៅវិញទៅមកជាមួយប្រទេស១៥បន្ថែមទៀត

ក្រសួងការបរទេសវៀតណាម កំពុងចរចាជាមួយប្រទេសចំនួន១៥បន្ថែមទៀត ដើម្បីលើកលែងទិដ្ឋាការទៅវិញទៅមក ខណៈបច្ចុប្បន្នវៀតណាមបាន និងកំពុងអនុវត្តគោលនយោបាយនេះជាមួយប្រទេសជាង២០រួចទៅហើយ ទាំងឯកតោភាគី ទ្វេភាគី និងថ្នាក់តំបន់។​នៅក្នុងសម័យប្រជុំរដ្ឋសភានៅដើមសប្តាហ៍នេះ លោកស្រី តា ធី យេន ( Ta Thi Yen) មន្រ្តីជំនាញខាងកិច្ចការនេះបានមានប្រសាសន៍ថា វៀត​ណាម ជាគោលដៅទេសចរណ៍ពេញនិយមសម្រាប់ភ្ញៀវទេសចរ ហើយប្រទេសនេះ បានចុះហត្ថលេខាលើកិច្ចព្រមព្រៀងលើកលែងទិដ្ឋាការជាច្រើន ដើម្បីលើកកម្ពស់វិស័យទេសចរណ៍។

ជុំវិញបញ្ហានេះ ប៊ូ ថាញ់ សាន់ (Bui Thanh Son) រដ្ឋមន្ត្រីក្រសួងការបរទេសវៀតណាម បាននិយាយថា ភាគីពាក់ព័ន្ធកំពុងធ្វើការរួមគ្នា ដើម្បីសម្រួលនីតិវិធីអន្តោប្រវេសន៍ រួមទាំងការបន្តពន្យារពេលស្នាក់នៅសម្រាប់ជនបរទេសនៅវៀតណាម។ មកដល់ពេលនេះក្រៅពីប្រទេសចំនួន១៣ ដែលវៀតណាមបានលើកលែងទិដ្ឋាការជាឯកតោភាគី នៅមានកិច្ចព្រមព្រៀងទ្វេភាគី និងតំបន់សរុបប្រមណ២៨ប្រទេស ហើយក្រសួងក៏កំពុងចរចាជាមួយប្រទេសចំនួន១៥ សម្រាប់ការលើកលែងគ្នាទៅវិញទៅមក និង៨០ប្រទេសទៀតសម្រាប់អ្នក ដែលកាន់លិខិតឆ្លងដែនផ្លូវការ។

ដោយឡែក លោក ហាវ វាន់ ខុង (Hoang Van Cuong ) សមាជិកសភារបស់ប្រទេសនេះ បាននិយាយថា វៀតណាម បានផ្តល់ការលើកលែងទិដ្ឋាការសម្រាប់ប្រទេសតិចតួចប៉ុណ្ណោះ ខណៈដែលប្រទេសផ្សេងទៀតនៅក្នុងតំបន់ដូចជាសិង្ហបុរី ម៉ាឡេស៊ី និងហ្វីលីពីន បានលើកលែងទិដ្ឋការសម្រាប់ប្រទេសជាង១៥០ ដើម្បីលើកកម្ពស់វិស័យទេសចរណ៍។

ចាប់តាំងពីខែសីហា ឆ្នាំ២០២៣មក វៀតណាមបានផ្តល់ទិដ្ឋាការអេឡិចត្រូនិកសម្រាប់គ្រប់សញ្ជាតិ និងបានពន្យាពេលការស្នាក់នៅអតិបរមារសម្រាប់ជនបរទេសពី៣០ ទៅ ៩០ថ្ងៃ និងអនុញ្ញាតឱ្យពួកគេចូលដោយគ្មានដែនកំណត់។ អ្នកដែលទទួលបានការលើកលែងទិដ្ឋាការក្រោមគោលនយោបាយលើកលែងឯកតោភាគី ឥឡូវអាចស្នាក់នៅវៀតណាមបានដល់៤៥ថ្ងៃ ខណៈដែលកាលពីមុនអាចស្នាក់នៅត្រឹម១៥ថ្ងៃប៉ុណ្ណោះ៕

ដោយៈ សរ សុជាតិ