ជុំវិញរឿងរ៉ាវនេះ មានទស្សនៈយល់ឃើញខុសៗគ្នា និងក៏ដូចជាមានការពិភាក្សាដេញដោលគ្នាច្រើនផងដែរ អំឡុង កិច្ចប្រជុំប្រចាំឆ្នាំ២០២៣ នៃវេទិកាសេដ្ឋកិច្ចពិភពលោក ដែលបាននិងកំពុងធ្វើឡើងនៅ ក្រុងដាវ៉ូស ប្រទេសស្វីស។ នេះបើតាមការចុះផ្សាយរបស់សារព័ត៌មាន Nikkei។
ទាក់ទិននឹងបញ្ហានេះ លោក វីលៀម ហ្វត(William Ford) ប្រធានប្រតិបត្តិនៅក្រុមហ៊ុន General Atlantic Partners ដែលមានមូលដ្ឋាននៅក្រុងញូវយ៉ក សហរដ្ឋអាមេរិក បានថ្លែងថា ការបើកប្រទេសចិនឡើងវិញ នឹងនាំឱ្យមានកំណើនសេដ្ឋកិច្ចសាកលកើនដល់ ៤% ដែលវាជាសញ្ញាវិជ្ជមានមួយសម្រាប់ពិភពលោក។ លោកមើលឃើញថា ការចាកចេញពីការបិទខ្ទប់ និងគ្រប់គ្រងបានល្អលើជំងឺរាតត្បាត គឺជាចំណុចស្នូលឆ្ពោះទៅរកកំណើនសេដ្ឋកិច្ច។
ស្រដៀងគ្នានេះដែរ លោកស្រី នេឡា រីឆាតសុន(Nela Richardson) ប្រធានសេដ្ឋវិទូនៅក្រុមហ៊ុន ADP បានលើកឡើងថា វាមានឥទ្ធិពលដោយប្រយោលទៅលើការងើបឡើងវិញរបស់ចិន។ លោកស្រីបញ្ជាក់ថា វាមិនត្រឹមតែជាការទិញលក់ជាមួយចិនផ្ទាល់នោះទេ ប៉ុន្តែវាក៏ជាការទិញលក់តាមរយៈចិន និងរបៀបដែលឥទ្ធិពលនេះបានជះចូលក្នុងតំបន់អាស៊ីប៉ាស៊ីហ្វិកផងដែរ។ នេះក៏ដោយសារតែប្រទេសចិន ជាទីផ្សារធំណាស់ជាមួយនឹងតម្រូវការសម្រាប់ប្រជាជនទាំងជាង១ពាន់៤រយលាននាក់។
ជាមួយគ្នានេះ បើតាមការលើកឡើងរបស់លោក រ៉េកហ៊ូរ៉ាម រ៉ាចាន់(Raghuram Rajan) សាស្រ្តាចារ្យហិរញ្ញវត្ថុនៅសាកលវិទ្យាល័យ Chicago និងជាអតីតប្រធានធនាគារកណ្តាលឥណ្ឌាបង្ហាញទស្សនថា សេដ្ឋកិច្ចរបស់ចិន អាចនឹងងើបឡើងវិញនៅយ៉ាងយូរត្រឹមខែមីនា។ លោកបានមើលឃើញពីភាពប្រសើរឡើងនូវវិស័យទេសចរណ៍ ដែលជាសញ្ញាវិជ្ជមានសម្រាប់ពិភពលោក បើទោះបីជាស្ថានភាពគ្រួសាររបស់ប្រជាជនចិន នៅមានហានិភ័យនៃភាពមិនប្រាកដប្រជានៃការឆ្លងរាតត្បាតជំងឺកូវីដ១៩ក៏ដោយ។
អត្ថបទគួរអាន
យ៉ាងណាក៏ដោយចុះ លោក ហ្គីល ម៉ូ(Gilles Moec) ប្រធានសេដ្ឋវិទូនៅក្រុមហ៊ុនវិនិយោគ AXA បានបង្ហាញទស្សនៈផ្ទាល់ខ្លួនថា វាហាក់ដូចជាឆាប់រហ័សពេកក្នុងការសន្និដ្ឋានពីឥទ្ធិពលនៃការបើកប្រទេសចិនឡើងវិញ។ លោកពន្យល់ថា ចិន គឺស្ថិតនៅក្នុងស្ថានភាពដាច់ដោយឡែកមួយ មិនដូចដែលយើងធ្លាប់ឃើញនៅក្នុងប្រទេសផ្សេងៗឡើយ។ ដូច្នេះគេត្រូវការពេលបន្តិច ជាពិសេសគឺមើលទៅលើប្រព័ន្ធសុខាភិបាលរបស់ចិន ថាអាចទប់ទល់នឹងរលកឆ្លងនាពេលនេះបានកំរិតណា។
ចំណែកការលើកឡើងរបស់លោក Kevin Rudd អតីតនាយករដ្ឋមន្រ្តីអូស្ត្រាលី និងបច្ចុប្បន្នជាប្រធានអង្គការសង្គមអាស៊ី (Asia Society) ឱ្យដឹងថា ប្រសិនបើចិនសម្រេចបានកំណើនក្នុងរង្វង់ជាង៥%សម្រាប់ឆ្នាំ២០២៣នេះ នោះវាពិតជាបានជួយទ្រទ្រង់យ៉ាងច្រើនដល់កំណើនសេដ្ឋកិច្ចសាកល។ យ៉ាងណាមិញ លោកក៏បានព្រមានពីភាពតានតឹងភូមិសាស្រ្តនយោបាយ និងសង្គ្រាមបច្ចេកវិទ្យារវាងអាមេរិក និងចិនផងដែរ ដែលនឹងបង្អាក់ដល់កំណើនសេដ្ឋកិច្ចសាកលវិញ។
មិនខុសគ្នាប៉ុន្មានពីលោក Kevin Rudd នោះទេ សេដ្ឋវិទូជាន់ខ្ពស់នៅធនាគារវិនិយោគបារាំង Natixis គឺលោក ហ្គារី ណេង(Gary Ng) និយាយថា ចិនបានក្លាយជាប្រធានបទទាក់ទាញក្នុងរយៈពេលថ្មីៗនេះ។ ការបើកប្រទេសឡើងវិញនេះ នឹងនាំដល់ការបើកវិស័យសំខាន់ៗដូចជា បច្ចេកវិទ្យា និងអចលនទ្រព្យទៅកាន់ពិភពលោក។ ប៉ុន្តែលោកក៏បានបង្ហាញក្តីបារម្ភចំពោះភាពតានតឹងរវាងអាមេរិក និងចិនផងដែរ ដែលអាមេរិកអាចនឹងហាមឃាត់លើវិស័យណាមួយរបស់ចិននាពេលខាងមុខ។
យ៉ាងណាមិញ លោក ដុង ឈិន(Dong Chen) ប្រធានផ្នែកស្រាវជ្រាវម៉ាក្រូសេដ្ឋកិច្ចអាស៊ី នៅក្រុមហ៊ុន Pictet Wealth Management បានគូសបញ្ជាក់ថា បញ្ហាវិស័យអចលនទ្រព្យរបស់ចិន បានធ្វើឱ្យមានមន្ទិលសង្ស័យពីសក្តានុពលសេដ្ឋកិច្ចរបស់ប្រទេសនេះ។ ម្យ៉ាងវិញទៀត ចំនួនប្រជាជនចិនដែលបានធ្លាក់ចុះ ក៏នឹងជះឥទ្ធិពលកាន់តែអាក្រក់ចំពោះវិស័យនេះផងដែរ៕
