បើតាមអ្នកនាំពាក្យរបស់លោកប្រធានាធិបតីស្រីលង្កាបាននិយាយថា លោក Gotabaya Rajapaksa បានបញ្ជូនលិខិតលាលែងពីតំណែងរបស់លោក តាមរយៈអ៊ីមែលកាលពីល្ងាចថ្ងៃព្រហស្បតិ៍ ហើយសារលិខិតនេះ នឹងចូលជាធរមានផ្លូវការនៅថ្ងៃសុក្រ នៅពេលដែលឯកសារនេះត្រូវបានផ្ទៀងផ្ទាត់ស្របតាមច្បាប់សភា។
គួរជម្រាបថា បើយោងប្រភពច្បាស់ការបានប្រាប់ឲ្យដឹងថា លោក Rajapaksa បានភៀសខ្លួនទៅកាន់ប្រទេសម៉ាល់ឌីវកាលពីថ្ងៃពុធ បន្ទាប់មកធ្វើដំណើរទៅកាន់ប្រទេសសិង្ហបុរីនៅថ្ងៃព្រហស្បតិ៍តាមជើងហោះហើររបស់ក្រុមហ៊ុនអាកាសចរណ៍អារ៉ាប៊ីសាអូឌីត។
ទន្ទឹមនឹងនេះដែរ រដ្ឋាភិបាលប្រទេសម៉ាល់ឌីវបានបញ្ជាក់កាលពីល្ងាចថ្ងៃព្រហស្បតិ៍ថា ប្រទេសខ្លួនបានបើកផ្លូវជាលក្ខណៈការទូត ដើម្បីទទួលយន្តហោះកងទ័ពអាកាសស្រីលង្កា ដែលដឹកប្រធានាធិបតី Gotabaya Rajapaksa និងភរិយារបស់លោកនៅពេលហោះចូលក្នុងប្រទេសម៉ាល់ឌីវ។
លើសពីនេះ ក្រសួងការបរទេសសិង្ហបុរីបាននិយាយដែរថា លោក Rajapaksa បានធ្វើដំណើរចូលប្រទេសខ្លួនក្នុងដំណើរទស្សនកិច្ចជាលក្ខណៈឯកជន ហើយមិនបានសុំសិទ្ធិជ្រកកោនអ្វីនៅឡើយទេ។
ទោះបីជាយ៉ាងណា មុនការផ្ទុះមហាបាតុកម្មទំលាក់រដ្ឋាភិបាលរបស់ត្រកូល រ៉ាចាប៉ាសា ប្រទេសស្រីលង្កាបានចាប់ផ្តើមការពិភាក្សជាមួយអង្គការមូលនិធិរូបិយវត្ថុអន្តរជាតិ (IMF) អំពីការស្នើសុំមូលនិធិកម្ចីដើម្បីសង្គ្រោះសេដ្ឋកិច្ចជាតិ ប៉ុន្តែវាត្រូវបានរំខានដោយសារអស្ថិរភាពនយោបាយនៅចុងក្រោយនេះ។
អត្ថបទគួរអាន
ក្នុងនោះដែរ អ្នកនាំពាក្យ IMF លោកហ្កើរី រ៉ាយស៍ (Gerry Rice) បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា មន្ត្រី IMF នៅតែទាក់ទងជាមួយមន្ត្រីរដ្ឋាភិបាលស្រីសង្កា ដើម្បីពិភាក្សាអំពីរឿងនេះ ក៏ប៉ុន្តែលោកសង្ឃឹមថា យើងនឹងធ្វើឲ្យមានការវិវត្ត «ឱ្យបានឆាប់ជាងនេះតាមដែលអាចធ្វើទៅបាន»។
សូមរំលឹកថយក្រោយបន្តិចថា ក្រោយលោករ៉ាចាប៉ាកសាប្រកាសឲ្យ លោករ៉ានីល Ranil ធ្វើជាប្រធានាធិបតីស្ដីទីជំនួសរូបលោកមុនការលាលែងនោះ ក៏បានបង្កឱ្យមានការតវ៉ាកាន់តែច្រើនថែមទៀតដោយក្រុមបាតុករបានសម្រុកចូលសភា និងការិយាល័យនាយករដ្ឋមន្ត្រី ដោយនៅតែបន្ដទាមទារឱ្យមេដឹកនាំកំពូលទាំងពីរនាក់នេះ លាលែងពីតំណែងព្រមគ្នាតែម្តង។
ទោះយ៉ាងណា មកទល់នឹងថ្ងៃព្រហស្បតិ៍នេះតាមការរាយការណ៍របស់ទីភ្នាក់ងារព័ត៌មានរ៉យទ័របានឲ្យដឹងថា សកម្មភាពមហាបាតុកម្មហាក់មានស្ងប់ស្ងាត់បន្ដិចវិញហើយ។
គេមិនដឹងទេថា តើវាសនាប្រទេសកោះមួយនេះនឹងទៅជាយ៉ាងណា! តែគេអាចមានសង្ឃឹមដោយមើសឃើញថា សភាស្រីលង្កានឹងបោះឆ្នោតជ្រើសតាំងប្រធានាធិបតីថ្មីនៅថ្ងៃទី២០ ខែកក្កដានេះ តាមរដ្ឋធម្មនុញ្ញ ហើយបេក្ខភាពប្រធានាធិបតីថ្មីអាចជាមេដឹកនាំដ៏លេចធ្លោ មកពីគណបក្សប្រឆាំង ដែលមិនមែនជាសែស្រឡាយត្រកូលរ៉ាចាប៉ាសាទៀតឡើយ៕
