ខណៈដែលប្រទេសនេះ កំពុងខ្វះខាតសាច់ប្រាក់រូបិយវត្ថុបរទេស ដើម្បីនាំចូលទំនិញ ហើយបញ្ហានេះក៏ធ្វើឲ្យមានវិបត្តិសេដ្ឋកិច្ចធ្ងន់ធ្ងរនៅក្នុងប្រទេសស្រីលង្កាផងដែរ។ នេះបើយោងតាមសេចក្ដីថ្លែងការណ៍មួយរបស់លោកប្រធានាធិបតីប្រទេសស្រីលង្កា ដែលបានចេញផ្សាយថ្មីៗនេះ។
វិបត្តិហិរញ្ញវត្ថុដ៏អាក្រក់បំផុតរបស់ប្រទេសស្រីលង្កា ចាប់តាំងពីទទួលបានឯករាជ្យនៅឆ្នាំ ១៩៤៨ ដែលបានបង្កឡើងដោយការធ្លាក់ចុះយ៉ាងខ្លាំងនៃទុនបម្រុងអន្តរជាតិរបស់ខ្លួន ខណៈនាពេល ២ ឆ្នាំចុងក្រោយនេះ ទុនបម្រុងអន្តរជាតិនេះ បានធ្លាក់ចុះរហូតដល់ ៧០% ដោយមានត្រឹមតែជិត ២ពាន់លានដុល្លារប៉ុណ្ណោះនៅចុងខែមីនាកន្លងទៅ។
ការធ្លាក់ចុះនូវទុនបម្រុងអន្តរជាតិនេះ បានធ្វើឱ្យប្រទេសស្រីលង្កាជួបការលំបាកក្នុងការចំណាយសម្រាប់សម្ភារៈសំខាន់ៗ រួមទាំងប្រេងឥន្ធនៈ ថ្នាំពេទ្យ និងស្បៀងអាហារជាដើម។ កត្តាទាំងអស់នេះ បានជំរុញឲ្យស្រីលង្កា ជួបនូវបញ្ហាអសន្តិសុខសង្គម និង ធ្លាក់ចូលទៅក្នុងវិបត្តិសេដ្ឋកិច្ចយ៉ាងធ្ងន់ធ្ងរ។ ប្រទេសដីកោះមួយនេះ ក៏ត្រូវបានគេដឹងថា បានជំពាក់បំណុលបរទេសជាច្រើនសន្ធឹកសន្ទាប់ផងដែរ ខណៈនៅក្នុងគ្រាដ៏លំបាកនៃវិបត្តិហិរញ្ញវត្ថុនេះ ស្រីលង្កាបានព្យាយាមស្នើរសុំកម្ចីពីក្រៅប្រទេស និង ធនាគាអន្តជាតិជាច្រើន។ ក៏ប៉ុន្តែ ធនាគាអន្តជាតិភាគច្រើន គឺមានក្តីបារម្ភខ្លាចប្រទេសនេះ គ្មានលទ្ធភាពសងត្រឡប់មកវិញ ចំពេលដែលសេដ្ឋកិច្ចបានដាំក្បាលចុះទៅហើយនោះ។
យ៉ាងណាក៏ដោយចុះ ធនាគារពិភពលោកនៅចុងក្រោយនេះ បានយល់ព្រមផ្តល់ជំនួយហិរញ្ញវត្ថុចំនួន ៦០០លានដុល្លារឲ្យស្រីលង្កា ដើម្បីដោះស្រាយវិបត្តិសេដ្ឋកិច្ចបច្ចុប្បន្ន ។ ក្នុងនោះ ធនាគារពិភពលោកនឹងបញ្ចេញសាច់ប្រាក់ចំនួន ៤០០លានដុល្លារទៅមុនក្នុងរយៈពេលខ្លី ដល់ប្រទេសស្រីលង្កា។
អត្ថបទគួរអាន
យោងតាមសេចក្តីថ្លែងការណ៍ ធនាគារពិភពលោកបាននិយាយថា ខ្លួននឹងបន្តជួយប្រទេសស្រីលង្កា ដើម្បីជម្នះនូវវិបត្តិសេដ្ឋកិច្ចដ៏ធ្ងន់ធ្ងរនាពេលបច្ចុប្បន្ននេះ។
កាលពីដើមខែនេះ ស្រីលង្កាក៏បានចាប់ផ្តើមកិច្ចពិភាក្សាជាមួយមូលនិធិរូបិយវត្ថុអន្តរជាតិ (IMF) សម្រាប់ជំនួយហិរញ្ញវត្ថុផងដែរ។ ក៏ប៉ុន្តែខាង IMF អះអាងថា មុននឹង មូលនិធិរូបិយវត្ថុអន្តរជាតិ អាចផ្តល់កម្ចីសម្រាប់ស្រីលង្កាបានលុះត្រាតែ ប្រទេសនេះមានហិរញ្ញប្បទានបម្រុងពី ៣ ទៅ ៤ ពាន់លានដុល្លារសិន ដើម្បីធានាលើការបង់សងបំណុលជាទៀងទាត់ទៅកាន់មូលនិធិរូបិយវត្ថុអន្តរជាតិវិញ។ ស្របពេលជាមួយគ្នានោះ រដ្ឋាភិបាលស្រីលង្កាក៏បានអំពាវនាវដល់ប្រទេសជាច្រើន និងអង្គការពហុភាគី សម្រាប់ការផ្តល់ហិរញ្ញប្បទានជាស្ពាន ដើម្បីឲ្យខ្លួនទទួលបានកម្ចីពីមូលនិធិរូបិយវត្ថុអន្តរជាតិផងដែរ។
គួរកត់សម្គាល់ថា ប្រទេសឥណ្ឌាបានជួយស្រីលង្កាដោយផ្តល់ហិរញ្ញប្បទានជិត២ពាន់លានដុល្លារ ហើយថ្មីៗនេះប្រទេសកោះស្រីលង្កាមួយនេះ កំពុងពិភាក្សាជាមួយឥណ្ឌា សម្រាប់ទឹកប្រាក់បន្ថែមចំនួន ១ពាន់៥ រយលានដុល្លារ ដើម្បីផ្តល់មូលនិធិដល់ការនាំចូលរួមទាំងប្រេងឥន្ធនៈផងដែរ។
ប្រទេសស្រីលង្កាក៏កំពុងចរចាជាមួយចិន អំពីការស្នើសុំប្រាក់កម្ចីបន្ថែមចំនួនទឹកប្រាក់ ១ ពាន់លានដុល្លារទៀត ហើយថ្មីនេះរដ្ឋាភិបាលស្រីលង្កាក៏បានអះអាងដែរថា ខ្លួនក៏កំពុងចរចាជាមួយប្រទេសចិនឲ្យមានការបន្ធូរបន្ថយបំណុលដែលខ្លួនជំពាក់ចិនផងដែរ តាមរយៈការរៀបចំរចនាសម្ព័ន្ធបំណុលឡើងវិញ។
គួរជម្រាបថា បើតាមរដ្ឋមន្ត្រីហិរញ្ញវត្ថុស្រីលង្កា Ali Sabry បាននិយាយថា ប្រទេសស្រីលង្កា ក៏នឹងស្វែងរកជំនួយពីធនាគារអភិវឌ្ឍន៍អាស៊ីផងដែរ។ ខណៈនាពេលបច្ចុប្បន្ន ប្រទេសនេះបានប្រកាសផ្អាកលើការសងបំណុលបរទេសមួយចំនួនរបស់ខ្លួនកាលពីដើមខែនេះ នៃបំណុលបរទេសសរុបដែលខ្លួនកំពុងមានជាង ៥០ពាន់លានដុល្លារ៕
អត្ថបទ៖ វ៉ាន់ ស្រីរ័ត្ន
