ការបោះឆ្នោតនៅក្នុងព្រឹទ្ធសភាក្នុងសំឡេងគាំទ្រ ៥០ ទល់៤៩ សំឡេង លើការបង្កើនកម្រិតបំណុលជាតិរបស់អាមេរិក ត្រូវបានធ្វើឡើងត្រឹមតែ១ថ្ងៃប៉ុណ្ណោះ បន្ទាប់ពីមានការកំណត់នូវថ្ងៃផុតកំណត់ដោយរដ្ឋមន្ត្រីក្រសួងហិរញ្ញវត្ថុអាមេរិក លោកស្រី ចេនេត យេឡែន ដែលកាលពីខែមុនលោកស្រី បានព្រមានថា លោកស្រីអស់វិធីសាស្ត្រហើយ ក្នុងការបញ្ជៀសនូវការខកខានការទូទាត់ចំណាយរបស់រដ្ឋាភិបាល ប្រសិនបើមិនមានការបង្កើនកម្រិតបំណុលទេនោះ។ ឥឡូវនេះ វិធានការដំឡើងកម្រិតបំណុល រដ្ឋាភិបាលអាមេរិក កំពុងរំកិលទៅដល់រដ្ឋសភាអាមេរិកហើយ ដែលអាចនឹងមានការបោះឆ្នោតសម្រេចនៅក្នុងសប្ដាហ៍នេះ រួចហើយនឹងត្រូវបញ្ជូនទៅដល់តុប្រធានាធិបតីអាមេរិក លោក ចូបៃឌិន ដើម្បីចុះហត្ថលេខា សម្រេចចុងក្រោយ។
បច្ចុប្បន្ន កម្រិតបំណុលរបស់សហរដ្ឋអាមេរិកមានប្រមាណ ២៩ទ្រីលានដុល្លារ ដែលបាននិងកំពុងកើនឡើងអស់រយៈពេលជាច្រើនទសវត្សរ៍មកហើយ។ កត្តាដែលធ្វើឲ្យបំណុលរបស់រដ្ឋាភិបាលអាមេរិកកើនឡើងខ្លាំងរួមមាន កម្មវិធីចំណាយដ៏ពេញនិយម ដូចជា សន្ដិសុខ និងសុខាមាលភាពសង្គម, ការសងការប្រាក់នៃបំណុលដែលជំពាក់ និងថ្មីៗនេះ អាមេរិកក៏មានការចំណាយច្រើនទៅលើកញ្ចប់ថវិកាប្រយុទ្ធប្រឆាំងកូវីដ១៩ផងដែរ។ បញ្ហាកាត់បន្ថយពន្ធ ក៏ជាកត្តាធ្វើឲ្យបំណុលអាមេរិកប៉ោងឡើងខ្លាំងដែរ ដោយកន្លងមក ប្រធានាធិបតីដែលមកពីគណៈបក្សសាធារណៈរដ្ឋ មានគោលនយោបាយកាត់បន្ថយពន្ធនៅក្នុងអំឡុងពេលប៉ុន្មានទសវត្សរ៍មកនេះ។
ក្នុងចំណោមទំហំបំណុលជាតិដែលអាមេរិកមាន ក្នុងនោះមាន ៧,៨ទ្រីលានដុល្លារ គឺបានកើនឡើងនៅក្នុងអំឡុងពេលលោកដូណាល់ត្រាំ ធ្វើជាប្រធានាធិបតីក្នុងរយៈពេល៤ឆ្នាំ នេះបើតាមការវិភាគរបស់ក្រសួងហិរញ្ញវត្ថុអាមេរិក។ ខណៈដែល ការកាត់បន្ថយពន្ធវិញ ក៏បានបន្ថែមបន្ទុកបំណុលដល់រដ្ឋាភិបាលប្រមាណ ១ទៅ ២ទ្រីលានដុល្លារអាមេរិកផងដែរ៕
