ថ្លែងនៅក្នុងឱកាសទទួលវ៉ាក់សាំងកូវីដ១៩ប្រភេទ Sinovac ដែលជាជំនួយឥតសំណងរបស់ប្រទេសចិនដែលបានផ្ដល់ជួនចំនួន ២លានដូសបន្ថែមមកឲ្យកម្ពុជានៅព្រឹកថ្ងៃទី ១៤ ខែតុលា លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលបានបញ្ជាក់ថា នៅក្នុងចំណោមវ៉ាក់សាំងដែលទទួលបានសរុបជាង ៣៦លានដូសនោះ វ៉ាក់សាំងដែលជាជំនួយពីប្រទេសចិនមានចំនួន៧លាន៥សែនដូស។
លោកជំទាវបន្ថែមថា កម្ពុជាមានវ៉ាក់សាំងកូវីដ១៩ គ្រប់គ្រប់គ្រាន់សម្រាប់ការជូនប្រជាពលរដ្ឋទាំងដូសជំរុញក៏ដូចជា សម្រាប់យុទ្ធនាការណ៍ចាក់ជូនកុមារដែលមានអាយុចាប់ពី៦ឆ្នាំឡើងទៅផងដែរ ស្របទៅតាមគោលដៅដែលបានកំណត់។
អត្ថបទគួរអាន
ក្រសួងសុខាភិបាល ក៏បានអំពាវនាវ ឲ្យប្រជាពលរដ្ឋទាំងអស់មានការចូលទទួលការចាក់វ៉ាក់សាំងកូវីដ១៩ទាំងអស់គ្នា ដើម្បីទប់ស្កាត់នៃការឆ្លង និងមិនតែប៉ុណ្ណោះកាត់បន្ថយអាត្រានៃអ្នកស្លាប់ដោយសារតែកូវីដ១៩នេះ ខណៈនៅពេលនេះអាត្រានៃការឆ្លងប្រចាំថ្ងៃមានកម្រិតថយចុះ ហើយចំណែកឯអ្នកដែលបានស្លាប់នោះភាគច្រើនសុទ្ធតែជាអ្នកដែលមិនបានទទួលការចាក់វ៉ាក់សាំងកូវីដ១៩ ដើម្បីការពារ។
សូមជម្រាបថា គិតត្រឹមថ្ងៃទី១៤ ខែតុលា កម្ពុជារកឃើញករណីកូវីដ១៩ថ្មី ចំនួន២៦៨នាក់ និងមានករណីជាសះស្បើយចំនួន ៣៥៩នាក់ និងស្លាប់២៥នាក់។ សរុបករណីឆ្លងកូវីដ១៩ទាំងអស់នៅកម្ពុជាមានចំនួនជាង ១១ម៉ឺននាក់ ជាសះស្បើយចំនួនប្រមាណ១០ម៉ឺន៩ពាន់នាក់ និងមានករណីស្លាប់សរុបមានជាង ២ពាន់៥រយនាក់។
ដោយឡែក ការចាក់វ៉ាក់សាំងវិញ គិតមកត្រឹមថ្ងៃទី១៣ ខែតុលា អត្រាអ្នកចាក់វ៉ាក់សាំងនៅកម្ពុជាមានចំនួន ៩៩,៣២%ហើយនៃផែនការចាក់វ៉ាក់សាំងជូនពលរដ្ឋពេញវ័យ១០លាននាក់។ រីឯ ការចាក់ដូសជំរុញវិញ គឺមានពលរដ្ឋជាង១លាន១សែននាក់ហើយ ដែលបានចាក់ដូសជំរុញ ឬដូសទី៣នេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
