មុនមានការលើកលែងការដាក់ពិន័យខាងលើ អ្នកនាំចេញគ្រឿងសមុទ្រវៀតណាម ធ្លាប់ប្រឈមមុខនឹងការឃាត់ទុកទូកុងតឺន័ររបស់ពួកគេ រយៈពេលប្រាំពីរថ្ងៃ សម្រាប់រាល់កុងតឺន័រណា ដែលរកឃើញថា មានផ្ទុកមេរោគកូវីដ១៩។ ការអនុវត្តដូច្នេះ ពីអាជ្ញាធរចិន គឺស្របទៅតាមគោលនយោបាយគ្មានកូវីដ១៩ដ៏តឹងរ៉ឹងរបស់រដ្ឋាភិបាលក្រុងប៉េកាំង។
ប្រភពពីក្រុមហ៊ុនដឹកជញ្ជូនវៀតណាមមួយ ដែលធ្លាប់ត្រូវបានអាជ្ញាធរចិនឃាត់ទូកុងតឺន័រទុកអស់ពេល៣សប្តាហ៍ ប្រាប់វៀតណាម Express ថា ពេលនេះលំហូរចរាចរណ៍កុងតឺន័រទាំងអស់ត្រឡប់មករកភាពប្រក្រតីវិញហើយ។
ទាំងនេះបង្ហាញថា ប្រទេសចិនកំពុងព្យាយាមកាត់បន្ថយផលប៉ះពាល់លើសេដ្ឋកិច្ច ដែលបង្កឡើងដោយយុទ្ធសាស្ត្រកូវីដស្មើសូន្យសរបស់ខ្លួន។ ដូច្នេះហើយការនាំចេញនាំចូលក្នុងនិងក្រៅប្រទេសឥឡូវនេះ គឺកាន់តែងាយស្រួលជាងមុន។
អត្ថបទគួរអាន
គួរជម្រាបថា ក្រុមហ៊ុននាំចេញរបស់វៀតណាមរាប់សិបក្រុមហ៊ុន សុទ្ធតែបានទទួលពិន័យឃាត់ទុកទូកុងតឺន័រនេះ មានខ្លះត្រូវឃាត់ទុករាប់សប្តាហ៍ និងខ្លះទៀតឈានដល់រាប់ខែ ដោយសារចំនួនកុងតឺន័រច្រើន បានរកឃើញថាមានមេរោគកូវីដ១៩។
បើយោងតាមសមាគមអ្នកនាំចេញផលិតអាហារសមុទ្រ វៀតណាមបាននាំចេញគ្រឿងសមុទ្រដែលមានតម្លៃសរុបជាង ៤២០លានដុល្លារអាមេរិកទៅកាន់ប្រទេសចិនក្នុងរយៈពេលប្រាំមួយខែដំបូងឆ្នាំ២០២២នេះ កើនឡើង១០៧% បើធៀបនឹងរយៈពេលដូចគ្នាកាលពីឆ្នាំមុន។
សមាគមន៍រំពឹងថា ការនាំចេញគ្រឿងសមុទ្រវៀតណាម ទៅកាន់ប្រទេសចិននឹងកើនឡើងបន្ថែមទៀត ក្នុងឆមាសទីពីរនៃឆ្នាំនេះ បន្ទាប់ពីមានការបន្ធូរបន្ថយវិធានការសុវត្ថិភាពកូវីដ១៩ ជាបន្តបន្ទាប់ពីរដ្ឋាភិបាលក្រុងប៉េកាំង៕
