តម្លៃប្រេងឆៅពិភពលោកហក់ឡើងក្រឺតដល់ ១០០ដុល្លារក្នុងមួយធុងបារ៉ែល ក្រោយសង្គ្រាមរុស្ស៊ី-អ៊ុយក្រែផ្ដើមឡើង

ព្រឹកព្រលឹមស្រាង​នៅថ្ងៃទី ២៤ ខែកុម្ភៈនេះ គេបានលឺ​សំឡេងបំផ្ទុះគ្រាប់បែកជាច្រើន នៅក្បែរទីក្រុង​ ហើយបើតាម​ការអះអាង​របស់​រដ្ឋមន្ត្រីការបរទេស​អ៊ុយក្រែន បានអះអាងថា រុស្ស៊ីបាន​ចាប់ផ្ដើម​វាយប្រហារឈ្លានពានពេញទំហឹង ទៅលើ​អ៊ុយក្រែនហើយ ហើយ​មានកំពុង​កំណត់គោលដៅទីក្រុងនានា សម្រាប់ការវាយប្រហារដោយអាវុធផងដែរ។

ក្រោយពីមាន​ការផ្ទុះសង្គ្រាមបានចាប់ផ្ដើម តម្លៃប្រេងឆៅនៅអង់គ្លេស​​នៅម៉ោងជួញដូរដំបូងនៅអាស៊ី បាន​ហក់ឡើងខ្ពស់ដលទៅ ១០១ដុល្លារ៣៤សេន កើនឡើងជាង៤ដុល្លារបន្ថែមទៀត ធៀបនឹងតម្លៃកាលពីម្សិលមិញ។ តម្លៃប្រេងនៅថ្ងៃទី ២៤កុម្ភៈ ជាតម្លៃខ្ពស់បំផុតមិនធ្លាប់មានឡើយគិតតាំងពីខែកញ្ញាឆ្នាំ២០១៤មក។ 

ដោយឡែក តម្លៃប្រេងនៅអាមេរិកវិញ បាន​កើនឡើងជាង៤ដុល្លារបន្ថែមទៀតដូចគ្នាដែរ នាំឲ្យ​មួយប្រេងធុងបារ៉ែល​មានតម្លៃដល់ ៩៦ដុល្លារ​៣២សេន។

តម្លៃប្រេងហក់ឡើងខ្ពស់នេះ ដោយសារតែ​មានក្ដីបារម្ភថា បញ្ហាសង្គ្រាម​រវាងរុស្ស៊ី និងអ៊ុយក្រែន​ គឺនឹងអាចធ្វើឲ្យប៉ះពាល់ធ្ងន់ធ្ងរ​ដល់​ការផ្គត់ផ្គង់​ប្រេង​សកលលោក។ អ្នកជំនាញ ធ្លាប់បានព្រមានថា តម្លៃប្រេង​អាចនឹង​កើនដល់​១២០ដុល្លារក្នុងមួយធុងបារ៉ែល ប្រសិនបើ​វិបត្តិអ៊ុយក្រែនមានស្ថានការកាន់តែអាក្រក់ទៅៗ៕