នៅមួយរយៈពេលកន្លងមកនេះ ក្រុងប៉េកាំង បានចាត់វិធានការជាច្រើនលើការរំលោភសេចក្តីទុកចិត្តរបស់ក្រុមហ៊ុនធំៗ មកលើអតិថិជន ការរឹតត្បិតលើការខ្ចីប្រាក់របស់ក្រុមហ៊ុនអចលនទ្រព្យ គួបផ្សំនឹងការដាក់គំនាបលើក្រុមហ៊ុនចិនដែលចុះបញ្ជីនៅក្រៅប្រទេសជាដើម។
អ្នកវិភាគសេដ្ឋកិច្ចរំពឹងថា សកម្មភាពទាំងនេះ នឹងបន្តកើតមានទៀតនៅក្នុងឆ្នាំ២០២២ ដោយនឹងពង្រីកបន្ថែមលើវិធានការមួយចំនួនដូចជា ការការពារលើទិន្នន័យឯកជនរបស់ក្រុមហ៊ុនណា ដែលចាត់ទុកថា អាចប៉ះពាល់ដល់សន្តិសុខជាតិចិន។ លើសពីនេះ ការឃ្លាំមើលលើវិស័យឯកជន ក៏ទំនងជាត្រូវបានក្រុងប៉េកាំង អនុវត្តផងដែរ ចាប់ពីឆ្នាំក្រោយនេះតទៅ។
ស្របពេលដែលអ្នកវិភាគមើលឃើញពីវិធានការបន្ថែម ដែលទំនងជាអាចដាក់ចេញនោះ និយ័តករចិន គ្រោងនឹងហាមប្រាមឈ្មួញកណ្តាលតាមអ៊ិនធឺណេត ពីការផ្តល់ជូនសេវាកម្មជួញដូរមូលបត្រ ទៅក្រៅប្រទេសដល់អតិថិជននៅចិនដីគោក ដោយសារការព្រួយបារម្ភអំពីសុវត្ថិភាពទិន្នន័យ និងលំហូរមូលធនចេញទៅក្រៅប្រទេសជាដើម។នេះបើការចុះផ្សាយដោយទីភ្នាក់ងារសារព័ត៌មានរ៉យទ័រ។
អត្ថបទគួរអាន
សូមជម្រាបថា ដោយសារតែគោលនយោបាយតឹងរឹងរបស់រដ្ឋអំណាចចិន ក្រោមការគ្រប់គ្រងរបស់បុរសខ្លាំងកណ្តាប់ដៃដែក លោក ស៊ី ជីនពីង នេះហើយ ទើបបានធ្វើឲ្យក្រុមហ៊ុនចិនធំៗជាច្រើន បានខ្ទាតចេញពីកំពូលក្រុមហ៊ុន លំដាប់កំពូលទាំង១០ របស់ពិភពលោក។
ជាក់ស្តែង ក្រុមហ៊ុនយក្សចិនចំនួន ២ គឺ Tencent និង Alibaba ដែលធ្លាប់តែមានឈ្មោះក្នុង បញ្ជីកំពូលក្រុមហ៊ុនទាំង ១០របស់ពិភពលោក បានបាត់ឈ្មោះខ្ទាតចេញពីតារាង ក្រោយតម្លៃទីផ្សាររបស់ក្រុមហ៊ុនទាំងពីរនេះ បានធ្លាក់ចុះយ៉ាងខ្លាំង។ ធ្លាក់ចុះក៏ដោយសារតែ នៅមួយរយៈចុងក្រោយនេះ ក្រុមហ៊ុនទាំងពីរនេះ បានរងការបង្ក្រាបផ្នែក បច្ចេកវិទ្យាពីរដ្ឋាភិបាលក្រុងប៉េកាំង គួបផ្សំនឹងភាពតានតឹងធ្វើទុក្ខបុកម្និញពីសហរដ្ឋអាមេរិក និង ប្រទេសចិនផងនោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
