ការអះអាងដូចគ្នានេះ ក៏មានដែរពីខាងអង្គការសហប្រជាជាតិ និង កាកបាទក្រហមអន្តរជាតិ ដែលកំពុងបំពេញការងារមនុស្សធម៌ គាំទ្រជនស៊ីវិលក្នុងប្រទេសអ៊ុយក្រែន ពិសេសក្នុងទីក្រុងម៉ារីយ៉ូប៉ូល។ ក្នុងនោះ UN បានឲ្យដឹងថា ពួកគេកំពុងអនុវត្តសកម្មភាពមនុស្សធម៌ ឆ្លងកាត់ក្នុងក្រុងម៉ារីយ៉ូប៉ូលបានដោយសុវត្ថិភាព រីឯកាកបាតក្រហមអន្តរជាតិវិញ បច្ចុប្បន្នក៏កំពុងចូលរួមសកម្មភាពជាមួយ UN ផងដែរ។
ប៉ុន្តែបញ្ហានៅត្រង់ថា ក្រសួងការពារជាតិរុស្ស៊ីបានអះអាងថា ចំនួនជនស៊ីវិលដែលបានបញ្ចូនចេញទៅដោយUN និង កាកបាទក្រហមអំឡុងបទឈប់បាញ់ គឺមានតែ៨០នាក់ប៉ុណ្ណោះ។ យ៉ាងណាក៏ដោយ ទាំង UN និងកាកបាតក្រហម មិនបានប្រាប់ថាចំនួនជនស៊ីវិលដែលពួកគេកំពុងដឹកជញ្ជូនចេញនោះមានប៉ុន្មានឲ្យប្រាកដនោះទេ។ គេនៅមិនទាន់ដឹងច្បាស់ទេថា ហេតុអ្វីទើបភាគីទាំងសងខាង បានផ្តល់តួលេខខុសៗគ្នាបែបនេះ។
គួរជម្រាបថា ចាប់ពីសង្គ្រាមឈ្លានពានរបស់រុស្ស៊ីមកលើអ៊ុយក្រែនបានចាប់ផ្តើម នេះជាលើកទីមួយហើយដែលភាគីទាំងសងខាងមានបទឈប់បាញ់ពិតប្រាកដមួយ ហើយដែលបានអនុញ្ញាតឲ្យមានការជម្លៀសពលរដ្ឋបានដោយសុវត្ថិភាពបែបនេះ។ ភាគីអ៊ុយក្រែនសង្ឃឹមថា គេនឹងអាចបន្តជម្លៀសពលរដ្ឋបានច្រើនបន្ថែមទៀតចាប់ពីថ្ងៃចន្ទទី០២ឧសភាតទៅ ដោយហេតុថា នៅមានជនស៊ីវិលរាប់រយនាក់ទៀត កំពុងពូនសំងំក្នុងរូងក្រោមដីនៃរោងចក្រស្លរតំបន់ Azov។
អត្ថបទគួរអាន
គួររំឭកថា យោធារុស្ស៊ីបានបង្វែរការវាយលុករបស់ខ្លួនទៅកាន់ភាគខាងត្បូង និង ខាងកើតរបស់អ៊ុយក្រែនវិញ បន្ទាប់ពីបរាជ័យក្នុងការដណ្តើមយករដ្ឋធានីកៀវកាលពីដើមខែមុន។ ប៉ុន្តែកងទ័ពរុស្ស៊ីបានចាកចេញទៅដោយបានបន្សល់ទុក សាកសពជនស៊ីវិលរាប់ពាន់នាក់ និងបង្ខំឱ្យមនុស្សជាង ៥លាននាក់ភៀសខ្លួនចេញពីប្រទេស។
ជាមួយនឹងការប្រយុទ្ធគ្នាមានខ្លាំង មានខ្សោយតាមបណ្តោយភាគខាងត្បូង និងភាគខាងកើតអ៊ុយក្រែន ប្រធានសភាតំណាងរាស្ត្រអាមេរិកលោកស្រី ណាន់ស៊ី ប៉េឡូស៊ី(Nancy Pelosi) បានទៅដល់រដ្ឋធានីកៀវ ក្នុងទស្សនកិច្ចឥតព្រាងទុកមួយកាលពីចុងសប្តាហ៍មុន។
លោកស្រីប៉េឡូស៊ីនិយាយថា៖ គណៈប្រតិភូរបស់អាមេរិកបានធ្វើដំណើរទៅទីក្រុងកៀវ ដើម្បីផ្ញើសារមួយដល់ពិភពលោកទាំងមូលថា អាមេរិកនឹងឈរនៅយ៉ាងរឹងមាំជាមួយអ៊ុយក្រែន។ ប្រធានសភាអាមេរិករូបនេះ បានសន្យាបន្តការគាំទ្ររបស់សហរដ្ឋអាមេរិកសម្រាប់អ៊ុយក្រែន រហូតដល់ទទួលបានជ័យជំនះ។
សូមបញ្ជាក់ថា លោកស្រី ណាន់ស៊ី ប៉េឡូស៊ី ជាមន្ត្រីជាន់ខ្ពស់ក្រុងវ៉ាស៊ីនតោនទី៣ហើយ ដែលបានបំពេញទស្សនកិច្ចនៅអ៊ុយក្រែនដោយផ្ទាល់ បន្ទាប់ពីការទៅដល់របស់រដ្ឋមន្ត្រីការបរទេស Antony Blinken និង រដ្ឋមន្ត្រីការពារជាតិ Lloyd Austin កាលពីពាក់កណ្តាលខែមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
