អាល្លឺម៉ង់ អាចរួចខ្លួនពីវិបត្តិសេដ្ឋកិច្ចនៅឆ្នាំ២០២២ និងសម្រេចបានកំណើន១,៩% ដោយសារកត្តាអ្វីខ្លះ?

ទិន្នន័យដែលចេញផ្សាយដោយទីភ្នាក់ងារស្ថិតិជាតិដដែល ឱ្យដឹងថា ដោយសារតែមានការជំរុញដល់ការចំណាយឯកជន ពិសេសដោយមានវិធានការគាំទ្រសារពើពន្ធរបស់រដ្ឋាភិបាល បានកាត់បន្ថយផលប៉ះពាល់ នៃការធ្លាក់ចុះសេដ្ឋកិច្ចពីជម្លោះនៅក្នុងប្រទេសអ៊ុយក្រែន។ ក្នុងន័យនេះ អាល្លឺម៉ង់ដែលជាក្បាលម៉ាស៊ីនសេដ្ឋកិច្ចរបស់អឺរ៉ុបបានជៀសរួចផុតពីវិបត្តិសេដ្ឋកិច្ច ដើរថយក្រោយហើយ កាលពីឆ្នាំ២០២២។ ជាមួយនឹង កំណើនផលិតផលក្នុងស្រុកសរុបរបស់អាល្លឺម៉ង់ ១,៩% គឺល្អលើសពីការរំពឹងទុករបស់អ្នកជំនាញ និងរដ្ឋាភិបាលអាល្លឺម៉ង់ទៅទៀត។

មួយវិញទៀត កញ្ចប់ថវិកា ២០០ពាន់លានអឺរ៉ូដែលរដ្ឋាភិបាលបានបញ្ចេញប្រើសម្រាប់ទ្រទ្រង់សេដ្ឋកិច្ច តាមរយៈការទប់តម្លៃប្រេង និងឧស្ម័នកុំឲ្យឡើងថ្លៃ ជាកត្តារួមចំណែកដ៏ធំសម្រាប់កំណើនសេដ្ឋកិច្ចអាល្លឺម៉ង់នៅពេលនេះ។

ដោយឡែក ជាមួយកញ្ចប់ជំនួយរបស់រដ្ឋសម្រាប់ប្រជាជន និងក្រុមហ៊ុនរោងចក្រឧស្សាហកម្មវិញ ក៏ដូចជាការចំណាយថ្លៃប្រើប្រាស់ក្នុងស្រុកដែលជាសរសរទ្រូងនៃកំណើនសេដ្ឋកិច្ច បានកើនឡើងដូចមុនសម័យកូវីដ ទោះបីអាល្លឺម៉ង់ជួបបញ្ហាអតិផរណា វិបត្តិថាមពលឡើងថ្លៃក៏ដោយ។

ជុំវិញបញ្ហាថាមពលនេះដែរ អាល្លឺម៉ង់មានអំណោយផលពីអាកាសធាតុ ដែលមិនសូវចុះត្រជាក់ខ្លាំង ជាហេតុតម្រូវការថាមពលក៏មានតិចជាងមុន ហើយមិនប្រឈមនឹងការខ្វះខាតដូចគេធ្លាប់បារម្ភទៅទៀត។ ប៉ុន្តែទោះអាកាសធាតុត្រជាក់ខ្លាំង ក៏គេជឿថាអាល្លឺម៉ង់អាចរត់រួចមួយរដូវរងាដែរ ដោយសារ ខ្លួនបានរូតរះ ទិញឧស្ម័នធម្មជាតិរាវ LNG ពីប្រទេសដទៃ ដើម្បីបំពេញស្តុក ក្រោយឈប់ទិញពីរុស្ស៊ីភ្លាម។

ទោះមានកំណើនល្អលើសការរំពឹងទុកជៀសផុតពីវិបត្តិកាលពីឆ្នាំ២០២២មែន តែមិនមែនមានន័យថា អាល្លឺម៉ង់អាចរួចខ្លួនម្តងទៀតនៅឆ្នាំ២០២៣នេះឡើយ។ ជាក់ស្តែង អាល្លឺម៉ង់នៅតែប្រឈមមុខនឹងការផ្គត់ផ្គង់ថាមពលរបស់ខ្លួនក្នុងរដូវរងាឆ្នាំ២០២៣ ក៏ដូចជាការកើនឡើងនៃហានិភ័យភូមិសាស្ត្រនយោបាយដែលជះឥទ្ធិពលមិនល្អលើពាណិជ្ជកម្មពិភពលោក និងការកើនឡើងនៃកង្វះកម្មករជំនាញជាដើម។ ម៉្យាងក្រុមប៊ែកឡាំង ក៏មិនអាចចេះតែបន្តបញ្ចេញថវិកាដើម្បីទប់ទល់តម្លៃថាមពលឡើងថ្លៃរាល់តែឆ្នាំបានដែរ៕