ក្នុងកិច្ចសន្ទនាជាមួយអ្នកវិភាគនៃក្រុមប្រឹក្សាទំនាក់ទំនងបរទេស របស់សហរដ្ឋអាមេរិក នាយករដ្ឋមន្ត្រីសិង្ហបុរី លោកលី សៀនឡុង បានអះអាងយ៉ាងដូច្នេះថា៖ ប្រសិនបើមានការសម្រេចចិត្តមិនត្រូវ ដែលបង្កើតបានជាកំហុសក្នុងប្រវត្តិសាស្ត្រ ដូចជាការដើរឈ្លានពានប្រទេសមួយផ្សេងទៀតទាំងកម្រោល នោះប្រទេសនៅក្នុងតំបន់អាស៊ីប៉ាស៊ីហ្វិកគួរតែត្រៀមខ្លួនឲ្យហើយទៅ ព្រោះការសម្រេចចិត្តខុស ភាពចៃដន្យនៃប្រវត្តិសាស្ត្រអាចកើតមានគ្រប់ពេល ហើយវានឹងចាប់ផ្តើមធ្វើឲ្យយើងមានអារម្មណ៍ថា អសន្តិសុខខ្លាំងបំផុត។
មុនការលើកឡើងខាងលើ លោកលី សៀន ឡុង ក៏ធ្លាប់បាននិយាយអំពី ផលប៉ះពាល់អវិជ្ជមាន លើតំបន់ឥណ្ឌូប៉ាស៊ីហ្វិកដែរ ពីជម្លោះដែលកំពុងបន្តកើតឡើងក្នុងប្រទេសអ៊ុយក្រែន អំឡុងពេលជួបជាមួយប្រធានាធិបតីអាមេរិកក្នុងដើមសប្តាហ៍នេះ។
នាយករដ្ឋមន្ត្រីសិង្ហបុរីរូបនេះបន្តថា៖ សង្គ្រាមនៅអ៊ុយក្រែនធ្វើឲ្យទំនាក់ទំនងចិនអាមេរិកដែលល្អក់កករស្រាប់នោះ កាន់តែប្រេះស្រាំថែមទៀត។ នៅពេលដែលប្រទេសយក្សសេដ្ឋកិច្ចទាំងពីរកាន់តែប៉ះទង្គិចគ្នាដោយសារអ៊ុយក្រែន តំបន់អាស៊ីប៉ាស៊ីហ្វិក ក៏ដូចជាពិភពលោកទាំងមូល នឹងរងសម្ពាធនេះបន្ថែមពីលើភាពអវិជ្ជមាននៃសង្គ្រាមនៅអ៊ុយក្រែនមួយកម្រិតទៀត។
អត្ថបទគួរអាន
នៅពេលត្រូវបានចោទសួរថា លោកលី សៀនឡុង មានអារម្មណ៍បែបណាចំពោះសង្គ្រាមដ៏អាក្រក់បំផុតក្នុងតំបន់អឺរ៉ុប ចាប់តាំងពីបញ្ចប់សង្គ្រាមលោកមក?
នាយករដ្ឋមន្ត្រីសិង្ហបុរីឆ្លើយថា៖ វាបានធ្វើឲ្យយើងគ្រប់គ្នា មានអារម្មណ៍ថា គ្មានសុវត្ថិភាពនោះទេ។ លោកបន្តថា៖ សង្គ្រាមដែលបានចាប់ផ្តើមតាំងពីថ្ងៃទី២៤ខែកុម្ភៈ នៅពេលដែលរុស្ស៊ីបានឈ្លានពានអ៊ុយក្រែន ដែលជាអ្នកជិតខាងរបស់ខ្លួន វាបានបំផ្លាញក្របខណ្ឌ និងស្តង់ដារច្បាប់ សណ្តាប់ធ្នាប់ និងសន្តិភាពអន្តរជាតិ។ ដូចគ្នាដែរវាបានរំលោភ ធម្មនុញ្ញអង្គការសហប្រជាជាតិ និងបង្កគ្រោះថ្នាក់ដល់អធិបតេយ្យភាព និងបានគំរាមកំហែងបូរណភាពទឹកដីនៃប្រទេសទាំងអស់ ជាពិសេសប្រទេសតូចៗតែម្តង។
សូមជម្រាបថា សិង្ហបុរីហាក់បានបង្ហាញក្តីបារម្ភខ្លាំងជាងគេចំពោះវិបត្តិសង្គ្រាមនៅអ៊ុយក្រែន ខណៈប្រទេសដីកោះមួយនេះ ក៏បានដាក់ទណ្ឌកម្មលើការនាំចេញនាំចូលទំនិញជាមួយប្រទេសរុស្ស៊ីផងដែរ។ ក្នុងជំនួបជាមួយលោកចូ បៃឌិន នៅសេតវិមាននាយករដ្ឋមន្ត្រីសិង្ហបុរីរូបនេះ បានសម្តែងការព្រួយបារម្ភព្រមគ្នាជាមួយអាមេរិកថា គ្រប់ទីកន្លែងក្នុងពិភពលោកកំពុងធ្លាក់ក្នុងហានិភ័យហើយ។
គួរបញ្ជាក់ថា ប្រមុខដឹកនាំសិង្ហបុរី នឹងបន្តទស្សនកិច្ចការងារ នៅសហរដ្ឋអាមេរិករហូតដល់ថ្ងៃទី ០២ខែមេសា។ លោកនឹងបន្តបេសសកម្មទៅទីក្រុងញូវយ៉ក ជាកន្លែងដែលលោកនឹងជួបជាមួយអគ្គលេខាធិការអង្គការសហប្រជាជាតិ លោក អាន់តូនីញូ គូទែរ៉េស ក៏ដូចជាមន្ត្រីផ្នែកឧស្សាហកម្ម និងហិរញ្ញវត្ថុរបស់អាមេរិកដទៃទៀត៕
