ក្រុមហ៊ុនសេវាកម្មអ៊ីនធឺណិតមួយរបស់ជប៉ុនកំពុងស្វែងរកការបណ្តាក់ទុនរួមគ្នាចំនួន១០០ពាន់លានដុល្លារ

ប្រភពដែលដឹងពីបញ្ហានេះបាននិយាយថា គម្រោងវិនិយោគរួមគ្នានេះត្រូវបានដាក់ឈ្មោះថា អ៊ីហ្សាណាហ្គី (Izanagi) ជាការខិតខំប្រឹងប្រែងថ្មីមួយរបស់លោកមហាសេដ្ឋី សុន នៅពេលក្រុមហ៊ុន SoftBank របស់លោកបានកាត់បន្ថយការវិនិយោគលើការបើកអាជីវកម្មថ្មីទៀត។

តាមរយៈគម្រោងនេះ លោក សុន បានស្រមៃបង្កើតក្រុមហ៊ុនមួយដែលអាចបំពេញបន្ថែមដល់អង្គភាព ផលិតបន្ទះឈីប Arm Holdings និងអនុញ្ញាតឱ្យមហាសេដ្ឋីរូបនេះអាចបង្កើតរោងចក្រផលិតបន្ទះឈីប AI។ នៅក្នុងសេណារីយ៉ូមួយដែលគេកំពុងពិចារណាធ្វើនោះបានបង្ហាញថា ក្រុមហ៊ុន SoftBank នឹងផ្តល់​ប្រាក់ចំនួន៣០ពាន់លានដុល្លារអាម៉េរិក ហើយថវិកា៧០ពាន់លានដុល្លារទៀតបានមកពីក្រុមហ៊ុនបណ្ដាក់ទុនរួមផ្សេងៗនៅមជ្ឈិមបូព៌ា។

ប្រសិនបើមហាសេដ្ឋីរូបនេះទទួលបានជោគជ័យមែន គម្រោងបន្ទះឈីបនេះនឹងក្លាយជាការ វិនិយោគដ៏ធំបំផុតមួយនៅក្នុងកម្មវិធីបញ្ញាសិប្បនិមិត្ត AI ចាប់តាំងពីការបង្កើតឡើងនូវកម្មវិធីផ្ញើសារ ChatGPT ពោលគឺវានឹងមានចំនួនច្រើនជាងការបណ្ដាក់ទុនថ្មីៗនេះរបស់ក្រុមហ៊ុន Microsoft Corp លើកម្មវិធី OpenAI ដែលមានចំនួនជាង១០ពាន់លានដុល្លារ។

លោក សុន បានស្រមៃឃើញជាច្រើនឆ្នាំមកហើយពីការមកដល់នៃបញ្ញាសិប្បនិមិត្តទូទៅនេះ ឬហៅថា AGI នៅក្នុងបទបង្ហាញរបស់លោកជាច្រើនដោយលោកតែងតែនិយាយថា ពិភពលោកដែលពោរពេញទៅដោយគ្រៀងម៉ាស៊ីនឆ្លាតជាងមនុស្សមួយនេះ នឹងកាន់តែមានសុវត្ថិភាព កាន់តែមានសុខភាពល្អ និងកាន់តែរីករាយជាងមុន។ បញ្ញាសិប្បនិមិត្តទូទៅនេះគឺជាអ្វីមួយដែលអ្នកជំនាញខាង AI នឹងបង្កើតវាឡើង​។ ប៉ុន្តែនៅពេលមានគេសួរពីនិយមន័យលម្អិតពាក់ព័ន្ធនឹងតួលេខ ពេលវេលា ថាមពលកុំព្យូទ័រមានប៉ុន្មាន និងថាតើ AGI នឹងឆ្លាតជាងបញ្ញារបស់មនុស្សជាតិក្នុងកម្រិតណានោះ គឺភាគច្រើនមិនមានចម្លើយពិតប្រាកដនោះទេ៕