កាលពីឆ្នាំ២០២០ គ្រាដែលកូវីដ១៩ចាប់ផ្តើមរាលដាលដំបូងៗ ប្រទេសនានាក្នុងលោកហាក់ មិនបានយកចិត្តទុកដាក់ក្នុងការបិទព្រំដែន និងរឹតត្បិតការធ្វើដំណើរឡើយ ដោយហេតុថា កាលនោះគេមិនទាន់ស្គាល់ពីកូវីដ១៩ ច្បាស់។
ប៉ុន្តែពេលនេះគេស្គាល់ពីកូវីដ១៩យ៉ាងច្បាស់និងទូលំទូលាយ វាផ្ទុយស្រឡះពីពេលដំបូងៗ នៅមិនបានមួយសប្តាហ៍ផង បន្ទាប់ពីអ្នកវិទ្យាសាស្ត្រមួយក្រុមនៅប្រទេសអាហ្វ្រិចខាងត្បូង ប្រកាសរកឃើញទម្រង់កូវីដ១៩បំប្លែងខ្លួនថ្មី និង នៅបន្ទាប់ពី WHO ផ្តល់ឈ្មោះឲ្យថា អូមីក្រុង ដែលមានហានិភ័យឆ្លងខ្លាំង ក្រុមប្រទេសជាច្រើននៅទូទាំងពិភពលោក បានផ្តើមរឹតត្បិតការធ្វើដំណើរម្តងទៀត ទោះបីប្រទេសខ្លះ ទើបនឹងបានបន្ធូរបន្ថយហើយថ្មីៗក៏ដោយ។ ជាក់ស្តែង ប្រទេសជប៉ុនទើបតែបានបន្ធូរបន្ថយវិធានការបានបីសប្តាហ៍ ឥឡូវនេះជប៉ុនបានប្រកាសបិទព្រំដែនមិនទទួលទេសចរបរទេសឡើងវិញ ចាប់ពីថ្ងៃអង្គារទី ៣០វិច្ឆិកាទៅ។អត្ថបទគួរអាន
អូស្ត្រាលីឯណោះវិញ ប្រកាសលើកពេលបើកព្រំដែនទទួលនិស្សិត និងពលករបរទេស ដែលថាគ្រោងនឹងបើកចាប់ពីថ្ងៃទី ១ ធ្នូ តទៅ ឥឡូវបិទទៀតហើយ។ ប្រទេសហ្វីលីពីនក៏ផ្អាកផែនការបើកប្រទេសទទួលភ្ញៀវទេសចរបរទេសចាក់ថ្នាំបង្ការរួច មួយរយៈសិនទៀតដែរ។
យ៉ាងណាមិញ ទន្ទឹមនឹងការប្រកាសថា អូមីក្រុង ជាមេរោគគួរអោយព្រួយបារម្ភ អង្គការសុខភាពពិភពលោក បែរជានិយាយថា ការបិទព្រំដែន មិនមែនជាមធ្យោបាយទប់ស្កាត់ការរីករាលដាលនៃកូវីដ ប្រកបដោយប្រសិទ្ធភាពទៅវិញ ខណៈប្រទេសអាហ្វ្រិកខាងត្បូងផ្ទាល់ ក៏បានអំពាវនាវឱ្យគ្រប់ប្រទេសទាំងអស់បើកចំហព្រំដែនជាមួយខ្លួនឡើងវិញផងដែរ។
បើតាមការចុះផ្សាយដោយសារព័ត៌មាន CNN មកទល់ពេលនេះ យ៉ាងហោចណាស់មានប្រទេសប្រមាណ ៧០ប្រទេស និងដែនដីហើយ ដែលបានដាក់ចេញ ការរឹតត្បិតការធ្វើដំណើរ ដើម្បីទប់ស្កាត់ ការឆ្លងមេរោគបំប្លែងថ្មី អូមីក្រុង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
