នាពេលថ្មីៗនេះ ក្នុងអំឡុងពេលធ្វើដំណើរទស្សនៈកិច្ចរយៈពេលមួយសប្តាហ៍ទៅកាន់ប្រទេសរុស្ស៊ី មេដឹកនាំរបបយោធាមីយ៉ាន់ម៉ា ឧត្តមសេនីយ៍មីង អុង ឡាំង (Min Aung Hlaing) បានជួបជាមួយលោកអាលេចហ្សី លីចខាឆេវ (Alexey Likhachev) អគ្គនាយកក្រុមហ៊ុនរូសាតូម (Rosatom) ដែលជាក្រុមហ៊ុនថាមពលនុយក្លេអ៊ែររបស់ទីក្រុងម៉ូស្គូ។ នេះបើតាមការចុះផ្សាយដោយទីភ្នាក់ងារសារព័ត៌មាន Nikkei Asia។
បើតាមសេចក្តីប្រកាសផ្លូការដោយក្រុមហ៊ុនថាមពលនុយក្លេអ៊ែររូសាតូម (Rosatom) បានថ្លែងថា៖ «កិច្ចប្រជុំជាមួយភាគីមីយ៉ាន់ម៉ាមានផ្លែផ្កាល្អ ដោយក្រុមហ៊ុននេះ បានសម្រេចុះអនុស្សរណៈនៃការយោគយល់គ្នាមួយ ដើម្បីកិច្ចសហការលើការអភិវឌ្ឍ វិស័យថាមពលនុយក្លេអ៊ែរនៅក្នុងប្រទេសមីយ៉ាន់ម៉ា»។
គួរជម្រាបថា រដ្ឋមន្ត្រីក្រសួងថាមពលមីយ៉ាន់ម៉ា លោកថូង ហាន (Thaung Han) ក៏បានជួបជាមួយលោក Likhachev កាលពីខែមិថុនកន្លងទៅដែរ ខណៈពេលដែលលោកបានមកបំពេញដំណើរទស្សនកិច្ចនៅប្រទេសរុស្ស៊ី ដើម្បីពិភាក្សាអំពីវិស័យអគ្គិសនីរបស់ប្រទេសមីយ៉ាន់ម៉ា ។
នៅឆ្នាំ ២០០៧ កន្លងទៅរុស្ស៊ីបានយល់ព្រមសាងសង់ទីពិសោធន៍រ៉េអាក់ទ័នុយក្លេអ៊ែរខ្នាតតូចមួយនៅមីយ៉ាន់ដែរ ដែលកាលនោះប្រទេសអាស៊ីអាគ្នេយ៍មួយនេះស្ថិតនៅក្រោមរដ្ឋាភិបាលយោធានៅឡើយ។ ទោះជាយ៉ាងណា ការសាងសង់មិនដែលទៅមុខទេ ដោយសារមានការជំទាស់ពីសំណាក់សហរដ្ឋអាមេរិក និងប្រទេសដទៃទៀត។
អត្ថបទគួរអាន
ចាប់តាំងពីពេលនោះមក ប្រទេសមីយ៉ាន់ម៉ាបានផ្តោតទៅលើការមិនរីកសាយភាយនុយក្លេអ៊ែរវិញ ដោយខ្លួនបានចុះហត្ថលេខាមួយ លើសន្ធិសញ្ញាហាមប្រាមការអភិវឌ្ឍនុយក្លេអ៊ែរក្នុងឆ្នាំ ២០១៦ ដែលកាលនោះ ប្រទេសនេះស្ថិតក្រោមរដ្ឋាភិបាលជាប់ឆ្នោតដែលដឹកនាំដោយគណបក្សម្ព័ន្ធជាតិ ដើម្បីប្រជាធិបតេយ្យរបស់លោកស្រីអុង សាន ស៊ូជី (Aung San Suu Kyi)។
ការធ្វើដំណើរនាពេលថ្មីៗនេះ គឺជាលើកទី២ របស់លោក Min Aung Hlaing នៅក្នុងប្រទេសរុស្ស៊ី ចាប់តាំងពីយោធាមីយ៉ាន់ម៉ា បានកាន់កាប់រដ្ឋាភិបាលក្នុងខែកុម្ភៈ ឆ្នាំ ២០២១។
ក្រៅពីជួបលោក Likhachev អគ្គនាយកក្រុមហ៊ុនថាមពលនុយក្លេអ៊ែររូសាតូម (Rosatom) លោក Min Aung Hlaing ក៏បានជួបជាមួយមន្ត្រីមួយចំនួនមកពីទីភ្នាក់ងារអវកាសរុស្ស៊ីរ៉ូសខូស្មូម (Roscosmos) ផងដែរ។ ហើយមេដឹកនាំរបបយោធារូបនេះ បានពិភាក្សាអំពីកិច្ចសហប្រតិបត្តិការយោធា និងសមយុទ្ធផ្សេងៗនាពេលអនាគតជាមួយមន្ត្រីការពារជាតិរុស្ស៊ីថែមទៀតផង។
យ៉ាងណាក៏ដោយចុះ ខាងរដ្ឋាភិបាលរុស្ស៊ីបានអះអាងថា ដំណើរទស្សនកិច្ចរបស់លោកមីន អោងឡាំងនៅទីក្រុងម៉ូស្គូថ្មីៗនេះ គឺគ្រាន់តែជាដំណើរទស្សនកិច្ចលក្ខណៈឯកជនប៉ុណ្ណោះ មិនមែនជាដំណើរទស្សនកិច្ចផ្លូវរដ្ឋឡើយ។
គួររំលឹកឡើងវិញថា នៅដើមខែមិថុនានេះ រដ្ឋមន្ត្រីការបរទេសចិន លោក Wang Yi បានទៅទស្សនៈកិច្ចនៅទីក្រុង Bagan នៃប្រទេសមីយ៉ាន់ម៉ា ដើម្បីចូលរួមកិច្ចប្រជុំថ្នាក់តំបន់មួយ។ ប៉ុន្តែលោក Wang បានចាកចេញពីប្រទេសនេះដោយមិនបានជួបជាមួយ លោកMin Aung Hlaing នោះទេ៕
