រតនាគារជាតិវៀតណាម ប្រកាសបោះផ្សាយមូលបត្របំណុលរដ្ឋជាង ៥ពាន់លានដុល្លារ ក្នុងត្រីមាសទី១ ឆ្នាំនេះ

សារព័ត៌មាន Vietnam News បានរាយការណ៍ថា នៅដើមសប្តាហ៍នេះ រតនាគារជាតិវៀតណាម បានប្រកាសបោះផ្សាយមូលបត្របំណុលរដ្ឋាភិបាលនៅត្រីមាសទី១ ដើមឆ្នាំ២០២៤ នេះក្នុងទំហំរហូតដល់ទៅជាង៥ពាន់លានដុល្លារអាម៉េរិក ហើយកំពុងតែសម្របសម្រួលជាមួយស្ថាប័នពាក់ព័ន្ធ ដើម្បីរៀបចំបោះផ្សាយមូលបត្របំណុលនៅលើទីផ្សារក្នុងស្រុកក្នុងគោលដៅធានាចរន្តប្រក្រតីភាពនៃសេដ្ឋកិច្ច។

រតនាគារជាតិវៀតណាម បាននិយាយថា ខ្លួននឹងតាមដានផែនការកៀរគរមូលធន ដែលបានកំណត់យ៉ាងយកចិត្តទុកដាក់ ហើយនឹងស្នើទៅក្រសួងហិរញ្ញវត្ថុភ្លាមៗឱ្យជួយរកដំណោះស្រាយ ដើម្បីកៀរគរប្រមូលមូលធនតាមរយៈការបោះផ្សាយមូលបត្របំណុលរដ្ឋាភិបាលជាមួយនឹងបរិមាណ ក៏ដូចជារយៈពេល និងអត្រាការប្រាក់សមស្រប ពោលគឺធ្វើយ៉ាងណាកៀរគរប្រមូលមូលធនឱ្យបានគ្រប់តាមផែនការ។

ប្រភពដដែលបានអះអាងថា ដើម្បីធានាភាពស្របច្បាប់ និងតម្លាភាព ការបោះផ្សាយមូលបត្របំណុលរដ្ឋាភិបាលត្រូវអនុវត្តតាមវិធីសាស្ត្រដេញថ្លៃតាមរយៈផ្សារហ៊ុននៅក្រុងហាណូយ រីឯលក្ខខណ្ឌនៃការបោះផ្សាយមូលបត្របំណុល ត្រូវមានភាពបត់បែនដោយផ្តោតលើរយៈពេលវែង៥ឆ្នាំ ឬ យូរជាងនេះដើម្បីបន្ស៊ីគ្នាទៅនឹងកាតព្វកិច្ចទូទាត់បំណុល និងជៀសវាងការដាក់សម្ពាធលើថវិការដ្ឋ។

កាលពីឆ្នាំ២០២៣ រតនាគារជាតិវៀតណាម កៀរគរប្រមូលមូលធនបានរហូតដល់ទៅជាង១២ពាន់លានដុល្លារអាម៉េរិក តាមរយៈការបោះផ្សាយមូលបត្របំណុលរដ្ឋាភិបាល ដោយសម្រេចបាន៩៨%នៃផែនការដែលក្រសួងហិរញ្ញវត្ថុបានកំណត់។

ទិន្នន័យបង្ហាញថា ការទូទាត់សរុបនៃប្រាក់ដើមបូករួមជាមួយការប្រាក់លើមូលបត្របំណុលរដ្ឋាភិបាលនៅក្នុងឆ្នាំ២០២៣ មានទំហំ៧,៥ពាន់លានដុល្លារ ដោយក្នុងនោះប្រាក់ដើមមានចំនួន៤,១ពាន់លានដុល្លារ៕

ដោយៈ សរ សុជាតិ