លោកជំទាវ ជា សិរី អគ្គនាយិកាបច្ចេកទេសធនាគារជាតិ នៃកម្ពុជាបានមានប្រសាសន៍ថា ការអភិវឌ្ឍបង្កើតឲ្យមានប្រព័ន្ធទូទាត់សម័យថ្មីនេះ ក៏ជាការចូលរួមចំណែកអភិវឌ្ឍវិស័យសេដ្ឋកិច្ច ឆ្ពោះទៅរកសេដ្ឋកិច្ចផ្នែកឌីជីថល និងបដិវត្តឧស្សាហកម្មជំនាន់ទី៤ ស្របតាមបរិបទសេដ្ឋកិច្ចឌីជីថលក្នុងតំបន់អាស៊ាន។
លោកជំទាវ ជា សិរីបានគូសបញ្ជាក់ទៀតថា ប្រព័ន្ធបាគង ជាប្រព័ន្ធទូទាត់ឆ្អឹងខ្នង ដ៏សំខាន់ ដែលអភិវឌ្ឍឡើងសម្រាប់បម្រើគោលដៅសំខាន់ចម្បងរួមមាន ផ្តល់លទ្ធភាពទូទាត់ឆ្លងគ្រឹះស្ថានមួយទៅគ្រឹះស្ថានមួយមានភាពងាយស្រួល ការកែលម្អប្រសិទ្ធភាព និងសុវត្ថភាពប្រព័ន្ធទូទាត់សងប្រាក់ ជំរុញបរិយាប័ន្នហិរញ្ញវត្ថុ និងការជំរុញការទូទាត់ជាប្រាក់រៀលផងដែរ។
អត្ថបទទាក់ទង
សូមជម្រាបថា ប្រព័ន្ធថ្មីនេះ បច្ចុប្បន្នមានសមាជិកចូលរួមចំនួន ១៨ គ្រឹះស្ថាន ដែលក្នុងនោះ គ្រឹះស្ថានធនាគារ និងហិរញ្ញវត្ថុមានចំនួន ១៦ និងសេវាទូទាត់សងប្រាក់ចំនួន២។ ក្នុងពេលជាមួយគ្នានេះ ក៏មានគ្រឹះស្ថានធនាគារ និងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ចំនួន២៤ ផ្សេងទៀត បានទទួលការអនុញ្ញាតជាគោលការណ៍ចូលជាសមាជិកនៃប្រព័ន្ធបាគងនេះដែរ។
ជាការបញ្ជាក់របស់លោកជំទាវ ជា សិរី ប្រព័ន្ធបាគងនេះ ជាហេដ្ឋារចនាសម្ព័ន្ធមួយដែលជួយឲ្យអ្នកផ្តល់សេវាទូទាត់អាចភ្ជាប់ទៅជាមួយគ្រប់គ្រឹះស្ថានធនាគារ និងហិរញ្ញវត្ថុ ក៏ដូចជា គ្រឹះស្ថានផ្តល់សេវាទូទាត់សងប្រាក់ដទៃទៀត មានភាពកាន់តែងាយស្រួល និងអាចនិយាយមួយបែបទៀត គឺជាការផ្តល់សេវាកម្មបន្ថែមសម្រាប់អ្នកប្រើប្រាស់នៅកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
