មេដឹកនាំកូរ៉េខាងជើងរូបនេះក៏បានរិះគន់យ៉ាងចាស់ដៃលើប្រធានាធិបតីថ្មីរបស់កូរ៉េខាងត្បូងជាលើកដំបូងផងដែរ ដោយព្រមានថាទីក្រុងសេអ៊ូលកំពុងរុញច្រានប្រទេសទាំងពីរធ្លាក់ចុះទៅក្នុងភ្លើងសង្គ្រាមជាថ្មីម្ដងទៀតហើយ។
បុរសខ្លាំងលោកគីម ជុងអ៊ុន ដែលត្រូវបានទីភ្នាក់ងារសារព័ត៌មានកូរ៉េខាងជើង (KCNA) ស្រង់សំដីក្នុងអំឡុងពេលលោកធ្វើសុន្ទរកថា នៅក្នុងព្រឹត្តិការណ៍ប្រារព្ធខួបលើកទី ៦៩ នៃបទឈប់បាញ់រវាងកូរ៉េទាំងពីរនៅថ្ងៃទី២៧ ខែកក្កដានេះ ដោយលោក គីម បានសង្កត់ធ្ងន់ថា «មកទល់នឹងពេលនេះ កូរ៉េខាងត្បូង និងខាងជើងនៅតែស្ថិតក្នុងសេណារីយ៉ូនៃសង្គ្រាមនៅឡើយទេ»។
លោក គីម បានបន្ថែមថា ការប្រឈមមុខយោធាដាក់គ្នាឥតស្រាក់ស្រាន្ដជាមួយសហរដ្ឋអាមេរិក ក្រោយបិទបញ្ចប់សង្គ្រាមស៊ីវិលកូរ៉េឆ្នាំ ១៩៥៣ បានធ្វើឲ្យទីក្រុងព្យុងយ៉ាងត្រូវតែសម្រេច«កិច្ចការប្រវត្តិសាស្រ្តរបស់ខ្លួន» នោះគឺការពង្រឹងការការពារខ្លួនដោយចាប់យកអាវុធនុយក្លេអ៊ែរ។
មេដឹកនាំកូរ៉េខាងជើងរូបនេះ បានបញ្ជាក់ទៀតថា «កងកម្លាំងប្រដាប់អាវុធរបស់កូរ៉េខាងជើងត្រូវបានត្រៀមជើងព្រួលយ៉ាងម៉ឹងម៉ាត់ក្នុងការឆ្លើយតបទៅនឹងការវាយប្រហារណាមួយ ហើយអាវុធនុយក្លេអ៊ែររបស់របស់ទីក្រុងព្យុងយ៉ាងក៏រៀបចំរួចជាស្រេច ប្រកបដោយទំនួលខុសត្រូវ និងឆាប់រហ័សក្នុងការឆ្លើយតបផងដែរ»។
មែនទែនទៅ សុន្ទរកថានេះ បានធ្វើឡើងបន្ទាប់ពីមន្ត្រីក្រុងសេអ៊ូល និងក្រុងវ៉ាស៊ីនតោនបានព្រមានរួមគ្នាថា ទីក្រុងព្យុងយ៉ាងបានការត្រៀមលក្ខណៈរួចរាល់ ដើម្បីធ្វើការសាកល្បងអាវុធនុយក្លេអ៊ែរជាលើកដំបូងរបស់ខ្លួន ចាប់តាំងពីឆ្នាំ ២០១៧ មក។
ទោះបីជាបែបនេះក្តី រដ្ឋមន្ត្រីទទួលបន្ទុកកិច្ចការបង្រួបបង្រួមជាតិរបស់កូរ៉េខាងត្បូង បាននិយាយកាលពីថ្ងៃអង្គារដែរថា «លទ្ធភាពនៃការសាកល្បងសាជាថ្មីនេះអាចធ្វើទៅរួច ត្បិតថាវាមិនមិនមានសញ្ញាកើតឡើងភ្លាមៗក៏ដោយ»។
អត្ថបទគួរអាន
មួយវិញទៀត រដ្ឋមន្ត្រីការបរទេសកូរ៉េខាងត្បូងបាននិយាយកាលពីថ្ងៃពុធថា ប្រទេសកូរ៉េខាងជើងទំនងជានឹងប្រឈមមុខនឹងការដាក់ទណ្ឌកម្មកាន់តែខ្លាំងទៀត រួមទាំងវិធានការដើម្បីធ្វើការវាយប្រហារតាមប្រព័ន្ធអ៊ីនធឺណិតផងដែរ ប្រសិនបើប្រទេសផ្តាច់ការមួយនេះនៅតែបន្តការសាកល្បងអាវុធប្រល័យលោក។
ក្នុងសុន្ទរកថានោះដែរ គេក៏សង្កេតឃើញថា លោកគីម ជុងអ៊ុនបានលើកឡើងដោយចោទប្រកាន់សហរដ្ឋអាមេរិកពីការបង្កើត«ស្តង់ដារទ្វេរដង»នៃសកម្មភាពយោធារបស់ខ្លួនជាមួយកូរ៉េខាងត្បូង និងនៅតែបន្តគោលនយោបាយអរិភាពចំពោះទីក្រុងព្យុងយ៉ាង ដោយលោកបានអះអាងថា ទង្វើទាំងនេះហើយបានរារាំងដល់កិច្ចចរចាឡើងវិញក្នុងគោលបំណងលុបបំបាត់កម្មវិធីអាវុធនុយក្លេអ៊ែរ និងមីស៊ីលរបស់កូរ៉េខាងជើង ដែលជាថ្នូរនឹងទៅការបន្ធូរបន្ថយទណ្ឌកម្ម។
បុរសខ្លាំងកូរ៉េខាងជើងរូបនេះបញ្ជាក់យ៉ាងច្បាស់ថា៖ «ឧបសគ្គបង្ករឿងនោះហើយ បានជំរុញឲ្យទំនាក់ទំនងទ្វេភាគីរវាងប្រទេសកូរ៉េទាំងពីរ ឈានដល់ចំណុចរបត់មួយ ដែលពិបាកប្រែក្លាយទៅសភាពដើមវិញណាស់ ហើយកូរ៉េខាងជើងបានត្រៀមខ្លួនរួចរាល់ សម្រាប់ការប្រឈមមុខគ្នាផ្នែកយោធាណាមួយជាមួយសហរដ្ឋអាមេរិក»។
គួរជម្រាបឡើងវិញបន្តិចថា រដ្ឋផ្តាច់ការកូរ៉េខាងជើងក្នុងរយៈពេលប៉ុន្មានខែថ្មីៗនេះ បានសាកល្បងមីស៊ីលអន្តរទ្វីប រួមទាំងមីស៊ីលលឿនជាងសំឡេងរបស់ខ្លួន ព្រមទាំងបានបោះសំដីថា មីស៊ីលទាំងអស់នេះអាចបំពាក់ក្បាលគ្រាប់នុយក្លេអ៊ែរយុទ្ធសាស្ត្រ ដែលអាចហោះទៅដល់ទៅទីក្រុងសេអ៊ូលត្រឹមរពេលដ៏ខ្លីថែមទៀតផង។
តែយ៉ាងណា អ្នកនាំពាក្យក្រសួងការពារជាតិរបស់ទីក្រុងសេអ៊ូលបាននិយាយថា កូរ៉េខាងត្បូងនឹងបន្តពង្រឹងសមត្ថភាពរបស់ខ្លួន ហើយសហរដ្ឋអាមេរិកក៏បានពង្រីកប្រព័ន្ធការពារអាកាសក្រោមឆ័ត្រនុយក្លេអ៊ែររបស់ខ្លួនផងដែរ ដើម្បីឆ្លើយតបចំពោះការគំរាមកំហែងរបស់ទីក្រុងព្យុងយ៉ាងនោះ៕
