យ៉ាងណាមិញ សម្រាប់នៅឆ្នាំ២០២២នេះ កម្ពុជារំពឹងថានឹងមានក្រុមហ៊ុនចំនួន៤បន្ថែមទៀត បើកការដ្ឋានចម្រាញ់រ៉ែមាស និងលោហៈ នៅតាមបណ្ដាខេត្តមួយចំនួន។ នេះបើតាមការបញ្ជាក់របស់ថ្នាក់ដឹកនាំអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល។
អគ្គនាយកនៃអគ្គនាយកដ្ឋានធនធានរ៉ែ ឯកឧត្តម អ៊ឹង ឌីប៉ូឡា បានបញ្ជាក់ប្រាប់ខេមបូណូមីសថា គិតចាប់តាំងពីបើកដំណើរការរ៉ែមាសនៅខែដល់មិថុនា រហូតដល់ដំណាច់ឆ្នាំ២០២១ កម្ពុជា ទទួលបានចំណូលជាង១លាន៦៧ម៉ឺនដុល្លារពីការចម្រាញ់រ៉ែមាសនៅតំបន់អូរខ្វាវ ស្រុកកែវសីម៉ា ខេត្តមណ្ឌលគិរី។ ថវិកានេះ ជាចំណូលមិនមែនសារពើពន្ធ តាមរយៈការបង់សួយសាររបស់ក្រុមហ៊ុនរុករករ៉ែមាសរបស់អូស្ត្រាលី រ៉ឺនេសង់ មីនីរ៉ល លីមីតធីតផ្ទាល់តែម្ដង។ ទោះយ៉ាងណាឯកឧត្តម មិនបានបញ្ជាក់លម្អិតពីចំនួនមាសនិងចំណូលដុលសរុប ដែលទទួលបានពីការចម្រាញ់រ៉ែមាសនេះនោះទេ។
ពាក់ព័ន្ធការរុករករ៉ែមាសនៅកម្ពុជានេះដែរ ឯកឧត្តម អ៊ឹង ឌីប៉ូឡា បានអះអាងថា នៅឆ្នាំ២០២២ នេះនឹងមានក្រុមហ៊ុនរុករករ៉ែមាសចំនួន៤ទៀត នឹងចាប់ផ្តើមធ្វើអាជីវកម្មចម្រាញ់រ៉ែមាសជាផ្លូវការរបស់ខ្លួននៅកម្ពុជា។ ក្នុងចំណោមក្រុមហ៊ុនទាំងនេះ មានក្រុមហ៊ុនចំនួន៣មកពីចិន ដោយពួកគេគ្រោងបើកការដ្ឋាននៅខេត្តព្រះវិហារ ក្រចេះ និងមណ្ឌលគិរី។ ចំណែកក្រុមហ៊ុន Mesco Gold របស់ឥណ្ឌា គ្រោងបើកការដ្ឋាននៅខេត្តរតនគិរី ដែលរំពឹងបើកដំណើរការនៅចុងឆ្នាំនេះ។
អត្ថបទគួរអាន
ឯកឧត្តម វាយតម្លៃថា ធនធានរ៉ែមាសនៅតំបន់វិនិយោគដោយក្រុមហ៊ុនទាំង៤ខាងលើ មានទំហំតិចជាង គម្រោងវិនិយោគដោយក្រុមហ៊ុនរុករករ៉ែមាសរបស់អូស្ត្រាលីនៅតំបន់អូរខ្វាវ ស្រុកកែវសីមា ខេត្តមណ្ឌលគិរី។ ទោះយ៉ាងណា ឯកឧត្តម អ៊ឹង ឌីប៉ូឡា អ្នកនាំពាក្យក្រសួងរ៉ែ និងថាមពល រំពឹងថា ក្រោយចាប់ផ្តើមធ្វើអាជីវកម្មរ៉ែមាសរបស់ក្រុមហ៊ុនទាំងនេះ នឹងចូលរួមចំណែកដល់ការអភិវឌ្ឍសេដ្ឋកិច្ច និងសង្គមនៅកម្ពុជា តាមរយៈរាជរដ្ឋាភិបាលទទួលបានចំណូលពីសួយសារ និងពន្ធអាករផ្សេងៗ និងបង្កើតការងារដល់ប្រជាពលរដ្ឋនៅក្នុងស្រុកជាដើម។
គិតមកទល់បច្ចុប្បន្នក្រសួងរ៉ែ និងថាមពលបានផ្តល់អាជ្ញាបណ្ណរុករករ៉ែលោហៈចំនួន២៦ អាជ្ញាបណ្ណដល់ក្រុមហ៊ុនចំនួន១៦មកពីប្រទេសចិន អូស្ត្រាលី កាណាដា និងកម្ពុជា ហើយបានចុះបញ្ជីពាណិជ្ជកម្មត្រឹមត្រូវនៅក្រសួងពាណិជ្ជកម្ម។ ក្នុងនោះ មានក្រុមហ៊ុនមួយចំនួនកំពុងស្ថិតក្នុងដំណាក់កាលវាយតម្លៃសក្តានុពលធនធានរ៉ែ និងមួយចំនួនកំពុងរៀបចំរបាយការណ៍សិក្សាលទ្ធភាពនៃជម្រកធនធានរ៉ែ។
គួររំលឹកថា ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត របស់អូស្ត្រាលី កំពុងប្រតិបត្តិការលើរោងចក្រចម្រាញ់រ៉ែមាសលក្ខណៈឧស្សាហកម្មនៅតំបន់អូរខ្វាវ ស្រុកកែវសីមាខេត្តមណ្ឌលគិរី។ រោងចក្រនេះមានសមត្ថភាពអាចផលិតមាសសុទ្ធបានរហូតដល់៣តោនក្នុង១ឆ្នាំ ដែលរំពឹងថា នឹងអាចផ្តល់ប្រាក់ចំណូលដុល(ចំណូលមិនទាន់ទូទាត់ការចំណាយ) ជាមធ្យមប្រមាណ១៨៥លានដុល្លារក្នុង១ឆ្នាំ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
